Ezekiel 47

Lamentations  «  Ezekiel 46  ‹  Ezekiel 47  ›  Ezekiel 48  »  Daniel

ՏԱՃԱՐԷՆ ՀՈՍՈՂ ՋՈՒՐԵՐԸ

Յետոյ զիս ¹տաճարին մուտքը վերադարձուց, եւ ահա՛ տաճարին սեմին տակէն ջուրեր դուրս կ’ելլէին դէպի արեւելք, քանի որ տաճարին ճակատը դէպի արեւելք ուղղուած էր. ջուրերը տաճարին աջ ²թեւին տակէն՝ զոհասեղանին հարաւային կողմէն կ’իջնէին։

Զիս հիւսիսային դրան ճամբայէն դուրս հանեց, ու դուրսի ճամբայէն դառնալ տուաւ դէպի արտաքին դուռը՝ արեւելք նայող ճամբայէն. եւ ահա՛ ջուրեր կը հոսէին աջ թեւէն։

Այն մարդը՝ որ իր ձեռքը լար ունէր, դուրս ելաւ՝ դէպի արեւելք, ու հազար կանգուն չափեց, եւ զիս ջուրերէն անցուց. ջուրերը մինչեւ ոտքերուս կոճերը կը հասնէին։

Հազար կանգուն եւս չափեց, ու զիս ջուրերէն անցուց. ջուրերը մինչեւ ծունկերս կը հասնէին։ Հազար կանգուն եւս չափեց եւ զիս ջուրերէն անցուց. ջուրերը մինչեւ մէջքս կը հասնէին։

Դարձեալ հազար կանգուն չափեց, բայց այնպիսի ³գետ մը եղած էր՝ որ չէի կրնար անցնիլ, որովհետեւ ջուրերը յորդեր էին. պէտք էր որ լողայի ջուրերուն մէջ, անանցանելի գետ եղած էին։

Այն ատեն ինծի ըսաւ. «Տեսա՞ր, մարդո՛ւ որդի». ապա զիս տարաւ ու գետին եզերքը վերադարձուց։

Երբ վերադարձայ, ահա՛ գետին եզերքը յոյժ շատ ծառեր կային, մէկ կողմը եւ միւս կողմը։

Ինծի ըսաւ. «Այս ջուրերը դուրս կ’ելլեն դէպի արեւելեան շրջանը, անապատը կ’իջնեն ու ⁴ծովը կը հասնին, եւ ⁵ծովուն ջուրերուն խառնուելով զանոնք՝՝ կը բուժեն։

⁶Գետը ուր որ հասնի՝ բոլոր շնչաւոր կենդանիներն ու զեռունները պիտի ապրին. ձուկերը չափազանց առատ պիտի ըլլան, որովհետեւ այս ջուրերը հոն պիտի հասնին, եւ ⁷ծովուն ջուրերը՝՝ պիտի բուժուին. ո՛ւր որ գետը հասնի՝ ամէն ինչ պիտի ապրի։

Անոր ափերուն վրայ ձկնորսներ պիտի կայնին՝ Ենգադդիէն մինչեւ Ենեգլայիմ. հոն ուռկաններ փռելու տեղ պիտի ըլլայ։ Անոնց ձուկերը ⁸բազմատեսակ պիտի ըլլան, ⁹մեծ ծովուն ձուկերուն պէս՝ չափազանց շատ։

Բայց անոր ¹⁰ճախճախուտներն ու ճահիճները պիտի չբուժուին. անոնք աղ ունենալու պիտի ¹¹յատկացուին։

Գետին քով, անոր եզերքը, մէկ կողմը եւ միւս կողմը՝ ամէն տեսակ ¹²պտղատու ծառեր պիտի աճին, որոնց տերեւը պիտի չթառամի ու պտուղը չհատնի։ Ամէն ամիս ¹³նոր պտուղ՝՝ պիտի տան, որովհետեւ անոր ջուրերը սրբարանէն կ’ելլեն. անոնց պտուղը ուտելիքի համար պիտի ըլլայ, ու տերեւը՝ դարմանումի»։

ԵՐԿՐԻՆ ՍԱՀՄԱՆՆԵՐԸ

Տէրը՝ Եհովան սա՛ կը յայտարարէ. «Ահա՛ւասիկ սահմանները այն երկրին, որ իբր ժառանգութիւն պիտի բաժնէք՝ Իսրայէլի տասներկու տոհմերուն համեմատ։ (Յովսէփ երկու բաժին պիտի ունենայ։)

Զայն ¹⁴բոլորդ ալ՝՝ պիտի ժառանգէք. անոր համար ¹⁵իմ ձեռքս բարձրացուցի՝՝ որ զայն ձեր հայրերուն տամ. ա՛յս երկիրը ձեզի պիտի վիճակուի իբր ժառանգութիւն։

Ահա՛ւասիկ երկրին սահմանները.— հիւսիսային կողմը՝ մեծ ծովէն Եթլոնի ճամբան — որ Սեդադ կ’երթայ —, Եմաթ,

Բերոթա, Սեբրայիմ — որ Դամասկոսի հողամասին ու Եմաթի հողամասին միջեւ է —, մինչեւ Աւրանի հողամասին քով եղող Ասեր-Աթթիքոնը։

Այսպէս՝ երկրին սահմանը ¹⁶կ’երկարի ծովէն մինչեւ Ասար-Ենան, Դամասկոսի հողամասը, եւ հիւսիսային կողմը՝ դէպի հիւսիս՝ Եմաթի հողամասը. ասիկա հիւսիսային կողմն է։

Արեւելեան կողմը՝ Աւրանի, Դամասկոսի, Գաղաադի եւ Իսրայէլի երկրին միջեւ պիտի չափէք. Յորդանանը պիտի ըլլայ սահմանը՝ մինչեւ արեւելեան ծովը. ասիկա արեւելեան կողմն է։

Դէպի հարաւ՝ հարաւային կողմը կ’երկարի Թամարէն մինչեւ Վիճաբանութեան ջուրերը՝ Կադէսի մէջ, ու կը հասնի մինչեւ մեծ ծովը թափուող վտակը. ասիկա հարաւային կողմն է՝ դէպի հարաւ։

Արեւմտեան կողմը մեծ ծովը պիտի ըլլայ, հարաւային սահմանէն մինչեւ Եմաթի մուտքին դիմաց. ասիկա արեւմտեան կողմն է։

«Այս երկիրը ձեր մէջ պիտի բաժնէք՝ Իսրայէլի տոհմերուն համեմատ։

Զայն վիճակով պիտի բաժնէք իբր ժառանգութիւն՝ թէ՛ ձեզի, թէ՛ ալ ձեր մէջ պանդխտացած գաղթականներուն համար, որոնք ձեր մէջ որդիներ պիտի ծնանին։ Անոնք ձեզի բնիկներու պէս պիտի ըլլան Իսրայէլի որդիներուն մէջ. անոնք ձեզի հետ ժառանգութիւն պիտի առնեն Իսրայէլի տոհմերուն մէջ։

Այն տոհմին մէջ ուր գաղթականը պանդխտացած է, հոն անոր պիտի տաք իր ժառանգութիւնը», կը պատգամէ Տէրը՝ Եհովան։