Isaiah 9

Song of Solomon  «  Isaiah 8  ‹  Isaiah 9  ›  Isaiah 10  »  Jeremiah

ԱՊԱԳԱՅ ԹԱԳԱՒՈՐԸ

Բայց այնպէս մէգ պիտի չըլլայ՝ ինչպէս տուայտանքի ժամանակը, Երբ նախապէս անարգեց Զաբուղոնի երկիրն ու Նեփթաղիմի երկիրը. Հապա յետագային պիտի փառաւորէ ծովուն ճամբան, Յորդանանի միւս կողմը, հեթանոսներու Գալիլեան։

Խաւարի մէջ քալող ժողովուրդը մեծ լոյս տեսաւ, Մահուան շուքին երկիրը բնակողներուն վրայ լոյս ծագեցաւ։

Ազգը բազմացուցիր, անոր ուրախութիւնը մեծցուցիր. Անոնք քու առջեւդ կ’ուրախանան՝ հունձքի ատենի ուրախութեան պէս, Ինչպէս կը խայտան երբ աւար կը բաժնեն.

Քանի որ անոր ծանր լուծը, Ուսին գաւազանը, Ու զայն ճնշողին ցուպը Կոտրեցիր՝ Մադիամի օրուան պէս։

Արդարեւ ¹շաչիւնով պատերազմողներուն բոլոր ²զէնքերը Եւ ³արիւնաթաթախ հանդերձները Պիտի այրին ու կրակի ճարակ ըլլան։

Որովհետեւ մեզի զաւակ մը ծնաւ, Մեզի որդի մը տրուեցաւ, Եւ գերիշխանութիւնը անոր ուսին վրայ պիտի ըլլայ. Անոր անունը պիտի կոչուի. “Սքանչելի խորհրդական, Հզօր Աստուած, Յաւերժութեան հայր, Խաղաղութեան ⁴իշխան”։

Անոր գերիշխանութեան մեծնալուն ու խաղաղութեան ⁵սահման պիտի չըլլայ՝ Դաւիթի գահին վրայ եւ անոր թագաւորութեան վրայ, Որպէսզի զայն իրաւունքով ու արդարութեամբ հաստատէ եւ ամրապնդէ՝ Հիմա եւ յաւիտեան։ Զօրքերու Տէրոջ նախանձախնդրութիւնը պիտի կատարէ ասիկա։

ԱՍՏՈՒԱԾ ՊԻՏԻ ՊԱՏԺԷ ԻՍՐԱՅԷԼԸ

Տէրը Յակոբի պատգամ ղրկեց, Եւ ան Իսրայէլի վրայ իջաւ։

Ամբողջ ժողովուրդը պիտի տեղեկանայ, Այսինքն՝ Եփրեմ ու Սամարիայի բնակիչները, Որոնք յոխորտանքով եւ սիրտի մեծամտութեամբ կ’ըսեն.

«Աղիւսները ինկան, Բայց մենք տաշուած քարերով պիտի կառուցանենք. Ժանտաթզենիները կտրուեցան, Բայց մենք զանոնք մայրիներով պիտի փոխարինենք»։

Սակայն Տէրը անոր դէմ Ռասինի հակառակորդները պիտի հանէ, Եւ անոր թշնամիները պիտի ⁶գրգռէ.—

⁷Ասորիները՝ ⁸արեւելքէն, Փղշտացիները՝ ⁹արեւմուտքէն. Անոնք լեցուն բերանով Իսրայէլը պիտի ուտեն։ Հակառակ այս բոլորին՝ անոր բարկութիւնը չկասեցաւ, Հապա անոր ձեռքը տակաւին երկարած է։

Արդարեւ ժողովուրդը զինք զարնողին չի դառնար, Եւ զօրքերու Տէրը չի փնտռեր։

Տէրն ալ Իսրայէլի գլուխն ու պոչը, Արմաւենիի ճիւղն ու կնիւնը Մէկ օրուան մէջ պիտի կտրէ։

(Երէցն ու պատուաւոր մարդը գլուխն է, Իսկ ստութիւն սորվեցնող մարգարէն պոչն է։)

Այս ժողովուրդին առաջնորդները զինք կը մոլորեցնեն, Եւ անոնցմէ առաջնորդուածները կը կլլուին։

Այս պատճառով Տէրը անոր երիտասարդներով պիտի չուրախանայ, Ու անոր որբերուն եւ այրիներուն պիտի չգթայ. Արդարեւ բոլորն ալ կեղծաւոր ու չարագործ են, Եւ ամէն բերան անզգամութիւն կը խօսի։ Հակառակ այս բոլորին՝ անոր բարկութիւնը չկասեցաւ, Հապա անոր ձեռքը տակաւին երկարած է։

Արդարեւ ամբարշտութիւնը կրակի պէս կ’այրէ, Ցախերն ու փուշերը կը սպառէ, Անտառին թաւուտները կ’այրէ, Եւ անոնք կը ցնդին վեր ելլող մուխի պէս։

Զօրքերու Տէրոջ ցասումէն երկիրը պիտի ¹⁰այրի, Ու ժողովուրդը կրակի ճարակ եղած պիտի թուի. Ո՛չ մէկը իր եղբօր պիտի խնայէ։

Աջ կողմը եղածը պիտի ¹¹յափշտակէ եւ անօթի մնայ. Ձախ կողմինն ալ պիտի ուտէ ու չկշտանայ. Ամէն մարդ իր բազուկներուն միսը պիտի ուտէ։

Մանասէ Եփրեմը պիտի ուտէ, ու Եփրեմ՝ Մանասէն. Անոնք միասին Յուդայի վրայ պիտի յարձակին։ Հակառակ այս բոլորին՝ անոր բարկութիւնը չկասեցաւ, Հապա անոր ձեռքը տակաւին երկարած է։