Ezekiel 30

Lamentations  «  Ezekiel 29  ‹  Ezekiel 30  ›  Ezekiel 31  »  Daniel

ՏԷՐԸ ՊԻՏԻ ՊԱՏԺԷ ԵԳԻՊՏՈՍԸ

Դարձեալ ¹Տէրը խօսեցաւ՝՝ ինծի՝ ըսելով.

«Մարդո՛ւ որդի, մարգարէացի՛ր եւ ըսէ՛. “Տէրը՝ Եհովան սա՛ կը յայտարարէ. "Գոռացէ՛ք. «Աւա՜ղ, ցաւալի օր»։

Արդարեւ օրը մօտ է, Տէրոջ օրը մօտ է, ամպոտ օր մը. ²ազգերուն աւերումի ժամանակը պիտի ըլլայ։

Եգիպտոսի վրայ սուր պիտի գայ, ու Եթովպիայի մէջ անձկութիւն պիտի ըլլայ, երբ Եգիպտոսի մէջ խոցուածներ իյնան, անոր մթերքը գրաւեն, եւ անոր հիմերը քանդեն։

Եթովպիացիները, ³Փութացիները, Ղուդացիները, բոլոր ⁴Արաբներն ու ⁵Քուբացիները եւ դաշնակից երկրին որդիները անոնց հետ սուրով պիտի իյնան”»։

Տէրը սա՛ կը յայտարարէ. “Եգիպտոսի նեցուկ եղողներն ալ պիտի իյնան, ու անոր զօրութեան ամբարտաւանութիւնը պիտի ⁶խորտակուի. սուրով պիտի իյնան անոր մէջ՝ Մագդողէն մինչեւ Սուհէն,— կը պատգամէ Տէրը՝ Եհովան։—

Ամայացած երկիրներուն մէջ ամայի պիտի ըլլան, եւ անոր քաղաքները աւերուած քաղաքներուն մէջ պիտի ըլլան։

Երբ Եգիպտոսի մէջ կրակ ⁷ձգեմ, ու անոր բոլոր օգնականները ջախջախուին, պիտի գիտնան թէ ե՛ս եմ Տէրը։

Այդ օրը իմ առջեւէս նաւերով պատգամաւորներ դուրս պիտի ելլեն, որպէսզի ապահովութեան մէջ եղող Եթովպիացիները դողացնեն. անոնց մէջ անձկութիւն պիտի ըլլայ՝ Եգիպտոսի օրուան պէս, որովհետեւ ահա՛ ան կու գայ"”»։

Տէրը՝ Եհովան սա՛ կը յայտարարէ. «Եգիպտոսի դղրդիւնն ալ պիտի դադրեցնեմ Բաբելոնի Նաբուգոդոնոսոր թագաւորին ձեռքով։

Ինք եւ իրեն հետ իր ժողովուրդը — ազգերուն ամենէն բռնակալները — երկիրը կործանելու պիտի ⁸գան։ Անոնք իրենց սուրերը Եգիպտոսի դէմ պիտի քաշեն, ու երկիրը խոցուածներով պիտի լեցնեն։

Ես ալ գետերը պիտի ցամքեցնեմ, երկիրը չարերուն ձեռքը պիտի ⁹մատնեմ, եւ օտարներուն ձեռքով պիտի ամայացնեմ երկիրն ու ¹⁰ամէն ինչ որ անոր մէջ է՝՝. ես՝ Տէրս խօսեցայ»։

Տէրը՝ Եհովան սա՛ կը յայտարարէ. «¹¹Կուռքերն ալ պիտի բնաջնջեմ, եւ Մեմփիսէ պիտի ¹²ոչնչացնեմ չաստուածները։ Անգա՛մ մըն ալ Եգիպտոսի երկրին մէջ իշխան պիտի չըլլայ, ու Եգիպտոսի երկրին մէջ վախ պիտի դնեմ։

Պաթուրէսը պիտի ամայացնեմ, Տայանիսի մէջ կրակ պիտի ձգեմ, եւ Նովի մէջ դատավճիռներ պիտի կիրարկեմ։

Եգիպտոսի ամրոցը եղող Սինի վրայ իմ ցասումս պիտի թափեմ, ու Նովի բազմութիւնը պիտի կոտորեմ։

Եգիպտոսի մէջ կրակ պիտի ձգեմ. Սին ¹³սաստիկ պիտի տանջուի՝՝. Նովի պարիսպը պիտի ճեղքուի. ¹⁴Մեմփիս ցերեկ ատեն պիտի գրաւուի թշնամիներէն՝՝։

Արեգ քաղաքին եւ Փուբաստի երիտասարդները սուրով պիտի իյնան. անոնց բնակիչները գերութեան պիտի երթան։

Նաեւ Տափնասի մէջ ցերեկը պիտի խաւարի, երբ հոն կոտրեմ Եգիպտոսի լուծերը, ու ¹⁵ոչնչանայ անոր զօրութեան ամբարտաւանութիւնը. ամպը պիտի ծածկէ զայն, եւ անոր ¹⁶աղջիկները գերութեան պիտի երթան։

Այսպէս Եգիպտոսի մէջ դատավճիռներ պիտի կիրարկեմ, ու պիտի գիտնան թէ ե՛ս եմ Տէրը»։

ԵԳԻՊՏՈՍԻ ԹԱԳԱՒՈՐԻՆ ԿՈՏՐԱԾ ՈՅԺԸ

Տասնմէկերորդ տարին, առաջին ամիսը, ամսուան եօթնին, ¹⁷Տէրը խօսեցաւ՝՝ ինծի՝ ըսելով.

«Մարդո՛ւ որդի, Եգիպտոսի Փարաւոն թագաւորին բազուկը կոտրեցի, եւ ահա՛ ան պիտի չդարմանուի. դեղ պիտի ¹⁸չտրուի, վիրակապ պիտի չդրուի՝ որպէսզի ան փաթթուելով զօրանայ ու սուր բռնէ։

Հետեւաբար Տէրը՝ Եհովան սա՛ կը յայտարարէ. “Ահա՛ ես Եգիպտոսի Փարաւոն թագաւորին դէմ եմ, եւ անոր բազուկները պիտի կոտրեմ, թէ՛ ուժեղը եւ թէ կոտրածը, ու սուրը անոր ձեռքէն վար ձգել պիտի տամ։

Եգիպտացիները ազգերուն մէջ պիտի ցրուեմ, եւ զանոնք երկիրներուն մէջ պիտի սփռեմ։

Բաբելոնի թագաւորին բազուկները պիտի ուժովցնեմ, ու սուրս անոր ձեռքը պիտի տամ. իսկ Փարաւոնի բազուկները պիտի կոտրեմ, եւ ինք անոր առջեւ մահամերձ վիրաւորուածի մը հեծեծանքով պիտի ¹⁹հառաչէ։

Այսպէս՝ Բաբելոնի թագաւորին բազուկները պիտի ուժովցնեմ, իսկ Փարաւոնի բազուկները պիտի իյնան։ Երբ իմ սուրս Բաբելոնի թագաւորին ձեռքը տամ, ան ալ զայն Եգիպտոսի երկրին վրայ երկարէ, պիտի գիտնան թէ ե՛ս եմ Տէրը։

Եգիպտացիները ազգերուն մէջ պիտի ցրուեմ, զանոնք երկիրներուն մէջ պիտի սփռեմ, ու պիտի գիտնան թէ ե՛ս եմ Տէրը”»։