Jeremiah 30

Isaiah  «  Jeremiah 29  ‹  Jeremiah 30  ›  Jeremiah 31  »  Lamentations

ՏԷՐՈՋ ԽՈՍՏՈՒՄԸ ԻՐ ԺՈՂՈՎՈՒՐԴԻՆ

Երեմիայի ¹ուղղուած խօսքը Տէրոջմէն՝ որ ըսաւ.

«Տէրը՝ Իսրայէլի Աստուածը սա՛ կը յայտարարէ. “Քեզի համար գրէ՛ բոլոր քեզի ըսած խօսքերս գիրքի մը մէջ։

Արդարեւ ահա՛ պիտի գան օրերը,— կը պատգամէ Տէրը,— երբ իմ ժողովուրդիս՝ Իսրայէլի եւ Յուդայի գերիները պիտի վերադարձնեմ,— կը յայտարարէ Տէրը։— Զանոնք պիտի վերադարձնեմ այն երկիրը՝ որ իրենց հայրերուն տուի, որպէսզի անոր տիրանան”»։

Ահա՛ւասիկ Իսրայէլի մասին ու Յուդայի մասին Տէրոջ ըսած խօսքերը.—

«Տէրը սա՛ կը յայտարարէ. “²Սարսափի ձայն մը լսեցինք. Երկիւղ կայ, ո՛չ թէ խաղաղութիւն։

Ուրեմն հարցուցէ՛ք ու տեսէ՛ք, Արդեօք ³այր մարդը՝՝ զաւակ կը ծնանի՞. Ինչո՞ւ ամէն ⁴կտրիճ Ծննդաբերող կնոջ պէս ձեռքերը մէջքը դրած է, Ու բոլոր երեսները դեղին դարձած են։

Վա՜յ, որովհետեւ ատիկա մեծ օր է. անոր նմանը չկայ։ Ատիկա Յակոբի տագնապի ժամանակն է, Բայց անկէ պիտի ազատի”»։

«Արդարեւ այդ օրը,— կը պատգամէ զօրքերու Տէրը,— Անոր լուծը քու վիզիդ վրայէն պիտի կոտրեմ, Կապերդ պիտի փրցնեմ, Եւ անգա՛մ մըն ալ օտարները ⁵զայն պիտի չստրկացնեն.

Հապա անոնք պիտի ծառայեն իրենց Տէր Աստուծոյն, Ու Դաւիթ թագաւորին՝ Որ ես անոնց պիտի հանեմ»։

«Ուստի դուն մի՛ վախնար, ո՛վ իմ ծառաս Յակոբ,— կը պատգամէ Տէրը,— Ո՛վ Իսրայէլ, մի՛ զարհուրիր. Որովհետեւ ահա՛ ես քեզ պիտի ազատեմ հեռաւոր երկրէն, Եւ քու զարմդ՝ իրենց գերութեան երկրէն։ Յակոբ պիտի վերադառնայ, ու հանդարտ եւ անխռով պիտի ըլլայ. Ո՛չ մէկը զինք պիտի դողացնէ։

Արդարեւ ես քեզի հետ եմ,— կը պատգամէ Տէրը,— քեզ ազատելու համար. Պիտի ⁶բնաջնջեմ այն բոլոր ազգերը՝ Որոնց մէջ քեզ ցրուեցի, Բայց քեզ պիտի չբնաջնջեմ, Հապա քեզ ⁷չափաւորութեամբ պիտի ⁸պատժեմ, Սակայն քեզ բոլորովին անմեղ պիտի չսեպեմ»։

Արդարեւ Տէրը սա՛ կը պատգամէ. «Քու փլուզումդ մահաբեր է, ու վէրքդ՝ անդարմանելի.

Զայն ⁹խնամելու համար քու դատդ պաշտպանող մը չկայ, Քեզի համար դեղ ու զօրացուցիչ չկայ։

Քու բոլոր հոմանիներդ քեզ մոռցան, Քեզ չեն փնտռեր. Որովհետեւ քեզ թշնամիի մը ¹⁰հարուածով զարկի՝՝, Անգութ մէկու մը պատիժով, Քու բազմաթիւ անօրէնութիւններուդ համար, Քանի մեղքերդ շատցան։

Քու փլուզումիդ համար ինչո՞ւ կ’աղաղակես։ Քու կոտտանքդ մահաբեր է. Այս բաները քու բազմաթիւ անօրէնութիւններուդ համար քեզի ըրի, Քանի քու մեղքերդ շատցան։

Հետեւաբար բոլոր անոնք՝ որ քեզ կը ¹¹կլլեն, պիտի կլլուին. Քու բոլոր հակառակորդներդ գերութեան պիտի երթան. Քեզ յափշտակողները պիտի յափշտակուին, Ու բոլոր քեզ կողոպտողները կողոպտուելու պիտի մատնեմ։

Արդարեւ ¹²պիտի ապաքինիս՝՝ Եւ քու վէրքդ պիտի բուժեմ,— կը յայտարարէ Տէրը,— Որովհետեւ քեզ “Աքսորական” կոչեցին, եւ ըսին. “Այս այն Սիոնն է՝ որ ո՛չ մէկը կը փնտռէ”»։

Տէրը սա՛ կը յայտարարէ. «Ահա՛ ես Յակոբի վրաններուն գերիները պիտի վերադարձնեմ, Եւ անոր բնակարաններուն պիտի գթամ. Քաղաքը իր փլատակներուն վրայ պիտի կառուցանուի, Ու պալատը ¹³նախկինին պէս՝՝ պիտի բնակուի։

Անոնց մէջէն ներբող պիտի ¹⁴լսուի, Նաեւ խայտացողներու ձայնը։ Զանոնք պիտի բազմացնեմ եւ պիտի չքիչնան, Զանոնք պիտի փառաւորեմ ու պիտի չստորնանան։

Անոնց որդիները վաղեմի օրերուն պէս պիտի ըլլան, Անոնց համայնքը իմ առջեւս պիտի հաստատուի, Եւ բոլոր զիրենք տանջողները պիտի ¹⁵պատժեմ։

Անոնց ¹⁶ազնուականները իրենցմէ պիտի ըլլան, Անոնց ղեկավարն ալ իրենց մէջէն պիտի ելլէ։ Զայն պիտի մօտեցնեմ, եւ ինծի պիտի մօտենայ. Որովհետեւ ո՞վ է ան՝ որ ¹⁷ինքնիրեն կը համարձակի՝՝ ինծի մօտենալ,— կը պատգամէ Տէրը։

Դուք իմ ժողովուրդս պիտի ըլլաք, Ես ալ ձեր Աստուածը պիտի ըլլամ»։

Ահա՛ Տէրոջ մրրիկը ցասումով ¹⁸բարձրացաւ. Ան ¹⁹յարատեւ մրրիկ է, Ամբարիշտներուն գլուխին վրայ պիտի ²⁰պայթի։

Տէրոջ բորբոքած բարկութիւնը պիտի չհեռանայ, Մինչեւ որ իր սիրտին ²¹մտածումները չիրագործէ ու չհաստատէ. Վերջին օրերը ասիկա պիտի հասկնաք։