Jeremiah 6

Isaiah  «  Jeremiah 5  ‹  Jeremiah 6  ›  Jeremiah 7  »  Lamentations

ԵՐՈՒՍԱՂԷՄ ԹՇՆԱՄԻՆԵՐԷ ՇՐՋԱՊԱՏՈՒԱԾ

Ո՛վ Բենիամինի որդիներ, փախէ՛ք Երուսաղէմի մէջէն, Շեփո՛ր հնչեցուցէք Թեկուէի մէջ, ¹Թանձր մո՛ւխ՝՝ բարձրացուցէք Բեթաքարմայի վրայ. Որովհետեւ հիւսիսէն չարիք կ’երեւնայ, ու մեծ փլուզում։

Սիոնի աղջիկը ²գեղեցիկ ու քնքուշ կնոջ մը նմանցուցի.

Հովիւները եւ անոնց հօտերը անոր պիտի երթան, Անոր դիմացը վրաններ պիտի ³լարեն՝ բոլորաձեւ, Իւրաքանչիւրը իր տեղին մէջ պիտի ⁴արածի։

«Անոր դէմ պատերա՛զմ ⁵պատրաստեցէք. Ոտքի՛ ելէք, ու կէսօրի՛ն բարձրանանք. Վա՜յ մեզի, որովհետեւ օրը կը ⁶մթննայ, Եւ իրիկուան ստուերները կ’երկարին»։

«Ոտքի՛ ելէք, գիշե՛րը բարձրանանք, Ու քանդենք անոր պալատները»։

Արդարեւ զօրքերու Տէրը սա՛ կը յայտարարէ. «Ծառե՛ր կտրեցէք եւ հողաբլո՛ւր բարձրացուցէք Երուսաղէմի դիմաց։ Ասիկա ⁷պատժուելու արժանի՝՝ քաղաք մըն է, Ամէնուրեք հարստահարութիւն կայ անոր մէջ։

Ինչպէս ⁸աղբիւրը կը ⁹բխեցնէ իր ջուրերը, Այնպէս ալ ան ¹⁰կ’արտաբերէ իր չարութիւնը։ Անոր մէջ բռնութեան ու կործանումի ժխոր կը լսուի. Իմ առջեւս շարունակ ¹¹կսկիծներ եւ ¹²վէրքեր կան։

Ո՛վ Երուսաղէմ, խրատուէ՛, Որպէսզի իմ անձս քեզմէ չզատուի, Ու քեզ ամայի եւ անբնակ երկրի մը ¹³չվերածեմ»։

ԱՊՍՏԱՄԲ ԻՍՐԱՅԷԼԸ

Զօրքերու Տէրը սա՛ կը յայտարարէ. «Իսրայէլի մնացորդը ¹⁴այգիի պէս Բոլորովին ճռաքաղ պիտի ընեն. Քու ձեռքդ կողովներո՛ւն դարձուր՝ կթողի պէս»։

Որո՞ւ խօսիմ, ո՞վ վկայ կանչեմ, որ լսեն. Ահա՛ անոնց ականջները անթլփատ են, Ու չեն կրնար ուշադիր ըլլալ։ Ահա՛ Տէրոջ խօսքը անոնց առջեւ նախատուեցաւ. Անկէ չեն ախորժիր։

Ուստի ես Տէրոջ ցասումով լեցուած եմ. Զայն մէջս ¹⁵պահելէն հիւծեցայ։ «Զայն ¹⁶թափէ՛ երախաներուն վրայ՝ փողոցը, Նաեւ երիտասարդներուն խորհրդաժողովին վրայ, Քանի որ ամուսինը եւ կինը, Ծերն ու ¹⁷տարիքաւորը պիտի բռնուին.

Անոնց տուները ուրիշներուն պիտի փոխանցուին՝ Իրենց արտերուն եւ կիներուն հետ, Որովհետեւ երկրին բնակիչներուն վրայ Իմ ձեռքս պիտի երկարեմ,— կը պատգամէ Տէրը։—

Արդարեւ անոնց պզտիկէն մինչեւ մեծը՝ Բոլորը ագահութեան անձնատուր են, Ու մարգարէէն մինչեւ քահանան՝ Բոլորը կեղծիքով կը վարուին։

Իմ ժողովուրդիս աղջիկին ¹⁸վէրքը հարեւանցի բուժելով՝ կ’ըսեն. “Խաղաղութի՜ւն է, խաղաղութի՜ւն”, Մինչդեռ խաղաղութիւն չկայ։

