Jeremiah 26

Isaiah  «  Jeremiah 25  ‹  Jeremiah 26  ›  Jeremiah 27  »  Lamentations

ԵՐԵՄԻԱ ԴԱՏԻ ԿԸ ԲԵՐՈՒԻ

Յուդայի թագաւորին՝ Յովսիայի որդիին Յովակիմի թագաւորութեան սկիզբը, սա՛ խօսքը ¹ուղղուեցաւ Տէրոջմէն՝ ըսելով.

«Տէրը սա՛ կը յայտարարէ. “Տէրոջ տան գաւիթը կայնէ՛, ու Տէրոջ տունը երկրպագելու եկող Յուդայի բոլոր քաղաքներուն արտասանէ՛ այն բոլոր խօսքերը, որոնք քեզի հրամայեցի՝ անոնց ըսելու համար. ո՛չ մէկ խօսք պակսեցուր։

Թերեւս մտիկ ընեն եւ իւրաքանչիւրը իր չար ճամբայէն դարձի գայ, ես ալ հրաժարիմ այն չարիքէն՝ որ կը մտածեմ անոնց ընել, իրենց չար արարքներուն պատճառով։

Անոնց ըսէ՛. "Տէրը սա՛ կը յայտարարէ. «Եթէ ինծի մտիկ չընելով՝ ձեր առջեւ դրած օրէնքիս մէջ չընթանաք,

ու ձեզի ղրկած ծառաներուս՝ մարգարէներուն խօսքերը մտիկ չընէք,— որոնք կանուխ ելլելով ղրկեցի, բայց դուք մտիկ չըրիք,—

այս տունը Սելովի պէս պիտի ²ընեմ, եւ այս քաղաքը անէծք դարձնեմ երկրի բոլոր ազգերուն»"”»։

Քահանաները, մարգարէներն ու ամբողջ ժողովուրդը լսեցին, երբ Երեմիա Տէրոջ տան մէջ այս խօսքերը կ’արտասանէր։

Երբ Երեմիա աւարտեց այն բոլոր խօսքերը՝ որ Տէրը իրեն հրամայեր էր ըսել ամբողջ ժողովուրդին, քահանաները, մարգարէներն ու ամբողջ ժողովուրդը զինք բռնեցին եւ ըսին. «Դուն ա՛նպատճառ պիտի մեռնիս։

Ինչո՞ւ Տէրոջ անունով մարգարէացար՝ ըսելով. “Այս տունը Սելովի պէս պիտի ըլլայ, եւ այս քաղաքը աւերակ պիտի ըլլայ՝ առանց բնակիչի”»։ Ամբողջ ժողովուրդը Երեմիայի շուրջ հաւաքուեցաւ Տէրոջ տան մէջ։

Երբ Յուդայի իշխանաւորները այս բաները լսեցին, թագաւորին տունէն Տէրոջ տունը բարձրացան եւ Տէրոջ տան նոր դրան մուտքը նստան։

Քահանաներն ու մարգարէները խօսեցան իշխանաւորներուն եւ ամբողջ ժողովուրդին, ու ըսին. «Այս մարդը մեռնելու արժանի է, քանի որ այս քաղաքին դէմ մարգարէացաւ, ինչպէս դուք ձեր ականջներով լսեցիք»։

Իսկ Երեմիա բոլոր իշխանաւորներուն եւ ամբողջ ժողովուրդին ըսաւ. «Տէ՛րը զիս ղրկեց որ մարգարէանամ՝ այս տան ու այս քաղաքին դէմ արտասանելով ձեր լսած բոլոր խօսքերը։

Ուստի հիմա բարեփոխեցէ՛ք ձեր ³ընթացքն ու արարքները, եւ մտի՛կ ըրէք ձեր Աստուծոյն ձայնը. Տէրն ալ ձեր դէմ ⁴վճռած չարիքէն պիտի հրաժարի։

Իսկ ես ահա՛ ձեր ձեռքն եմ. վարուեցէ՛ք ինծի հետ՝ ինչպէս որ ⁵ձեզի հաճելի եւ ուղիղ թուի՝՝։

Սակայն լա՛ւ գիտցէք թէ եթէ զիս մեռցնէք, անշուշտ անմեղ արիւնին պատիժը պիտի դնէք ձեր վրայ, այս քաղաքին վրայ եւ անոր բնակիչներուն վրայ. որովհետեւ ճշմա՛րտապէս Տէ՛րը զիս ձեզի ղրկեց, որպէսզի այս բոլոր խօսքերը ձեր ականջներուն ըսեմ»։

Այն ատեն իշխանաւորներն ու ամբողջ ժողովուրդը քահանաներուն եւ մարգարէներուն ըսին. «Այս մարդը մեռնելու արժանի չէ, որովհետեւ Տէրոջ՝ մեր Աստուծոյն անունով մեզի խօսեր է»։

Նաեւ երկրին երէցներէն քանի մը մարդիկ կանգնեցան եւ ժողովուրդին ամբողջ համախմբումին ըսին.

«Յուդայի Եզեկիա թագաւորին օրերը՝ Մորստացի Միքիա մարգարէացաւ եւ ամբողջ Յուդայի ժողովուրդին ըսաւ. “Զօրքերու Տէրը սա՛ կը յայտարարէ. "Սիոն արտի պէս պիտի հերկուի, Երուսաղէմ աւերակի շեղջերու պիտի ⁶վերածուի, ու Տէրոջ տան լեռը՝ անտառի բարձունքներու"”։

Միթէ Յուդայի Եզեկիա թագաւորն ու ամբողջ Յուդան զայն մեռցուցի՞ն. ան Տէրոջմէ չվախցա՞ւ եւ Տէրոջ ⁷չպաղատեցա՞ւ. Տէրն ալ անոնց դէմ վճռած չարիքէն հրաժարեցաւ։ Ուրեմն մենք մեծ չարիք մը ըրած կ’ըլլանք մեր անձերուն»։

Նաեւ Կարիաթ-Յարիմէն մարդ մը կար, Սեմայիայի որդին՝ Ուրիա, որ Տէրոջ անունով կը մարգարէանար։ Ան այս քաղաքին դէմ եւ այս երկրին դէմ մարգարէացաւ՝ Երեմիայի բոլոր խօսքերուն համաձայն։

Երբ Յովակիմ թագաւորն ու անոր բոլոր զօրաւորները եւ բոլոր իշխանաւորները անոր խօսքերը լսեցին, թագաւորը ⁸ջանաց որ զայն մեռցնէ. բայց Ուրիա ասիկա լսելով՝ վախցաւ, ու փախաւ Եգիպտոս գնաց։

Յովակիմ թագաւորը մարդիկ ղրկեց Եգիպտոս. Աքոբորի որդին՝ Եղնաթանը, եւ անոր հետ քանի մը մարդիկ Եգիպտոս ղրկեց։

Անոնք Ուրիան Եգիպտոսէն հանեցին ու Յովակիմ թագաւորին բերին. ան ալ զինք սուրով զարկաւ, եւ անոր դիակը ժողովուրդին որդիներուն գերեզմանները նետեց։

Բայց Սափանի որդիին՝ Աքիկամի ձեռքը Երեմիայի հետ էր, որպէսզի ան ժողովուրդին ձեռքը չմատնուի՝ մեռցուելու համար։