Ezekiel 39

Lamentations  «  Ezekiel 38  ‹  Ezekiel 39  ›  Ezekiel 40  »  Daniel

ԳՈԳԻ ՊԱՐՏՈՒԹԻՒՆԸ

«Դո՛ւն, մարդո՛ւ որդի, մարգարէացի՛ր Գոգի դէմ եւ ըսէ՛. “Տէրը՝ Եհովան սա՛ կը յայտարարէ. "Ահա՛ ես քեզի դէմ եմ, ո՛վ Գոգ, Ռովսի, Մոսոքի ու Թոբէլի գլխաւոր իշխան։

Ես քեզ պիտի քաշեմ, քեզ պիտի առաջնորդեմ, հիւսիսի ¹ծայրերէն քեզ պիտի բարձրացնեմ եւ Իսրայէլի լեռներուն վրայ բերեմ։

Քու աղեղդ ձախ ձեռքէդ պիտի ²խորտակեմ, ու նետերդ աջ ձեռքէդ վար պիտի ձգեմ։

Իսրայէլի լեռներուն վրայ պիտի իյնաս, դո՛ւն, բոլոր գումարտակներդ, եւ քեզի հետ եղող ժողովուրդները։ Քեզ իբր կեր պիտի տամ գիշատիչ թռչնազգիներուն, ամէն տեսակ թեւաւորի, ու դաշտի գազաններուն։

³Բաց դաշտի մէջ՝՝ պիտի իյնաս, որովհետեւ ե՛ս խօսեցայ,— կը պատգամէ Տէրը՝ Եհովան։—

Մագոգի վրայ եւ կղզիներուն մէջ ապահովութեամբ բնակողներուն վրայ կրակ պիտի ղրկեմ, ու պիտի գիտնան թէ ե՛ս եմ Տէրը։

Իմ սուրբ անունս իմ ժողովուրդիս՝ Իսրայէլի մէջ պիտի ճանչցնեմ, եւ անգա՛մ մըն ալ պիտի չթողում որ իմ սուրբ անունս աղարտուի։ ⁴Հեթանոսները պիտի գիտնան թէ ե՛ս եմ Տէրը՝ Իսրայէլի մէջ եղող Սուրբը։

Ահա՛ կու գայ ու պիտի ⁵իրագործուի,— կը պատգամէ Տէրը՝ Եհովան.— ա՛յս է այն օրը՝ որուն մասին խօսեցայ։

Իսրայէլի քաղաքներուն բնակիչները դուրս պիտի ելլեն, կրակ պիտի վառեն եւ զէնքերը այրեն. վահաններով, ասպարներով, աղեղներով, նետերով, բիրերով ու նիզակներով եօթը տարի կրակ պիտի վառեն։

Դաշտէն փայտ պիտի չբերեն, ո՛չ ալ անտառներէն պիտի կտրեն, հապա զէնքերով կրակ պիտի վառեն։ Զիրենք թալլողները պիտի թալլեն, եւ զիրենք կողոպտողները պիտի կողոպտեն", կը պատգամէ Տէրը՝ Եհովան”»։

ԳՈԳԻ ԹԱՂՈՒՄԸ

Այդ օրը հոն՝ Իսրայէլի մէջ գերեզմանի տեղ մը պիտի տամ Գոգի.— Անցորդներու ձորը, ծովուն արեւելեան կողմը. ան անցորդներուն ճամբան պիտի գոցէ, ու հոն պիտի թաղեն Գոգը եւ անոր ամբողջ բազմութիւնը, եւ զայն “Գոգի բազմութեան ձորը” պիտի կոչեն։

Իսրայէլի ⁶որդիները եօթը ամիս զանոնք պիտի թաղեն՝ երկիրը մաքրելու համար։

Երկրին ամբողջ ժողովուրդը զանոնք պիտի թաղէ. ասիկա անոնց համբաւ մը պիտի ըլլայ այն օրը՝ երբ ես փառաւորուիմ,— կը պատգամէ Տէրը՝ Եհովան։—

Մարդիկ պիտի ⁷նշանակեն, որ շարունակ երկրին մէջ շրջագային ու երկրի մակերեսին վրայ մնացածները թաղեն անցորդներուն հետ, որպէսզի զայն մաքրեն. անոնք եօթը ամիս ետք տակաւին պիտի ⁸փնտռեն։

