Isaiah 11

Song of Solomon  «  Isaiah 10  ‹  Isaiah 11  ›  Isaiah 12  »  Jeremiah

ԽԱՂԱՂ ԹԱԳԱՒՈՐՈՒԹԻՒՆԸ

Յեսսէի բունէն շառաւիղ մը պիտի ելլէ, Եւ անոր արմատէն ընձիւղ մը պիտի բուսնի.

Անոր վրայ պիտի հանգչի Տէրոջ Հոգին, Իմաստութեան ու խելացութեան Հոգին, Խորհուրդի ու զօրութեան Հոգին, ¹Աստուծոյ ճանաչումին եւ վախին՝՝ Հոգին։

Ան Տէրոջ վախով պիտի ²ներշնչուի. Իր աչքերուն տեսածին համաձայն պիտի չդատէ, Եւ ականջներուն լսածին համաձայն պիտի չյանդիմանէ.

Հապա չքաւորը արդարութեամբ պիտի դատէ, Ու երկրի հեզերը ուղղամտութեամբ պիտի յանդիմանէ։ Իր բերանին գաւազանով երկիրը պիտի զարնէ, Ու շրթունքին շունչով ամբարիշտը պիտի մեռցնէ։

Արդարութիւնը պիտի ըլլայ իր մէջքի գօտին, Ու հաւատարմութիւնը՝ իր կողերուն գօտին։

Գայլը գառին հետ պիտի բնակի, Եւ ինձը ուլին հետ պիտի պառկի։ Հորթը, առիւծի կորիւնն ու պարարտ զուարակը միասին պիտի արածին, Եւ պզտիկ ³մանուկ մը զանոնք պիտի առաջնորդէ։

Կովը արջին հետ պիտի արածի, Անոնց ձագերը միասին պիտի պառկին։ Առիւծը արջառի պէս յարդ պիտի ուտէ,

Ծծկերը քարբին ծակին վրայ պիտի խաղայ, Ու կաթէն կտրուածը ձեռքը իժին քարայրին վրայ պիտի դնէ։

Անոնք պիտի ⁴չվնասեն եւ չփճացնեն իմ ամբողջ սուրբ լերանս վրայ. Արդարեւ երկիրը Տէրոջ գիտութեամբ պիտի լեցուի, Ինչպէս ջուրերը ծովուն յատակը կը ծածկեն։

ԱՔՍՈՐՈՒԱԾ ԺՈՂՈՎՈԻՐԴԸ ՊԻՏԻ ՎԵՐԱԴԱՌՆԱՅ

Այդ օրը Յեսսէի արմատը Պիտի կայնի ժողովուրդներուն դրօշակ ըլլալու համար. ⁵Ազգերը զայն պիտի փնտռեն, Եւ անոր հանգստավայրը փառաւոր պիտի ըլլայ։

Այդ օրը՝ Տէրը երկրորդ անգամ իր ձեռքը պիտի երկարէ, Որպէսզի իր ժողովուրդին մնացորդը — ճողոպրածները — Վերստանայ Ասորեստանէն, Եգիպտոսէն, Պաթուրէսէն, Եթովպիայէն, Եղամէն, Սենաարէն, Եմաթէն Ու ծովուն կղզիներէն։

Ազգերուն դրօշակ պիտի բարձրացնէ Եւ Իսրայէլի աքսորականները պիտի հաւաքէ. Երկրի չորս անկիւններէն Յուդայի ցրուածները պիտի հաւաքէ։

Եփրեմի նախանձը պիտի հեռանայ, Ու Յուդայի հակառակորդները պիտի բնաջնջուին. Եփրեմ պիտի չնախանձի Յուդայի, Եւ Յուդա պիտի չճնշէ Եփրեմը.

Հապա անոնք դէպի արեւմուտք պիտի թռչին՝ Փղշտացիներուն ⁶ուսերուն վրայ, Ու միասին արեւելքցիները պիտի կողոպտեն։ Եդովմի եւ Մովաբի վրայ իրենց ձեռքերը պիտի երկարեն, Ու Ամմոնի որդիները իրենց պիտի հնազանդին։

Տէրը Եգիպտոսի ծովուն ⁷լեզուն պիտի ⁸աւերէ, Եւ իր հովին սաստիկ զօրութեամբ ձեռքը Գետին վրայ պիտի ⁹շարժէ. Զայն եօթը վտակի բաժնելով պիտի զարնէ, Այնպէս որ մարդ անոր մէջէն կօշիկներով պիտի ¹⁰անցնի։

Իր ժողովուրդին մնացորդին — ճողոպրածներուն — համար Պողոտայ մը պիտի ըլլայ Ասորեստանէն, Ինչպէս եղաւ Իսրայէլի Այն օրը՝ երբ Եգիպտոսէն բարձրացաւ։