Isaiah 13

Song of Solomon  «  Isaiah 12  ‹  Isaiah 13  ›  Isaiah 14  »  Jeremiah

ԱՍՏՈՒԱԾ ՊԻՏԻ ՊԱՏԺԷ ԲԱԲԵԼՈՆԸ

Բաբելոնի պատգամը, որ Ամովսի ¹որդիին՝ Եսայիի յայտնուեցաւ՝՝.—

²Լերկ լերան վրայ դրօշա՛կ ³պարզեցէք, Ձա՛յն բարձրացուցէք անոնց, ⁴Ձեռքով նշա՛ն ըրէք՝՝, որպէսզի ազնուականներուն դռներէն մտնեն։

Իմ ⁵որոշածներուս հրամայեցի, Իմ զօրաւորներս, իմ մեծափառութեամբս հրճուողներն ալ կանչեցի՝ Իմ բարկութիւնս իրագործելու։

Լեռներուն վրայ բազմութեան ձայն մը կայ՝ Մեծ ժողովուրդի մը ձայնին նման, Հաւաքուած ազգերու թագաւորութիւններուն ժխորին ձայնը կայ. Զօրքերու Տէրը աչքէ կ’անցընէ զօրքերը որ պիտի պատերազմին։

Հեռաւոր երկրէ մը, երկինքի ծայրէն կու գան — Տէրը եւ անոր սրտմտութեան գործիքները — Ամբողջ երկիրը կործանելու։

Գոռացէ՛ք, որովհետեւ Տէրոջ օրը մօտ է. Ան պիտի գայ որպէս Ամենակարողէն ղրկուած կործանում։

Հետեւաբար բոլոր ձեռքերը պիտի թուլնան, Եւ ամէն մարդու սիրտ պիտի հալի։

Անոնք պիտի շփոթին. Տագնապ ու անձկութիւն պիտի համակեն զանոնք, Ծննդաբերող կնոջ պէս երկունքի ցաւ պիտի քաշեն։ Իրարու նայելով պիտի զարմանան. Անոնց երեսները ⁶բոցագոյն պիտի ըլլան։

Ահա՛ Տէրոջ օրը կու գայ՝ Անգթութեամբ, ցասումով ու բորբոքած բարկութեամբ, Որպէսզի երկիրը ամայի ⁷դարձնէ, Եւ մեղաւորները անկէ բնաջնջէ։

Արդարեւ երկինքի աստղերն ու անոնց համաստեղութիւնները Իրենց լոյսը պիտի չտան. Արեւը իր ⁸ծագած ատենը պիտի խաւարի, Ու լուսինը իր լոյսով պիտի չճառագայթէ։

Ես պիտի ⁹պատժեմ երկրագունդը իր չարութեան համար, Եւ ամբարիշտները՝ իրենց անօրէնութեան համար։ Հպարտներուն ամբարտաւանութիւնը պիտի դադրեցնեմ, Եւ բռնակալներուն յոխորտանքը պիտի նուաստացնեմ։

Մարդը զուտ ոսկիէն աւելի հազուագիւտ պիտի ընեմ, ¹⁰Աւելի՝ քան Ոփիրի մաքուր ոսկին։

Ուստի երկինքը պիտի սարսեմ, Ու երկիրը իր տեղէն պիտի շարժի Զօրքերու Տէրոջ ցասումով՝ Անոր բորբոքած բարկութեան օրը։

Բաբելոնի բնակիչները ¹¹հալածուած այծեամի պէս պիտի ըլլան, Ցրուած հօտի պէս՝ որ ո՛չ մէկը կը հաւաքէ. Անոնցմէ իւրաքանչիւրը իր ժողովուրդին պիտի դառնայ, Իւրաքանչիւրը իր երկիրը պիտի փախչի։

Ո՛վ որ գտնուի՝ պիտի խոցուի, Ո՛վ որ ¹²բռնուի՝ սուրով պիտի իյնայ։

Անոնց երախաները իրենց աչքերուն առջեւ գետին պիտի զարնուին, Անոնց տուները պիտի կողոպտուին, Եւ անոնց կիները պիտի ¹³բռնաբարուին։

Ահա՛ անոնց դէմ Մարերը պիտի գրգռեմ, Որոնք արծաթը չեն ¹⁴գնահատեր, Ու ոսկիէն չեն ախորժիր։

Անոնց աղեղները երիտասարդները ¹⁵պիտի խոցեն՝՝, Եւ անոնք ¹⁶որովայնի պտուղին պիտի չգթան. Անոնց աչքը պիտի չխղճայ ¹⁷զաւակներուն վրայ։

Թագաւորութիւններուն փառքը, Քաղդէացիներուն մեծափառութեան պարծանքը եղող Բաբելոն՝ Տակնուվրայ պիտի ըլլայ, Ինչպէս Աստուած Սոդոմն ու Գոմորը կործանեց։

Ան ամենեւին պիտի չբնակուի. Սերունդէ սերունդ անբնակ պիտի ըլլայ։ Հոն Արաբները վրան պիտի չլարեն, Ու հովիւները իրենց հօտը հոն պիտի չպառկեցնեն.

Հապա ¹⁸վայրենի կատուներ՝՝ հոն պիտի պառկին, Եւ անոնց տուները ոռնացող անասուններով պիտի լեցուին. Հոն ջայլամներ պիտի բնակին, Եւ այծամարդեր հոն պիտի ցատկռտեն։

Անոր դղեակներուն մէջ բորենիներ պիտի կանչուըռտեն, Ու վայելքի պալատներուն մէջ՝ շնագայլեր։ Անոր ժամանակը հասնելու մօտ է, Եւ անոր օրերը ա՛լ պիտի չերկարաձգուին։