Անցորդները երկրին մէջէն անցնելով երբ մարդու ոսկոր տեսնեն, քովը նշանասիւն մը պիտի ⁹կանգնեցնեն, մինչեւ որ թաղողները զայն Գոգի բազմութեան ձորը թաղեն։

Քաղաքին անունն ալ ¹⁰Համոնա պիտի ըլլայ. այսպէս՝ երկիրը պիտի մաքրեն։

«Դո՛ւն, մարդո՛ւ որդի,— Տէրը՝ Եհովան սա՛ կը յայտարարէ,— ըսէ՛ թռչնազգիներուն, ամէն տեսակ թեւաւորի, եւ դաշտի բոլոր գազաններուն. “Հաւաքուեցէ՛ք ու եկէ՛ք. ամէն կողմէ ¹¹մօտեցէ՛ք ձեզի համար ¹²մատուցանած զոհիս, Իսրայէլի լեռներուն վրայ ընծայուելիք մեծ զոհին, որպէսզի միս ուտէք եւ արիւն խմէք։

Զօրաւորներուն միսը պիտի ուտէք ու երկրի իշխաններուն արիւնը խմէք՝ խոյերու, պարարտ գառներու, նոխազներու եւ զուարակներու, որոնք բոլորը Բասանի պարարտ անասուններ են։

Ձեզի համար մատուցանած զոհէս ճարպ պիտի ուտէք՝ մինչեւ որ կշտանաք, եւ արիւն պիտի խմէք՝ մինչեւ որ գինովնաք։

Իմ սեղանիս վրայ պիտի կշտանաք ձիերէն ու ¹³կառք հեծնողներէն՝՝, զօրաւորներէն եւ բոլոր պատերազմիկներէն”, կը պատգամէ Տէրը՝ Եհովան»։

ԻՍՐԱՅԷԼԻ ՎԵՐԱՀԱՍՏԱՏՈՒՄԸ

«¹⁴Ազգերուն մէջ իմ փառքս պիտի դնեմ, ու բոլոր ազգերը պիտի տեսնեն իմ կիրարկած դատավճիռներս եւ անոնց վրայ դրած ձեռքս։

Իսրայէլի տունը այդ օրէն ետք ա՛լ պիտի գիտնայ թէ ե՛ս եմ Տէրը՝ իրենց Աստուածը։

Ազգերն ալ պիտի գիտնան թէ Իսրայէլի տունը իր անօրէնութեան համար տարագրուեցաւ. արդարեւ ինծի հանդէպ ուխտազանց եղան, ես ալ իմ երեսս անոնցմէ ծածկեցի. զանոնք իրենց թշնամիներուն ձեռքը մատնեցի, ու բոլորը սուրով ինկան։

Իրենց անմաքրութեան եւ յանցանքներուն համեմատ վարուեցայ իրենց հետ, ու իմ երեսս իրենցմէ ծածկեցի”»։

«Հետեւաբար Տէրը՝ Եհովան սա՛ կը յայտարարէ. “Հիմա Յակոբի գերիները պիտի վերադարձնեմ, ամբողջ Իսրայէլի տան պիտի գթամ եւ իմ սուրբ անունիս համար նախանձախնդիր պիտի ըլլամ,

երբ անոնք կրեն իրենց նախատինքն ու ինծի դէմ իրենց ըրած բոլոր ուխտազանցութիւններուն պատիժը՝ մինչ իրենց ¹⁵երկրին մէջ՝՝ ապահովութեամբ կը բնակէին եւ ո՛չ մէկ դողացնող կար։

Երբ զանոնք ժողովուրդներէն վերադարձնեմ ու իրենց թշնամիներուն երկիրներէն հաւաքեմ, շատ ազգերու աչքերուն առջեւ անոնց մէջ ¹⁶պիտի փառաւորուիմ՝՝։

Այն ատեն պիտի գիտնան թէ ե՛ս եմ Տէրը՝ անոնց Աստուածը. որովհետեւ զանոնք ազգերուն մէջ տարագրեցի, ապա զանոնք դարձեալ իրենց երկիրը հաւաքեցի, եւ իրենցմէ ո՛չ մէկը թողուցի հոն։

Անգա՛մ մըն ալ իմ երեսս անոնցմէ պիտի չծածկեմ, քանի որ իմ Հոգիս Իսրայէլի տան վրայ պիտի թափեմ”», կը պատգամէ Տէրը՝ Եհովան։