Միթէ իրենց գարշութիւն գործած ատենը կ’ամչնա՞ն. Բնա՛ւ չեն ամչնար, Եւ խպնիլ չեն գիտեր։ Հետեւաբար ինկողներուն հետ պիտի իյնան, Զիրենք ¹⁹պատժած ատենս պիտի գայթին», կը յայտարարէ Տէրը։

ԻՍՐԱՅԷԼ ԿԸ ՄԵՐԺԷ ԱՍՏՈՒԾՈՅ ՃԱՄԲԱՆ

Տէրը սա՛ կը յայտարարէ. «Կայնեցէ՛ք ճամբաներուն վրայ ու նայեցէ՛ք, Հարցուցէ՛ք հնադարեան շաւիղներուն մասին՝ Թէ ո՛րն է բարօրութեան ճամբան, Եւ քալեցէ՛ք անոր մէջէն, Որպէսզի հանգիստ գտնէք ձեր անձերուն։ Բայց անոնք պատասխանեցին. “Անոր մէջէն պիտի չքալենք”։

Նաեւ դէտեր նշանակեցի ձեր վրայ՝ պատուիրելով. “Ուշադի՛ր եղէք շեփորի ձայնին”. Բայց անոնք պատասխանեցին. “Ուշադիր պիտի չըլլանք”։

Ուրեմն, ո՜վ ազգեր, լսեցէ՛ք. Ո՛վ համայնք, գիտցի՛ր անոնց մէջ եղածը։

Լսէ՛, ո՛վ երկիր. Ահա՛ ես այս ժողովուրդին վրայ չարիք պիտի բերեմ՝ Իրենց մտածումներուն պտուղը, Որովհետեւ իմ խօսքերուս ուշադիր չեղան, Եւ օրէնքս ալ մերժեցին։

Ինչո՞ւ ինծի Սաբայէն կնդրուկ գայ, Ու հեռաւոր երկրէ՝ ²⁰հոտաւէտ խունկեղէգ. Ձեր ողջակէզները ²¹ընդունելի չեն, Եւ ձեր զոհերը ինծի հաճելի չեն։

Հետեւաբար Տէրը սա՛ կը յայտարարէ. “Ահա՛ ես այս ժողովուրդին առջեւ խոչընդոտներ պիտի դնեմ, Որոնց զարնուելով՝ հայրերն ու որդիները միասին պիտի գայթին, Դրացին եւ իր բարեկամը պիտի կորսուին”»։

ՀԻՒՍԻՍԷՆ ԵԿՈՂ ԱՍՊԱՏԱԿՆԵՐ

Տէրը սա՛ կը յայտարարէ. «Ահա՛ հիւսիսի երկրէն ժողովուրդ մը կու գայ, Ու երկրի ²²ծայրերէն մեծ ազգ մը ²³կ’արշաւէ։

Անոնք աղեղ ու տէգ կը բռնեն, Անգութ եւ անողորմ են. Անոնց ձայնը ծովու պէս կը գոռայ։ Անոնք ձիերու վրայ հեծած են, Ու պատերազմիկի պէս Քեզի դէմ կը շարուին, ո՛վ Սիոնի աղջիկ»։

Երբ անոր համբաւը լսեցինք՝ Մեր ձեռքերը թուլցան. Տագնապը մեզ համակեց՝ Ծննդաբերող կնոջ երկունքի ցաւին պէս։

Դուրս մի՛ ելլէք դէպի արտերը, ու ճամբաներէն մի՛ երթաք, Որովհետեւ ամէն կողմ թշնամիին սուրը եւ արհաւիրք կայ։

Ո՛վ իմ ժողովուրդիս աղջիկը, ²⁴քո՛ւրձ հագիր՝՝, Մոխիրի՛ մէջ թաւալէ, Եւ լա՛ց դառնագին կոծով, Ինչպէս մէկ հատիկ զաւակի վրայ կը սգան. Որովհետեւ կործանողը յանկարծ մեր վրայ պիտի հասնի։

«Քեզ իմ ժողովուրդիս վրայ կարգեցի իբր ²⁵քննիչ եւ ամրոց, Որպէսզի անոնց ճամբան գիտնաս ու քննես։

Բոլորը շեղած ապստամբներ են, Բանսարկութեան կ’երթան, պղինձ եւ երկաթ են. Բոլորը ապականած են։

Փքոցը հրաբորբոք եղաւ, Կապարը կրակէն հատաւ. Ձուլագործը ընդունայն կը զտէ, Որովհետեւ ²⁶խարամը անջատուած չէ՝՝։

Անոնք “անարգ արծաթ” պիտի կոչուին, Որովհետեւ Տէրը զանոնք ²⁷մերժած է»։