Ezekiel 37

Lamentations  «  Ezekiel 36  ‹  Ezekiel 37  ›  Ezekiel 38  »  Daniel

ՉՈՐՑԱԾ ՈՍԿՈՐՆԵՐՈՒՆ ՀՈՎԻՏԸ

Տէրոջ ձեռքը իմ վրաս եղաւ, եւ ¹Տէրը զիս Հոգիով՝՝ դուրս հանեց ու ²դաշտին մէջ դրաւ. ան ոսկորներով լեցուն էր։

Զիս անոնց քովէն անցուց՝ ամէն կողմէ, եւ ահա՛ անոնք դաշտին մակերեսին վրայ չափազանց շատ էին, ³նաեւ յոյժ չորցած։

Ապա ինծի ըսաւ. «Մարդո՛ւ որդի, այս ոսկորները կրնա՞ն վերապրիլ»։ Պատասխանեցի. «Ո՛վ Տէր Եհովա, դո՛ւն գիտես»։

Ինծի ըսաւ. «Մարգարէացի՛ր այս ոսկորներուն մասին եւ ըսէ՛ անոնց. “Ո՛վ չորցած ոսկորներ, մտի՛կ ըրէք Տէրոջ խօսքը։

Տէրը՝ Եհովան սա՛ կը յայտարարէ այս ոսկորներուն. "Ահա՛ ես ձեր մէջ շունչ պիտի մտցնեմ, ու պիտի վերապրիք։

Ջիղեր պիտի դնեմ ձեր վրայ, միս պիտի աճեցնեմ ձեր վրայ, մորթով պիտի ծածկեմ ձեզ, շունչ պիտի դնեմ ձեր մէջ, եւ պիտի վերապրիք։ Այն ատեն պիտի գիտնաք թէ ե՛ս եմ Տէրը"”»։

Ես մարգարէացայ՝ ինչպէս ինծի հրամայուեցաւ։ Մինչ կը մարգարէանայի՝ աղմուկ մը ⁴լսուեցաւ, եւ ահա՛ շարժում մը եղաւ, ու ոսկորները իրարու մօտեցան՝ ոսկորը իր համապատասխան ոսկորին։

Տեսայ թէ ահա՛ ջիղեր ու միս աճեցան անոնց վրայ, մորթը վրայէն ծածկեց զանոնք, բայց անոնց մէջ շունչ չկար։

Այն ատեն ինծի ըսաւ. «Մարգարէացի՛ր շունչին։ Մարգարէացի՛ր, մարդո՛ւ որդի, եւ ըսէ՛ շունչին. “Տէրը՝ Եհովան սա՛ կը յայտարարէ. "Ո՛վ շունչ, եկո՛ւր չորս հովերէն եւ փչէ՛ այս ⁵մեռցուածներուն վրայ, որպէսզի վերապրին"”»։

Ես ալ մարգարէացայ՝ ինչպէս ինծի հրամայեց, շունչը անոնց մէջ մտաւ, ու վերապրեցան. իրենց ոտքերուն վրայ կայնեցան, եւ չափազանց մեծ զօրագունդ մը կազմոււեցաւ։

Ինծի ըսաւ. «Մարդո՛ւ որդի այս ոսկորները ամբողջ Իսրայէլի տունն են։ Ահա՛ անոնք կ’ըսեն. “Մեր ոսկորները չորցան ու մեր յոյսը ⁶կտրեցաւ. մենք ⁷կորսուած ենք՝՝”։

Ուստի մարգարէացի՛ր՛ եւ ըսէ՛ անոնց. “Տէրը՝ Եհովան սա՛ կը յայտարարէ. "Ահա՛ ես ձեր գերեզմանները պիտի բանամ ու ձեզ պիտի բարձրացնեմ ձեր գերեզմաններէն, ո՛վ իմ ժողովուրդս, եւ ձեզ Իսրայէլի ⁸երկիրը պիտի բերեմ։

Երբ ձեր գերեզմանները բանամ ու ձեզ բարձրացնեմ ձեր գերեզմաններէն, ո՛վ իմ ժողովուրդս, պիտի գիտնաք թէ ե՛ս եմ Տէրը։

Իմ Հոգիս ձեր ներսը պիտի դնեմ, եւ պիտի վերապրիք. ձեր երկրին մէջ ձեզ պիտի տեղաւորեմ, ու պիտի գիտնաք թէ ⁹ես՝ Տէրս խօսեցայ եւ իրագործեցի՝՝", կը պատգամէ Տէրը՝ Եհովան”»։

ՅՈՒԴԱ ԵՒ ԻՍՐԱՅԷԼ՝ ՄԷԿ ԹԱԳԱՒՈՐՈՒԹԵԱՆ ՄԷՋ

¹⁰Տէրը խօսեցաւ՝՝ ինծի՝ ըսելով.

