Jeremiah 13

Isaiah  «  Jeremiah 12  ‹  Jeremiah 13  ›  Jeremiah 14  »  Lamentations

ՎՈՒՇԷ ԳՕՏԻՆԵՐԸ

Տէրը ինծի սա՛ ըսաւ. «Գնա՛, քեզի գնէ՛ վուշէ գօտի մը, ու զայն մէ՛ջքդ ¹կապէ. զայն ջուրի մէջ մի՛ ²թաթխեր»։

Ուստի Տէրոջ խօսքին համաձայն գօտի մը գնեցի եւ մէջքս կապեցի։

Երկրորդ անգամ ³Տէրը խօսեցաւ՝՝ ինծի՝ ըսելով.

«Ա՛ռ այդ գնած գօտիդ՝ որ մէջքդ է, ու կանգնէ՛, Եփրա՛տ գնա եւ հոն պահէ՛ զայն ժայռին ծակին մէջ»։

Ես ալ գացի ու զայն Եփրատի եզերքը պահեցի, ինչպէս Տէրը ինծի հրամայեց։

Շատ օրեր ետք Տէրը ինծի ըսաւ. «Կանգնէ՛, Եփրա՛տ գնա, եւ ա՛ռ անկէ այն գօտին՝ որ քեզի հրամայեցի հոն պահել»։

Ուստի Եփրատ գացի, ու փորելով՝ գօտին այդ պահած տեղէս առի. սակայն ահա՛ գօտին ⁴փտած էր, եւ ⁵անպէտ եղած։

⁶Տէրը խօսեցաւ՝՝ ինծի՝ ըսելով.

«Տէրը սա՛ կը յայտարարէ. “Յուդայի ամբարտաւանութիւնը Ու Երուսաղէմի մեծ ամբարտաւանութիւնը ա՛յդպէս պիտի փճացնեմ։

Այս չար ժողովուրդը՝ Որ կը մերժէ իմ խօսքերս մտիկ ընել, Իր սիրտին կամակորութեամբ կ’ընթանայ, Եւ ուրիշ աստուածներու կը հետեւի՝ Զանոնք պաշտելու եւ անոնց երկրպագելու համար, Այդ անպէտ գօտիին պէս պիտի ըլլայ։

Արդարեւ ինչպէս գօտին մարդուն մէջքը կը ⁷կապուի, Ամբողջ Իսրայէլի տունն ու ամբողջ Յուդայի տունը Այնպէս ինծի ⁸կապեր էի,— կը պատգամէ Տէրը,— Որպէսզի իմ ժողովուրդս ըլլան, Նաեւ՝ անուն, գովաբանութիւն եւ պարծանք. Բայց անոնք մտիկ չըրին”»։

ԳԻՆԻԻ ԿԱՐԱՍԸ

«Նաեւ սա՛ խօսքը ըսէ անոնց. “Տէրը՝ Իսրայէլի Աստուածը սա՛ կը յայտարարէ. "Ամէն կարաս գինիով պիտի լեցուի"”. Բայց անոնք քեզի պիտի ըսեն. “Միթէ մենք չե՞նք գիտեր թէ ամէն կարաս գինիով պիտի լեցուի”։

Դուն ալ ըսէ՛ անոնց. “Տէրը սա՛ կը յայտարարէ. "Ահա՛ ես այս երկրին բոլոր բնակիչները Դաւիթի գահին վրայ բազմող թագաւորները, Քահանաներն ու մարգարէները, Նաեւ Երուսաղէմի բոլոր բնակիչները գինովութեամբ պիտի լեցնեմ

Եւ զանոնք իրարու զարնելով պիտի ջախջախեմ, Հայրերն ու որդիները միասին,— կը պատգամէ Տէրը։— Անոնց պիտի չարգահատիմ եւ չխղճամ. Առանց գթալու զանոնք պիտի բնաջնջեմ"”»։

ԵՐԵՄԻԱ ԿԸ ԶԳՈՒՇԱՑՆԷ ՀՊԱՐՏՈՒԹԵՆԷ

Մտի՛կ ըրէք, ունկնդրեցէ՛ք, մի՛ խրոխտանաք, Որովհետեւ Տէրը խօսեցաւ։

Փա՛ռք տուէք Տէրոջ՝ ձեր Աստուծոյն, Դեռ խաւարը ձեր վրայ չբերած, Եւ ձեր ոտքերը ⁹մութ լեռներուն վրայ չսահած. Ձեր լոյսի սպասած ատենը Զայն մահուան շուքի ¹⁰չփոխած, Ու մառախուղի ¹¹չվերածած։

Բայց եթէ մտիկ չընէք, Ձեր յոխորտանքին համար իմ անձս ծածուկ տեղեր պիտի լայ. Աչքերս դառնապէս պիտի լան եւ արցունք ¹²թափեն, Քանի որ Տէրոջ հօտը կը տարագրուի։

Ըսէ՛ թագաւորին ու ¹³մայր-թագուհիին՝՝. «Դուք ձեզ նուաստացուցէ՛ք ու գետի՛նը նստեցէք, Որովհետեւ ձեր գլուխէն ձեր շքեղ թագը իջաւ»։

Հարաւային քաղաքները փակուեցան, Եւ ո՛չ մէկ բացող կայ. Ամբողջ Յուդան տարագրուեցաւ. ¹⁴Բոլո՛րը տարագրուեցան։

«Վերցուցէ՛ք ձեր աչքերը, ու նայեցէ՛ք հիւսիսի կողմէն եկողներուն. Ո՞ւր է քեզի տրուած հօտը, ո՞ւր են քու պանծալի ոչխարներդ։

Ի՞նչ պիտի ըսես՝ երբ քեզ ¹⁵պատժէ, Որովհետեւ դո՛ւն անոնց սորվեցուցիր որ քու վրադ պետ եւ գլխաւոր ըլլան. Միթէ երկունքի ցաւերը պիտի չբռնե՞ն քեզ՝ ինչպէս ծննդաբերող կինը։

Եթէ սիրտիդ մէջ ըսես. “Ինչո՞ւ այս բաները ինծի հանդիպեցան”, գիտցի՛ր թէ Քու անօրէնութեանդ շատութեան համար է որ փէշերդ բացուեցան, Ու կրունկներդ բռնութեամբ մերկացան։

Միթէ կարելի՞ է որ Եթովպիացին իր մորթը փոխէ, Կամ ինձը՝ իր խայտուցները, Որ դուք ալ՝ չարիք ընել վարժուած ըլլալով՝ Կարենաք բարիք ընել։

Ուստի անապատի հովէն ¹⁶քշուող խոզանի պէս Պիտի ցրուեմ զանոնք։

Ա՛յս է քու վիճակդ եւ բաժինդ, Որ ես քեզի համար ¹⁷որոշեցի,— կը պատգամէ Տէրը,— Քանի որ զիս մոռցար ու ստութեան ¹⁸ապաւինեցար։

Ուստի ես ալ քու փէշերդ երեսիդ վրայ ¹⁹վերցուցի, Եւ անարգանքդ երեւցաւ։

Ես տեսայ քու շնութիւններդ ու վրնջիւններդ, Լիրբ պոռնկութիւնդ, Եւ բլուրներու վրայ ու դաշտի մէջ գործած պղծութիւններդ։ Վա՜յ քեզի, ո՛վ Երուսաղէմ. Մինչեւ երբ պիտի չմաքրուի՞ս»։