Ezekiel 48

Lamentations  «  Ezekiel 47  ‹  Ezekiel 48  ›  Daniel 1  »  Daniel

ԵՐԿՐԻՆ ԲԱԺԱՆՈՒՄԸ ՏՈՀՄԵՐՈՒՆ ՄԻՋԵՒ

«Ահա՛ւասիկ տոհմերուն անունները.— հիւսիսի ծայրէն՝ Եթլոնի ճամբային քովէն դէպի Եմաթ երթալով՝ մինչեւ Ասար-Ենան, Դամասկոսի հողամասը դէպի հիւսիս ըլլալով՝ Եմաթի քով, արեւելեան կողմէն մինչեւ արեւմուտք, մէկ բաժին՝ Դանի.

Դանի սահմանին քով, արեւելեան կողմէն մինչեւ արեւմտեան կողմը, մէկ բաժին՝ Ասերի.

Ասերի սահմանին քով, արեւելեան կողմէն մինչեւ արեւմտեան կողմը, մէկ բաժին՝ Նեփթաղիմի.

Նեփթաղիմի սահմանին քով, արեւելեան կողմէն մինչեւ արեւմտեան կողմը, մէկ բաժին՝ Մանասէի.

Մանասէի սահմանին քով, արեւելեան կողմէն մինչեւ արեւմտեան կողմը, մէկ բաժին՝ Եփրեմի.

Եփրեմի սահմանին քով, արեւելեան կողմէն մինչեւ արեւմտեան կողմը, մէկ բաժին՝ Ռուբէնի.

Ռուբէնի սահմանին քով, արեւելեան կողմէն մինչեւ արեւմտեան կողմը, մէկ բաժին՝ Յուդայի։

«Յուդայի սահմանին քով, արեւելեան կողմէն մինչեւ արեւմտեան կողմը պիտի ըլլայ այն բարձրացնելիք ընծան՝ որ պիտի մատուցանէք. ան քսանհինգ հազար եղէգ լայնք պիտի ունենայ, եւ միւս բաժիններէն մէկուն չափ երկայնք, արեւելեան կողմէն մինչեւ արեւմտեան կողմը. սրբարանը անոր մէջտեղը պիտի ըլլայ։

Այն բարձրացնելիք ընծան՝ որ Տէրոջ պիտի մատուցանէք, քսանհինգ հազար եղէգ երկայն ու տասը հազար եղէգ լայն պիտի ըլլայ։

Այս սրբացուած բարձրացնելիք ընծան ասոնց պիտի ըլլայ, այսինքն՝ քահանաներուն. հիւսիսէն՝ երկայնքը քսանհինգ հազար եղէգ, արեւմուտքէն՝ լայնքը տասը հազար, արեւելքէն՝ լայնքը տասը հազար, հարաւէն՝ երկայնքը քսանհինգ հազար. Տէրոջ սրբարանը անոր մէջտեղը պիտի ըլլայ։

Այս բաժինը Սադովկի որդիներէն սրբացած քահանաներուն պիտի ըլլայ, որ իմ պաշտօնս կատարեցին. երբ Իսրայէլի որդիները մոլորեցան, անոնք չմոլորեցան, ինչպէս Ղեւտացիները մոլորեցան։

Երկրին բարձրացնելիք ընծայէն՝ այս բարձրացնելիք ընծան անոնց համար ամենասուրբ պիտի ըլլայ՝ Ղեւտացիներու հողամասին քով։

Քահանաներուն հողամասին քով՝ Ղեւտացիներուն բաժինը քսանհինգ հազար եղէգ երկայնք ու տասը հազար լայնք պիտի ունենայ. ամբողջ երկայնքը քսանհինգ հազար պիտի ըլլայ, եւ լայնքը՝ տասը հազար։

Անկէ պիտի չծախեն, ո՛չ ալ փոխանակեն. երկրին ¹երախայրիքը ուրիշի պիտի չփոխանցեն, որովհետեւ ան Տէրոջ ²վերապահուած է։

«Քսանհինգ հազարին քով լայնքէն մնացած հինգ հազարը անսուրբ տեղ պիտի ըլլայ՝ քաղաքին համար, բնակութեան համար եւ արուարձաններուն համար. քաղաքը անոր մէջտեղը պիտի ըլլայ։

Ահա՛ւասիկ անոր չափերը.— հիւսիսային կողմը՝ չորս հազար հինգ հարիւր եղէգ, հարաւային կողմը՝ չորս հազար հինգ հարիւր, արեւելեան կողմը՝ չորս հազար հինգ հարիւր, եւ արեւմտեան կողմը՝ չորս հազար հինգ հարիւր։

Քաղաքին արուարձանին չափը դէպի հիւսիս՝ երկու հարիւր յիսուն եղէգ պիտի ըլլայ, դէպի հարաւ՝ երկու հարիւր յիսուն, դէպի արեւելք՝ երկու հարիւր յիսուն, ու դէպի արեւմուտք՝ երկու հարիւր յիսուն։

