Ezekiel 29

Lamentations  «  Ezekiel 28  ‹  Ezekiel 29  ›  Ezekiel 30  »  Daniel

ՄԱՐԳԱՐԷՈՒԹԻՒՆ ԵԳԻՊՏՈՍԻ ԴԷՄ

Տասներորդ տարին, տասներորդ ամսուան տասներկրորդ օրը, ¹Տէրը խօսեցաւ՝՝ ինծի՝ ըսելով.

«Մարդո՛ւ որդի, ²ուղղէ՛ երեսդ Եգիպտոսի Փարաւոն թագաւորին դէմ, ու մարգարէացի՛ր անոր դէմ եւ ամբողջ Եգիպտոսի դէմ։

Խօսէ՛ ու ըսէ՛. “Տէրը՝ Եհովան սա՛ կը յայտարարէ. "Ահա՛ ես քեզի դէմ եմ, ո՛վ Եգիպտոսի Փարաւոն թագաւոր, իր գետերուն մէջ պառկող մեծ վիշապ։ Դուն կ’ըսես. «Իմ գետս իմս է, զայն ե՛ս կերտեցի՝ ինծի համար»։

Բայց ես քու ծնօտիդ կեռեր պիտի անցընեմ, ու գետերուդ ձուկերը քու թեփերուդ պիտի փակցնեմ. քեզ գետերուդ մէջէն պիտի բարձրացնեմ, նաեւ գետերուդ բոլոր ձուկերը՝ որոնք քու թեփերուդ փակած են։

Քեզ եւ գետերուդ բոլոր ձուկերը անապատը պիտի նետեմ. դուն ³բաց դաշտի վրայ՝՝ պիտի իյնաս, ու պիտի չամփոփուիս եւ չհաւաքուիս. քեզ երկրի գազաններուն ու երկինքի թռչուններուն պիտի տամ իբր կեր։

Եգիպտոսի բոլոր բնակիչները պիտի գիտնան թէ ե՛ս եմ Տէրը, որովհետեւ Իսրայէլի տան համար եղէգէ ցուպ եղան։

Երբ անոնք քեզ ձեռքով բռնեցին, դուն ջախջախուեցար եւ անոնց ամբողջ ուսը ճեղքեցիր. երբ քեզի կռթնեցան, փշրուեցար ու անոնց ամբողջ մէջքը դողացուցիր"”»։

Հետեւաբար Տէրը՝ Եհովան սա՛ կը յայտարարէ. «Ահա՛ ես քու վրադ սուր պիտի բերեմ, եւ մարդն ու անասունը քու մէջէդ պիտի բնաջնջեմ։

Եգիպտոսի երկիրը ամայի եւ աւերակ պիտի ըլլայ, ու պիտի գիտնան թէ ե՛ս եմ Տէրը. որովհետեւ ան ըսաւ. “Գետը իմս է, զայն ե՛ս կերտեցի”։

Հետեւաբար ահա՛ ես քեզի եւ գետերուդ դէմ եմ, ու Եգիպտոսի երկիրը աւերակ, անապատ եւ ամայի պիտի դարձնեմ՝ Մագդողէն մինչեւ Սուհէն ու մինչեւ Եթովպիայի սահմանը։

Անկէ մարդու ոտք պիտի չանցնի. անկէ անասունի ոտք ալ պիտի չանցնի, ու քառասուն տարի պիտի չբնակուի։

Եգիպտոսի երկիրը ամայացած երկիրներուն մէջ ամայի պիտի դարձնեմ, եւ անոր քաղաքները աւերուած քաղաքներուն մէջ քառասուն տարի ամայի պիտի ըլլան. Եգիպտացիները ազգերուն մէջ պիտի ցրուեմ, ու զանոնք երկիրներուն մէջ պիտի սփռեմ»։

Սակայն Տէրը՝ Եհովան սա՛ կը յայտարարէ. «Քառասուն տարուան վախճանին, Եգիպտացիները պիտի հաւաքեմ այն ազգերէն՝ որոնց մէջ ցրուեցան,

ու Եգիպտացիները գերութենէն պիտի վերադարձնեմ։ Զանոնք Պաթուրէսի երկիրը՝ իրենց ⁴հայրենի երկիրը պիտի վերադարձնեմ, եւ հոն նուաստ թագաւորութիւն մը պիտի ըլլան։

Ան թագաւորութիւններուն ամենէն նուաստը պիտի ըլլայ, եւ անգա՛մ մըն ալ ազգերուն վրայ պիտի ⁵չհպարտանայ. արդարեւ զանոնք պիտի պակսեցնեմ՝ որպէսզի ազգերուն վրայ չտիրապետեն։

⁶Անոնք անգա՛մ մըն ալ Իսրայէլի տան ապահովութիւն պիտի չըլլան, իր անօրէնութիւնը յիշեցնելով՝ երբ օգնութեան համար անոնց կը նայէր. ու պիտի գիտնան թէ ե՛ս եմ Տէրը՝ Եհովան»։

ԲԱԲԵԼՈՆԻ ԹԱԳԱՒՈՐԸ ՊԻՏԻ ՏԻՐԷ ԵԳԻՊՏՈՍԻ

Քսանեօթներորդ տարին, առաջին ամսուան առաջին օրը, ⁷Տէրը խօսեցաւ՝՝ ինծի՝ ըսելով.

«Մարդո՛ւ որդի, Բաբելոնի Նաբուգոդոնոսոր թագաւորը իր զօրագունդին ⁸ծանր գործ կատարել տուաւ՝՝ Տիւրոսի դէմ։ Ամէն գլուխ կնտակ եղաւ ու ամէն ուս սկրթուեցաւ. սակայն իրեն եւ իր զօրագունդին համար ո՛չ մէկ վարձք ⁹ստացաւ Տիւրոսէն, այն գործին համար՝ որ անոր դէմ կատարեց»։

Հետեւաբար Տէրը՝ Եհովան սա՛ կը յայտարարէ. «Ահա՛ ես Եգիպտոսի երկիրը Բաբելոնի Նաբուգոդոնոսոր թագաւորին պիտի տամ. անոր մթերքը պիտի փոխադրէ, անոր աւարը պիտի յափշտակէ, ու ¹⁰զայն պիտի կողոպտէ՝՝. ասիկա պիտի ըլլայ իր զօրագունդին վարձքը։

Եգիպտոսի երկիրը իրեն տուի ¹¹Տիւրոսի դէմ ¹²կատարած գործին համար, որովհետեւ ինծի համար աշխատեցան,— կը պատգամէ Տէրը՝ Եհովան։—

Այդ օրը Իսրայէլի տան եղջիւրը պիտի բուսցնեմ, եւ անոնց մէջ քու բերանդ պիտի բանամ. ու պիտի գիտնան թէ ե՛ս եմ Տէրը»։