Ezekiel 32

Lamentations  «  Ezekiel 31  ‹  Ezekiel 32  ›  Ezekiel 33  »  Daniel

ԵԳԻՊՏՈՍԻ ԹԱԳԱՒՈՐԸ ԿԸ ԲԱՂԴԱՏՈՒԻ ԿՈԿՈՐԴԻԼՈՍԻ ՀԵՏ

Տասներկրորդ տարին, տասներկրորդ ամիսը, ամսուան առաջին օրը, ¹Տէրը խօսեցաւ՝՝ ինծի՝ ըսելով.

«Մարդո՛ւ որդի, ո՛ղբ բարձրացուր Եգիպտոսի Փարաւոն թագաւորին վրայ, եւ ըսէ՛ անոր. “Դուն ազգերուն մէջ առիւծի կորիւնի կը նմանիս, Ու ծովերուն մէջ վիշապի պէս ես. Գետերուդ վրայ կը խոյանաս, Ոտքերովդ ջուրերը կը պղտորես, Եւ անոնց գետերը կ’աղտոտես”։

Տէրը՝ Եհովան սա՛ կը յայտարարէ. “Ես շատ ազգերու համախմբումով Իմ ցանցս քու վրադ պիտի տարածեմ, Ու քեզ իմ ուռկանովս պիտի բարձրացնեն։

Քեզ գետինը պիտի նետեմ, Քեզ ²բաց դաշտի վրայ՝՝ պիտի ձգեմ, Քու վրադ երկինքի բոլոր թռչունները պիտի բնակեցնեմ, Եւ ամբողջ երկրի գազանները քեզմով պիտի կշտացնեմ.

Քու մարմինդ լեռներուն վրայ պիտի դնեմ, Ու բեկորներովդ ձորերը պիտի լեցնեմ։

Քու արիւնովդ պիտի ³ոռոգեմ Երկիրը՝ ուր դուն կը լողաս, մինչեւ լեռները, Ու ձորերը քեզմով պիտի լեցուին։

Երբ քու լոյսդ մարեմ, երկինքը պիտի ծածկեմ Եւ անոր աստղերը պիտի մթագնեմ, Արեւը ամպով պիտի ծածկեմ Ու լուսինը իր լոյսը պիտի չտայ։

Քու վերեւդ՝ երկինքի բոլոր լուսաւորները պիտի մթագնեմ, Ու երկրիդ վրայ խաւարը պիտի տիրէ,— Կը պատգամէ Տէրը՝ Եհովան։—

Երբ քու փլուզումիդ լուրը Ազգերուն եւ քեզի անծանօթ երկիրներու հասցնեմ, Շատ ժողովուրդներու սիրտը պիտի ⁴վշտացնեմ։

Քու պատճառովդ շատ ժողովուրդներ պիտի ապշեցնեմ, Քու պատճառովդ անոնց թագաւորները չափազանց պիտի սահմռկին, Երբ իմ սուրս ⁵ճօճեմ անոնց երեսին առջեւ. Քու անկումիդ օրը՝ Իւրաքանչիւրը իր կեանքին համար ամէն վայրկեան պիտի ⁶սարսափի”։

Արդարեւ Տէրը՝ Եհովան սա՛ կը յայտարարէ. “Բաբելոնի թագաւորին սուրը քու վրադ պիտի գայ։

Զօրաւորներուն սուրերով քու բազմութիւնդ պիտի տապալեմ. Անոնք բոլորը ազգերուն ամենէն բռնակալներն են։ Եգիպտոսի ամբարտաւանութիւնը պիտի կործանեն, Եւ անոր ամբողջ բազմութիւնը պիտի բնաջնջուի։

Անոր բոլոր անասուններն ալ պիտի բնաջնջեմ Յորդառատ ջուրերու քովէն. Անգա՛մ մըն ալ մարդուն ոտքը զանոնք պիտի չխռովէ, Ո՛չ ալ անասուններուն կճղակները զանոնք պիտի պղտորեն։

Այն ատեն անոնց ջուրերը պիտի ⁷ցածցնեմ, Եւ անոնց գետերը իւղի պէս պիտի ⁸հոսեցնեմ,— Կը պատգամէ Տէրը՝ Եհովան։—

Երբ Եգիպտոսի երկիրը ամայի դարձնեմ, Ու երկիրը իր լիութենէն ⁹պարպուի, Երբ անոր բոլոր բնակիչները զարնեմ, Պիտի գիտնան թէ ե՛ս եմ Տէրը։

Ա՛յս է ողբը՝ որ պիտի ¹⁰բարձրացնեն. Ազգերուն աղջիկները զայն պիտի բարձրացնեն. Եգիպտոսի վրայ եւ անոր ամբողջ բազմութեան վրայ զայն պիտի բարձրացնեն”, Կը պատգամէ Տէրը՝ Եհովան»։

ՄԱՀՈՒԱՆ ԱՇԽԱՐՀԸ

Տասներկրորդ տարին, առաջին ամսուան տասնհինգին, ¹¹Տէրը խօսեցաւ՝՝ ինծի՝ ըսելով.

