Jeremiah 3

Isaiah  «  Jeremiah 2  ‹  Jeremiah 3  ›  Jeremiah 4  »  Lamentations

ԱՆՀԱՒԱՏԱՐԻՄ ԻՍՐԱՅԷԼԸ

«Կ’ըսեն. “Եթէ մարդ մը իր կինը արձակէ, Ան ալ իր քովէն երթայ եւ ուրիշ ամուսինի մը պատկանի, Ինք անգամ մըն ալ ¹այդ կնոջ՝՝ կը վերադառնա՞յ”։ Այդ երկիրը ամբողջովին չի՞ պղծուիր։ Իսկ դուն՝ շատ ²հոմանիներու հետ պոռնկեցար. Սակայն ինծի՛ վերադարձիր,— կը պատգամէ Տէրը։—

Աչքերդ վերցո՛ւր բլրակներուն ու նայէ՛, Ո՞ւր ³չպոռնկեցար։ Դուն անոնց համար ճամբաներուն վրայ նստար, Ինչպէս Արաբը՝ անապատին մէջ, Եւ քու պոռնկութիւններովդ ու չարութեամբդ երկիրը պղծեցիր։

Ուստի տարափները ⁴դադրեցան, Եւ վերջին անձրեւը ⁵չեկաւ. Բայց դուն պոռնիկի ճակատ ունիս, Կը մերժես խպնիլ։

Միթէ հիմա ալ զիս չե՞ս կոչեր. “Իմ Հա՛յրս, դուն ես իմ երիտասարդութեանս ⁶մտերիմը”։

Միթէ յաւիտեա՞ն ⁷պիտի բարկանայ՝՝, Կամ իր զայրոյթը ընդմի՞շտ պիտի պահէ։ Ահա՛ դուն այսպէս խօսեցար, Սակայն չարիք գործեցիր՝ որչափ որ կրցար»։

ԻՍՐԱՅԷԼ ԵՒ ՅՈՒԴԱ ՊԷՏՔ Է ԶՂՋԱՆ

Յովսիա թագաւորին օրերը՝ Տէրը ինծի ըսաւ. «Ուխտադրուժ Իսրայէլի ըրածը տեսա՞ր. Ամէն բարձր լերան վրայ Եւ ամէն կանաչազարդ ծառի տակ գնաց, Ու հոն պոռնկեցաւ։

Երբ այս բոլորը ըրաւ՝ Ըսի. “Ինծի՛ վերադարձիր”, բայց չվերադարձաւ. Եւ անոր անհաւատարիմ քոյրը՝ Յուդա ասիկա տեսաւ։

Երբ ուխտադրուժ Իսրայէլի շնութիւն ընելուն պատճառով Զայն արձակեցի եւ անոր տուի ամուսնալուծումի վկայագիրը, Տեսայ թէ անոր անհաւատարիմ քոյրը՝ Յուդա չվախցաւ, Հապա գնաց եւ ինք ալ պոռնկեցաւ։

Ան իր աղմկայոյզ պոռնկութեամբ երկիրը պղծեց, Քանի քարի ու փայտի հետ շնութիւն ըրաւ։

Հակառակ այս բոլորին, անոր անհաւատարիմ քոյրը՝ Յուդա ալ Ամբողջ սիրտով ինծի չվերադարձաւ, Հապա՝ կեղծաւորութեամբ», կը պատգամէ Տէրը։

Տէրը ինծի ըսաւ. «Ուխտադրուժ Իսրայէլը ինքզինք աւելի արդարացուց՝ քան անհաւատարիմ Յուդան։

Գնա՛, սա՛ խօսքերը ⁸արտասանէ դէպի հիւսիս. “Վերադարձի՛ր, ո՛վ ուխտադրուժ Իսրայէլ ,— կը պատգամէ Տէրը.— Իմ բարկութիւնս ձեր վրայ չեմ թափեր, Քանի որ ես կարեկից եմ,— կը պատգամէ Տէրը,— Յաւիտեան զայրոյթ չեմ պահեր։

Միայն թէ գիտակցի՛ր անօրէնութեանդ, Քանի քու Տէր Աստուծոյդ դէմ ապստամբեցար. Ամէն կանաչազարդ ծառի տակ Քու ճամբաներդ դէպի օտար աստուածները տարածեցիր, Եւ իմ խօսքս մտիկ չըրիր,— կը պատգամէ Տէրը։—

