Ezekiel 38

Lamentations  «  Ezekiel 37  ‹  Ezekiel 38  ›  Ezekiel 39  »  Daniel

ԳՈԳԸ ՈՐՊԷՍ ԱՍՏՈՒԾՈՅ ԳՈՐԾԻՔ

Դարձեալ ¹Տէրը խօսեցաւ՝՝ ինծի՝ ըսելով.

«Մարդո՛ւ որդի, ²ուղղէ՛ երեսդ Մագոգի երկիրը եղող Ռովսի, Մոսոքի ու Թոբէլի գլխաւոր իշխանին՝ Գոգի, մարգարէացի՛ր անոր դէմ,

եւ ըսէ՛. “Տէրը՝ Եհովան սա՛ կը յայտարարէ. "Ահա՛ ես քեզի դէմ եմ, ո՛վ Գոգ, Ռովսի, Մոսոքի ու Թոբէլի գլխաւոր իշխան։

Քեզ պիտի քաշեմ, քու ծնօտիդ կեռեր պիտի անցընեմ, ու դուրս պիտի հանեմ քեզ եւ ամբողջ զօրագունդդ.— ձիերն ու ձիաւորները, բոլորն ալ կատարելապէս ³զրահաւորուած, ասպարաւորներուն ու վահանաւորներուն մեծ համախմբումը՝ բոլորն ալ սուր բռնող,

եւ անոնց հետ՝ Պարսիկները, Եթովպիացիներն ու ⁴Փութացիները, բոլորն ալ վահանաւոր եւ սաղաւարտաւոր,

նաեւ Գոմեր՝ իր բոլոր գումարտակներով, Թորգոմայի տունը՝ հիւսիսի ⁵ծայրերէն, եւ անոր բոլոր գումարտակները. շատ ժողովուրդներ քեզի հետ պիտի ըլլան"”։

«Պատրա՛ստ եղիր, քեզ ու քովդ հաւաքուած ամբողջ համախմբումը պատրաստէ՛, եւ դուն անոնց պահապա՛ն եղիր։

Շատ օրերէն ետք քու զօրքերդ ⁶պիտի թուարկես՝՝, ու տարիներու վախճանին պիտի գաս այն երկիրը՝ որ սուրէն ⁷ազատուած է, այն ազգին՝ որ շատ ժողովուրդներէն հաւաքուած է Իսրայէլի լեռներուն վրայ — որոնք մշտատեւ աւերակ եղած էին. ան ժողովուրդներէն ⁸բերուած ըլլալով՝ բոլորն ալ ապահովութեամբ պիտի բնակին։

Իսկ դուն պիտի բարձրանաս, մրրիկի պէս գաս, ու երկիրը ծածկելու համար ամպի պէս պիտի ըլլաս, դուն եւ բոլոր գումարտակներդ, ու շատ ժողովուրդներ քեզի հետ»։

«Տէրը՝ Եհովան սա՛ կը յայտարարէ. “Այդ օրը ⁹մտածումներ պիտի ունենաս՝՝, չար ¹⁰ծրագիր մը պիտի պատրաստես՝՝

ու պիտի ըսես. "Անպարիսպ քաղաքներու երկիրը բարձրանամ, հանդարտութեան մէջ եղողներուն, ապահովութեամբ բնակողներուն վրայ հասնիմ. անոնք բոլորը անպարիսպ տեղեր կը բնակին, ուր ո՛չ նիգեր կան, ո՛չ դռներ",

որպէսզի աւար յափշտակես եւ կողոպուտ գրաւես, ու ձեռքդ ¹¹դնես ¹²վերաբնակուած աւերակներուն վրայ, ազգերէն հաւաքուած ժողովուրդին վրայ, որ խաշինք եւ ինչք ստացած է ու երկրին ¹³բարձր տեղերը՝՝ կը բնակի։

Սաբա ու Դեդան, եւ Թարսիսի վաճառականներն ու անոր բոլոր առիւծի կորիւնները քեզի պիտի ըսեն. "Միթէ աւար յափշտակելո՞ւ եկար. կողոպուտ գրաւելո՞ւ համար քու համախմբումդ հաւաքեցիր, որպէսզի արծաթ ու ոսկի փոխադրես, խաշինք եւ ինչք գրաւես, մեծ աւար տանիս"”։

«Հետեւաբար մարգարէացի՛ր, մարդո՛ւ որդի, ու Գոգի ըսէ՛. “Տէրը՝ Եհովան սա՛ կը յայտարարէ. "Այն օրը, երբ իմ ժողովուրդս՝ Իսրայէլ ապահովութեամբ բնակի, ահա՛ դուն պիտի գիտնաս,

եւ քու տեղէդ՝ հիւսիսի ծայրերէն պիտի գաս, դուն ու քեզի հետ շատ ժողովուրդներ — բոլորը ձիեր հեծած, մեծ համախմբումով եւ շատ զօրագունդերով։

Իմ ժողովուրդիս՝ Իսրայէլի դէմ պիտի բարձրանաս, ամպի պէս երկիրը ծածկելու համար։ Ասիկա վերջին օրերը պիտի ըլլայ, ու քեզ իմ երկրիս դէմ պիտի բերեմ, որպէսզի ¹⁴հեթանոսները զիս ճանչնան, երբ ես անոնց աչքերուն առջեւ քեզմով ¹⁵փառաւորուիմ, ո՛վ Գոգ"”»։

ԱՍՏՈՒԾՈՅ ՊԱՏԻԺԸ ԳՈԳԻ

«Տէրը՝ Եհովան սա՛ կը յայտարարէ. “Դուն ա՛ն չե՞ս, որուն մասին վաղեմի ժամանակին խօսեցայ իմ ծառաներուս՝ Իսրայէլի մարգարէներուն ¹⁶միջոցով, որոնք այդ օրերը — տարիներու ընթացքին — մարգարէացան թէ քեզ անոնց դէմ պիտի բերեմ։

Այդ օրը, Գոգի Իսրայէլի ¹⁷երկրին դէմ եկած օրը,— կը պատգամէ Տէրը՝ Եհովան,— իմ ցասումս ¹⁸դէմքս պիտի բարձրանայ։

Իմ նախանձախնդրութեամբս, իմ ցասումիս կրակով խօսեցայ թէ այդ օրը անշուշտ Իսրայէլի ¹⁹երկրին մէջ՝՝ մեծ շարժ պիտի ըլլայ.

ծովուն ձուկերը, երկինքի թռչունները, դաշտի գազանները, գետինի վրայ սողացող բոլոր սողուններն ու երկրագունդի մակերեսին վրայ եղող բոլոր մարդիկը իմ ²⁰առջեւս պիտի ²¹դողան. լեռները պիտի փլչին, ցից ժայռերը պիտի տապալին, եւ բոլոր պարիսպները գետինը պիտի իյնան։

Անոր դէմ սուրը պիտի կանչեմ իմ բոլոր լեռներուս վրայ,— կը պատգամէ Տէրը՝ Եհովան։— Իւրաքանչիւրին սուրը իր եղբօր վրայ պիտի ²²դառնայ։

Զայն ժանտախտով եւ արիւնով պիտի դատեմ. անոր վրայ, անոր զօրքերուն գումարտակներուն վրայ եւ անոր հետ եղող ժողովուրդներուն վրայ յորդահոս տեղատարափ, կարկուտի քարեր, կրակ ու ծծումբ պիտի տեղացնեմ։

Եւ շատ ազգերու ²³առջեւ պիտի մեծարուիմ, սուրբ ըլլամ ու ճանչցուիմ. անոնք պիտի գիտնան թէ ե՛ս եմ Տէրը”»։