«Դո՛ւն, մարդո՛ւ որդի, քեզի փա՛յտ մը առ ու գրէ՛ անոր վրայ. “Յուդայի համար, եւ անոր ընկերակիցներուն՝ Իսրայէլի որդիներուն համար”։ Յետոյ ուրի՛շ փայտ մը առ, ու գրէ՛ անոր վրայ. “Յովսէփի համար, Եփրեմի եւ անոր ընկերակիցներուն՝ ամբողջ Իսրայէլի տան փայտը”։

Զանոնք մօտեցո՛ւր իրարու, որպէսզի մէկ փայտ ըլլան ու ձեռքիդ մէջ միանան։

Երբ ժողովուրդիդ որդիները քեզի խօսին եւ ըսեն. “Մեզի չե՞ս բացատրեր թէ ասոնք քեզի ի՞նչ կը նշանակեն”,

անոնց պատասխանէ՛. “Տէրը՝ Եհովան սա՛ կը յայտարարէ. "Ահա՛ ես պիտի առնեմ Յովսէփի փայտը՝ որ Եփրեմի ձեռքն է, նաեւ անոր ընկերակիցները՝ Իսրայէլի տոհմերը, ու զանոնք անոր հետ պիտի դնեմ, այսինքն՝ Յուդայի փայտին հետ. զանոնք մէկ փայտ պիտի ընեմ, եւ իմ ձեռքիս մէջ մէկ պիտի ըլլան"”։

Այն փայտերը՝ որոնց վրայ պիտի գրես, քու ձեռքիդ մէջ թող ըլլան՝ անոնց աչքերուն առջեւ։

Անոնց ըսէ՛. “Տէրը՝ Եհովան սա՛ կը յայտարարէ. "Ահա՛ ես Իսրայէլի որդիները պիտի առնեմ այն ¹¹ազգերուն մէջէն՝ ուր գացին, զանոնք ամէն կողմէ պիտի հաւաքեմ եւ իրենց ¹²երկիրը բերեմ։

Զանոնք մէկ ազգ պիտի ընեմ երկրին մէջ՝ Իսրայէլի լեռներուն վրայ, եւ անոնց բոլորին վրայ մէկ թագաւոր պիտի թագաւորէ. անգա՛մ մըն ալ երկու ազգ պիտի չըլլան, անգա՛մ մըն ալ երկու թագաւորութեան պիտի չբաժնուին։

Անգա՛մ մըն ալ անմաքուր պիտի չըլլան իրենց չաստուածներով ու պղծութիւններով, ո՛չ ալ իրենց բոլոր յանցանքներով։ Ես զանոնք պիտի ազատեմ իրենց բոլոր ¹³բնակութիւններէն՝ որոնց մէջ իրենք մեղանչեցին. զանոնք պիտի մաքրեմ, եւ անոնք իմ ժողովուրդս պիտի ըլլան, ես ալ անոնց Աստուածը պիտի ըլլամ։

Իմ ծառաս՝ Դաւիթ իրենց վրայ թագաւոր պիտի ըլլայ, ու բոլորը մէ՛կ հովիւ պիտի ունենան. իրենք իմ կանոններուս համաձայն պիտի ընթանան, իմ հրամաններս պիտի պահեն ու զանոնք գործադրեն։

Պիտի բնակին այն երկիրը՝ որ իմ Յակոբ ծառայիս տուի, որուն մէջ ձեր հայրերը բնակեցան. իրենք, իրենց որդիները եւ իրենց որդիներուն որդիները յաւիտեան հոն պիտի բնակին, ու իմ ծառաս՝ Դաւիթ յաւիտեան անոնց իշխանը պիտի ըլլայ։

Անոնց հետ խաղաղութեան ուխտ պիտի կնքեմ, որ անոնց յաւիտենական ուխտ պիտի ըլլայ։ Զանոնք պիտի ¹⁴հաստատեմ ու բազմացնեմ, եւ իմ սրբարանս անոնց մէջ պիտի դնեմ յաւիտեան։

Իմ ¹⁵բնակարանս անոնց քով պիտի ըլլայ. ես անոնց Աստուածը պիտի ըլլամ, անոնք ալ իմ ժողովուրդս պիտի ըլլան։

Երբ իմ սրբարանս յաւիտեան անոնց մէջ ըլլայ, ազգերը պիտի գիտնան թէ ե՛ս եմ Տէրը՝ որ Իսրայէլը կը սրբացնէ"”»։