«Մարդո՛ւ որդի, սգա՛ Եգիպտոսի բազմութեան վրայ. Զայն ու երեւելի ազգերուն աղջիկները Իջեցո՛ւր երկրի ստորին մասերը՝ գուբը իջնողներուն հետ։

“Դուն որմէ՞ աւելի հաճոյալի ես. Իջի՛ր եւ պառկէ՛ անթլփատներուն հետ”։

Անոնք սուրով խոցուածներուն մէջ պիտի իյնան. Ան սուրի մատնուեցաւ. Քաշկռտեցէ՛ք զայն եւ անոր ամբողջ բազմութիւնը։

¹²Դժոխքին մէջէն՝ զօրաւոր հերոսները Անոր պիտի խօսին իրեն օգնողներուն հետ. Սուրով խոցուած անթլփատները հոն իջած կը պառկին։

Ասուր հոն է՝ իր ամբողջ համախմբումով. ¹³Անոնց գերեզմանները իր շուրջն են. Բոլորը խոցուած են՝ սուրով ինկած։

Անոնց գերեզմանները գուբին ¹⁴խորերը դրուած են. Անոր համախմբումը իր գերեզմանին շուրջն է. Բոլորը խոցուած են՝ սուրով ինկած, Իրենք՝ որ ապրողներու երկրին մէջ երկիւղ կը պատճառէին։

Եղամ հոն է՝ իր ամբողջ բազմութեամբ, Անոր գերեզմանին շուրջը. Բոլորը խոցուած են՝ սուրով ինկած, Եւ անթլփատ իջան երկրի ստորին մասերը։ Անոնք որ ապրողներու երկրին իրենց երկիւղը կը պատճառէին, Գուբը իջնողներուն հետ իրենց նախատինքը կը կրեն։

Խոցուածներուն մէջ անկողին պատրաստեցին անոր եւ իր ամբողջ բազմութեան. Անոնց գերեզմանները իր շուրջն են. Բոլորը սուրով խոցուած անթլփատներ են։ Թէպէտ անոնք ապրողներու երկրին մէջ իրենց երկիւղը կը պատճառէին, Գուբը իջնողներուն հետ իրենց նախատինքը կը կրեն. Անոնք խոցուածներուն մէջ դրուած են։

Մոսոք, Թոբէլ եւ իրենց ամբողջ բազմութիւնը հոն են. Անոնց գերեզմանները իրենց շուրջն են։ Բոլորը սուրով խոցուած անթլփատներ են, Թէպէտ անոնք ապրողներու երկրին մէջ իրենց երկիւղը կը պատճառէին։

Անոնք անթլփատներէն ինկող զօրաւորներուն հետ պիտի չպառկին, Որոնք իրենց պատերազմական զէնքերով դժոխք իջան, Եւ իրենց սուրերը իրենց գլուխին տակ դրին. Անոնց անօրէնութիւնները իրենց ոսկորներուն վրայ պիտի ըլլան, Թէեւ անոնք ապրողներու երկրին մէջ զօրաւորներուն երկիւղն էին։

Դո՛ւն ալ անթլփատներուն մէջ պիտի ջախջախուիս, Ու սուրով խոցուածներուն հետ պիտի պառկիս։

Եդովմ հոն է՝ իր թագաւորներով եւ բոլոր իշխաններով, Որոնք՝ հակառակ իրենց զօրութեան՝ սուրով խոցուածներուն հետ դրուած են. Անոնք անթլփատներուն հետ, Գուբը իջնողներուն հետ կը պառկին։

Հիւսիսի բոլոր ¹⁵իշխանները հոն են, նաեւ բոլոր Սիդոնացիները՝ Որոնք խոցուածներուն հետ իջան։ Անոնք իրենց զօրութեան ¹⁶պատճառած երկիւղէն՝՝ կ’ամչնան. Սուրով խոցուածներուն հետ անթլփատ կը պառկին, Ու գուբը իջնողներուն հետ իրենց նախատինքը կը կրեն։

Փարաւոն զանոնք պիտի տեսնէ, Եւ իր ամբողջ բազմութեան մասին պիտի մխիթարուի. Փարաւոն եւ իր բոլոր զօրագունդերը սուրով պիտի խոցուին,— Կը պատգամէ Տէրը՝ Եհովան։—

¹⁷Արդարեւ ապրողներու երկրին մէջ իմ երկիւղս դրի, Եւ՝՝ ան անթլփատներուն մէջ՝ սուրով խոցուածներուն հետ պիտի պառկի, Այսինքն՝ Փարաւոն, եւ իր ամբողջ բազմութիւնը», Կը պատգամէ Տէրը՝ Եհովան։