Jeremiah 10

Isaiah  «  Jeremiah 9  ‹  Jeremiah 10  ›  Jeremiah 11  »  Lamentations

ԿՌԱՊԱՇՏՈՒԹԻՒՆ ԵՒ ՃՇՄԱՐԻՏ ԵՐԿՐՊԱԳՈՒԹԻՒՆ

Ո՛վ Իսրայէլի տունը, Մտի՛կ ըրէք Տէրոջ ձեզի ըսած խօսքը։

Տէրը սա՛ կը յայտարարէ. «¹Հեթանոսներուն ²բարքերը մի՛ սորվիք, Ու երկինքի նշաններէն մի՛ զարհուրիք, Քանի հեթանոսները անոնցմէ կը զարհուրին։

Արդարեւ ժողովուրդներուն սովորութիւնները ունայնութիւն են.— Անտառէն փայտ կը կտրեն, Որ արհեստաւորին ձեռքերը դուրով կը ³ձեւակերպեն.

Զայն արծաթով եւ ոսկիով կը գեղեցկացնեն, Զայն գամերով ու մուրճերով կ’ամրացնեն՝ որպէսզի ⁴չերերայ։

⁵Անոնք արմաւենիի պէս ուղղաձիգ են, բայց չեն խօսիր. Անշուշտ պէտք է զանոնք կրել, քանի չեն կրնար քալել։ Անոնցմէ մի՛ վախնաք, որովհետեւ չարիք մը չեն կրնար ընել, Ո՛չ ալ կարող են բարիք ընել»։

Ո՛վ Տէր, ո՛չ մէկը քեզի նման է. Դո՛ւն մեծ ես, եւ քու անունդ մեծ է զօրութեամբ։

Քեզմէ ո՞վ պիտի չվախնայ, ո՛վ ազգերու Թագաւոր, Քանի որ քեզի կը վայլէ պատկառանքը. Արդարեւ ազգերուն բոլոր իմաստուններուն մէջ, Եւ իրենց բոլոր թագաւորութիւններուն մէջ, Ո՛չ մէկը քեզի նման է.

Իսկ իրենք բոլորն ալ անխելք եւ անմիտ են. ⁶Փայտը ունայնութիւններու վարդապետութիւն է՝՝։

Թարսիսէն ⁷արծաթի թիթեղներ՝՝ կը բերուին, Ու Ոփազէն՝ ոսկի. ⁸Անոնք արհեստաւորին եւ ձուլագործին ձեռքերու գործն են. Անոնց հանդերձը ⁹կապուտակ ու ¹⁰ծիրանի է, Բոլորն ալ ¹¹վարպետներու գործեր են։

Իսկ ճշմարիտ Աստուածը Եհովա՛ն է. Ի՛նք է ապրող Աստուածն ու յաւիտենական Թագաւորը։ Երբ զայրանայ՝ երկիրը կը շարժի, Եւ ազգերը չեն կրնար անոր սրտմտութեան տոկալ։

Անոնց սա՛ ըսէք. «Այն աստուածները՝ որ երկինքն ու երկիրը ¹²չկերտեցին, Երկրէն եւ այս երկինքին տակէն պիտի բնաջնջուին»։

ԱՍՏՈՒԾՈՅ ՓԱՌԱԲԱՆՈՒԹԵԱՆ ԵՐԳ ՄԸ

Ի՛նք երկիրը ¹³ստեղծեց իր կարողութեամբ, Երկրագունդը հաստատեց իր իմաստութեամբ, Երկինքը սփռեց իր հանճարով։

Երբ իր ձայնը լսել տայ՝ երկինքի մէջ ջուրերու յորդառատութիւն կ’ըլլայ. Երկրի ծայրերէն ամպեր կը բարձրացնէ, Անձրեւի համար փայլակներ կը ¹⁴պատրաստէ, Ու հով կը հանէ իր շտեմարաններէն։

Ամէն մարդ ճանաչումէն զրկուելով անբան եղաւ. Ամէն ձուլագործ իր քանդակած կուռքին պատճառով ամօթահար եղաւ, Որովհետեւ իր ¹⁵ձուլած կուռքերը՝՝ ստութիւն են, Անոնք ¹⁶հոգի չունին։

Անոնք ունայնութիւն են, զեղծարարութեան գործեր. Իրենց ¹⁷պատիժին ատենը պիտի կորսուին։

Յակոբի Բաժինը ասոնց պէս չէ, Որովհետեւ ի՛նք է ամենուն ¹⁸Արարիչը. Իսրայէլ իր ժառանգութեան ¹⁹վիճակն է, Իր անունը ²⁰Զօրքերու Տէր՝՝ է։

ՄՕՏԵՑՈՂ ԱՔՍՈՐԸ

Ո՛վ ²¹բերդի մէջ բնակող, Հաւաքէ՛ ու հանէ՛ երկրէն իրեղէններդ,

Քանի որ Տէրը սա՛ կը յայտարարէ. «Ահա՛ այս անգամ երկրին բնակիչները ²²հեռուն պիտի նետեմ, Եւ զանոնք պիտի տագնապեցնեմ, որպէսզի իրենց պատիժը գտնեն»։

Վա՜յ ինծի՝ իմ բեկումիս համար. Իմ վէրքս անդարմանելի է։ Սակայն ես ըսի. «Անտարակոյս ասիկա ²³կսկիծս է, Զայն պիտի կրեմ»։

Իմ վրանս կործանեցաւ, ու բոլոր չուաններս փրթան. Որդիներս ինձմէ ²⁴հեռացան, ա՛լ չկան. Այլեւս ո՛չ մէկը վրանս կը լարէ, Եւ վարագոյրներս կը կանգնեցնէ։

Արդարեւ հովիւները անբան եղան Ու Տէրը չփնտռեցին. Հետեւաբար ²⁵չյաջողեցան, Եւ իրենց ամբողջ հօտը ցրուեցաւ։

Ահա՛ հիւսիսի երկրէն գոյժի աղմուկ կու գայ, Նաեւ մեծ շարժ, Որպէսզի Յուդայի քաղաքները ամայութեան ²⁶վերածէ, Ու շնագայլերու որջի։

Գիտեմ, ո՛վ Տէր, թէ մարդուն ճամբան իր ձեռքը չէ. Քալող մարդը իր քայլերը հաստատելու կարող չէ։

Ո՛վ Տէր, ²⁷պատժէ՛ զիս, բայց ²⁸չափաւորութեամբ. Ո՛չ թէ քու բարկութեամբդ, որ զիս չսպառես։

Քու ցասումդ թափէ՛ քեզ չճանչցող հեթանոսներուն վրայ, Եւ անունդ չկանչող գերդաստաններուն վրայ, Որովհետեւ Յակոբը կլանեցին. Զայն լափեցին ու ²⁹հատցուցին, Եւ անոր բնակարանը ամայացուցին։