Ezekiel 35

Lamentations  «  Ezekiel 34  ‹  Ezekiel 35  ›  Ezekiel 36  »  Daniel

ԱՍՏՈՒԾՈՅ ՊԱՏԻԺԸ ԵԴՈՎՄԻ

Դարձեալ ¹Տէրը խօսեցաւ՝՝ ինծի՝ ըսելով.

«Մարդո՛ւ որդի, ²ուղղէ՛ երեսդ դէպի Սէիրի լեռը, ու մարգարէացի՛ր անոր դէմ։

Ըսէ՛ անոր. “Տէրը՝ Եհովան սա՛ կը յայտարարէ. "Ահա՛ ես քեզի դէմ եմ, ո՛վ Սէիրի լեռ. իմ ձեռքս քու վրադ պիտի երկարեմ ու քեզ բոլորովին ամայի պիտի դարձնեմ։

Քու քաղաքներդ պիտի աւերեմ, դուն ամայի պիտի ըլլաս, եւ պիտի գիտնաս թէ ե՛ս եմ Տէրը"”։

«Քանի դուն յաւիտենական թշնամութիւն ունեցար, եւ Իսրայէլի որդիներուն արիւնը սուրի ձեռքով թափեցիր իրենց ձախորդութեան ժամանակը — անօրէնութեան վախճանին ժամանակը —,

ես կ’ապրի՛մ,— կը պատգամէ Տէրը՝ Եհովան,— քեզ արիւնի ³մէջ պիտի դնեմ՝՝, եւ արիւնը քեզ պիտի հետապնդէ. քանի արիւնը չատեցիր, արի՛ւնը քեզ պիտի հետապնդէ։

Սէիրի լեռը ⁴բոլորովին ամայի պիտի դարձնեմ, եւ անկէ անցնողն ու վերադարձողը պիտի բնաջնջեմ։

Անոր լեռները իր խոցուածներով պիտի լեցնեմ. քու բլուրներուդ վրայ, քու հովիտներուդ մէջ ու բոլոր ձորերուդ մէջ սուրով խոցուածներ պիտի իյնան։

Քեզ յաւիտենապէս ամայի պիտի դարձնեմ. քու քաղաքներդ պիտի ⁵չվերականգնին, եւ պիտի գիտնաք թէ ե՛ս եմ Տէրը»։

«Քանի դուն ըսիր. “Այս երկու ազգերն ու այս երկու երկիրները իմս պիտի ըլլան, եւ անոնց պիտի տիրանանք”, (թէպէտ Տէրը հոն էր,)

ես կ’ապրի՛մ,— կը պատգամէ Տէրը՝ Եհովան,— քու ատելութեամբդ անոնց դէմ կիրարկուած բարկութեանդ ու նախանձիդ համեմատ պիտի վարուիմ, եւ զիս անոնց պիտի ճանչցնեմ երբ քեզ դատեմ։

Պիտի գիտնաս թէ ես՝ Տէրս լսեցի քու բոլոր ⁶հայհոյութիւններդ, որ Իսրայէլի լեռներուն դէմ արտաբերեցիր՝ ըսելով. “Անոնք աւերուեցան, անոնք մեզի տրուեցան իբր կերակուր”։

Ձեր բերանով ինծի դէմ ⁷հպարտացաք, ու ձեր խօսքերը ինծի դէմ շատցուցիք. ես զանոնք լսեցի»։

Տէրը՝ Եհովան սա՛ կը յայտարարէ. «Երբ ամբողջ երկիրը ուրախանայ, քեզ պիտի ամայացնեմ։

Ինչպէս դուն Իսրայէլի տան ժառանգութեան համար ուրախացար՝ երբ ամայացաւ, այնպէս ալ քեզի հետ պիտի վարուիմ։ Դո՛ւն, ո՛վ Սէիրի լեռ, եւ ամբողջ Եդովմ, բոլորովին պիտի ⁸ամայանաք, ու պիտի գիտնաք՝՝ թէ ե՛ս եմ Տէրը»։