Վերադարձէ՛ք, ո՛վ ուխտադրուժ որդիներ,— կը պատգամէ Տէրը,— Որովհետեւ ե՛ս եմ ձեր տէրը. Ձեզ պիտի առնեմ, քաղաքէ մը՝ մէկ հոգի, Գերդաստանէ մը՝ երկու հոգի, Ու ձեզ Սիոն պիտի բերեմ։

Իմ սիրտիս համաձայն հովիւներ պիտի տամ ձեզի, Որոնք գիտութեամբ եւ ուշիմութեամբ պիտի հովուեն ձեզ։

Երբ դուք այդ օրերը երկրին վրայ բազմանաք եւ աճիք,— կը պատգամէ Տէրը,— Անգամ մըն ալ պիտի չըսեն. "Տէրոջ ուխտին տապանակը"։ Ան ⁹պիտի չմտաբերուի՝՝ Ու զայն պիտի չյիշեն. Զայն աչքէ պիտի չանցընեն, Եւ անգա՛մ մըն ալ պիտի չշինուի։

Այն ատեն Երուսաղէմը պիտի կոչեն. "Տէրոջ գահը", Ու բոլոր ազգերը հոն՝ Երուսաղէմ պիտի հաւաքուին, Տէրոջ անունին համար. Անգա՛մ մըն ալ իրենց չար սիրտին կամակորութեան պիտի չհետեւին։

Այդ օրերը Յուդայի տունը Իսրայէլի տան հետ պիտի ընթանայ, Ու երկուքը միասին հիւսիսի երկրէն Պիտի գան այն երկիրը՝ որ ¹⁰իրենց հայրերուն ժառանգել տուի”»։

ԱՍՏՈՒԾՈՅ ԺՈՂՈՎՈՒՐԴԻՆ ԿՌԱՊԱՇՏՈՒԹԻՒՆԸ

«Ես ըսի. “Ի՜նչպէս կ’ուզեմ քեզ որդիներուն մէջ դնել, Ու քեզի տալ այդ ցանկալի երկիրը, Ազգերուն ամենէն փառաւոր ժառանգութիւնը”։ Նաեւ ըսի. “Զիս պիտի կոչես. "Իմ հա՛յրս", Եւ ինձմէ պիտի չհեռանաս”։

“Ի՛րապէս, ո՛վ Իսրայէլի տունը, Ինչպէս կին մը իր ¹¹սիրականին անհաւատարիմ կ’ըլլայ, Այնպէս ալ դուք ինծի անհաւատարիմ եղաք”, կը պատգամէ Տէրը»։

Բլրակներուն վրայ ձայն մը լսուեցաւ, Իսրայէլի որդիներուն լացի եւ աղաչանքի ձայնը. Արդարեւ անոնք իրենց ճամբան ծռեցին, Տէրը՝ իրենց Աստուածը մոռցան։

«Ո՛վ ուխտադրուժ որդիներ, վերադարձէ՛ք, Ես ձեր ուխտադրժութիւնները պիտի բուժեմ»։ «Ահա՛ մենք քեզի կու գանք, Քանի որ դո՛ւն ես Տէրը՝ մեր Աստուածը.

Ի՛րապէս բլուրներու Եւ լեռներու բազմութեան յուսալը ընդունայն է։ Ի՛րապէս Իսրայէլի փրկութիւնը Տէրոջմէն՝ մեր Աստուծմէն է.

Սակայն մեր երիտասարդութենէն ի վեր ամօ՛թը սպառեց մեր հայրերուն վաստակը, Անոնց ոչխարները եւ արջառները, Անոնց որդիներն ու աղջիկները։

Մեր ամօթով կը պառկինք, Մեր նախատինքը մեզ կը ծածկէ. Արդարեւ մեր երիտասարդութենէն մինչեւ այսօր Թէ՛ մենք եւ թէ մեր հայրերը Տէրոջ՝ մեր Աստուծոյն դէմ մեղանչեցինք, Ու Տէրոջ՝ մեր Աստուծոյն ձայնը մտիկ չըրինք»։