Սրբացուած բարձրացնելիք ընծային քով՝ երկայնքէն մնացածը դէպի արեւելք տասը հազար եղէգ է, ու դէպի արեւմուտք՝ տասը հազար. ան սրբացուած բարձրացնելիք ընծային քով է, եւ անոր բերքը քաղաքին ծառայողներուն ³կերակուր պիտի ըլլայ։

Զայն պիտի մշակեն Իսրայէլի բոլոր տոհմերէն եկած քաղաքին ծառայողները։

«Ամբողջ բարձրացնելիք ընծան քսանհինգ հազարով քսանհինգ հազար պիտի ըլլայ. սրբացուած բարձրացնելիք ընծան — քառակուսի մը — պիտի մատուցանէք քաղաքին կալուածին հետ։

«Մնացածը իշխանին պիտի ըլլայ, սրբացուած բարձրացնելիք ընծային ու քաղաքին կալուածին մէկ կողմը եւ միւս կողմը. բարձրացնելիք ընծային քսանհինգ հազարին դիմաց՝ մինչեւ արեւելեան սահմանը, ու դէպի արեւմուտք քսանհինգ հազարին դիմաց՝ մինչեւ արեւմտեան սահմանը, տոհմերուն բաժիններուն քով՝ իշխանին պիտի ըլլայ։ Ասիկա պիտի ըլլայ սրբացուած բարձրացնելիք ընծան, ու ⁴տաճարին սրբարանը անոր մէջտեղը պիտի ըլլայ։

Իշխանին բաժինին մէջտեղը եղող Ղեւտացիներուն կալուածէն ու քաղաքին կալուածէն դուրս՝ Յուդայի սահմանին ու Բենիամինի սահմանին միջեւ ինչ որ կայ՝ իշխանին պիտի ըլլայ»։

ՈՒՐԻՇ ՏՈՀՄԵՐՈՒ ԿԱԼՈՒԱԾՆԵՐԸ

«Մնացած տոհմերուն անունները.— արեւելեան կողմէն մինչեւ արեւմտեան կողմը, մէկ բաժին՝ Բենիամինի.

Բենիամինի սահմանին քով, արեւելեան կողմէն մինչեւ արեւմտեան կողմը, մէկ բաժին՝ Շմաւոնի.

Շմաւոնի սահմանին քով, արեւելեան կողմէն մինչեւ արեւմտեան կողմը, մէկ բաժին՝ Իսաքարի.

Իսաքարի սահմանին քով, արեւելեան կողմէն մինչեւ արեւմտեան կողմը, մէկ բաժին՝ Զաբուղոնի.

Զաբուղոնի սահմանին քով, արեւելեան կողմէն մինչեւ արեւմտեան կողմը, մէկ բաժին՝ Գադի.

Գադի սահմանին քով, հարաւային կողմը՝ դէպի հարաւ երկրին սահմանը ⁵կ’երկարի Թամարէն մինչեւ Վիճաբանութեան ջուրերը՝ Կադէսի մէջ, ու կը հասնի մինչեւ մեծ ծովը թափուող վտակը։

Ա՛յս է այն երկիրը, որ Իսրայէլի տոհմերուն վիճակով պիտի բաժնէք իբր ժառանգութիւն. ասո՛նք են անոնց բաժինները», կը պատգամէ Տէրը՝ Եհովան։

ԵՐՈՒՍԱՂԷՄԻ ԴՌՆԵՐԸ

«Ահա՛ւասիկ քաղաքին ելքերը.— հիւսիսային կողմին չափը չորս հազար հինգ հարիւր եղէգ ըլլալով,

(քաղաքին դռները Իսրայէլի տոհմերուն անուններուն համեմատ պիտի ըլլան,) երեք դուռ պիտի ունենայ դէպի հիւսիս. մէկ դուռ՝ Ռուբէնի, մէկ դուռ՝ Յուդայի, ու մէկ դուռ՝ Ղեւիի անունով։

Արեւելեան կողմը չորս հազար հինգ հարիւր եղէգ ըլլալով՝ երեք դուռ պիտի ունենայ.— մէկ դուռ՝ Յովսէփի, մէկ դուռ՝ Բենիամինի, ու մէկ դուռ՝ Դանի անունով։

Հարաւային կողմին չափը չորս հազար հինգ հարիւր եղէգ ըլլալով, երեք դուռ պիտի ունենայ.— մէկ դուռ՝ Շմաւոնի, մէկ դուռ՝ Իսաքարի, ու մէկ դուռ՝ Զաբուղոնի անունով։

Արեւմտեան կողմն ալ չորս հազար հինգ հարիւր եղէգ ըլլալով՝ երեք դուռ պիտի ունենայ.— մէկ դուռ՝ Գադի, մէկ դուռ՝ Ասերի, ու մէկ դուռ՝ Նեփթաղիմի անունով։

Շրջագիծը տասնութ հազար եղէգ է, եւ այդ օրէն քաղաքին անունը ⁶Եհովա- Շամա պիտի ըլլայ»։