Joel 3

Hosea  «  Joel 2  ‹  Joel 3  ›  Amos 1  »  Amos

ԱՍՏՈՒԱԾ ՊԻՏԻ ԴԱՏԷ ԱԶԳԵՐԸ

«Արդարեւ ահա՛ այդ օրերը եւ այդ ատենը, Երբ ես Յուդան ու Երուսաղէմը գերութենէն վերադարձնեմ,

Բոլոր ազգերը պիտի հաւաքեմ, Եւ զանոնք ¹Յովսափատի հովիտը պիտի իջեցնեմ։ Հոն անոնց հետ դատ պիտի վարեմ Իմ ժողովուրդիս ու ժառանգութեանս՝ Իսրայէլի մասին, Որ ազգերու մէջ ցրուեցին, Եւ իմ երկիրս բաժնեցին։

Իմ ժողովուրդիս վրայ վիճակ ձգեցին, Տղեկը տուին իբր պոռնիկի վարձատրութիւն, Աղջնակը ծախեցին գինիի համար, որպէսզի խմեն»։

«Դո՛ւք ալ ի՞նչ գործ ունիք ինծի հետ, Ո՛վ Տիւրոս ու Սիդոն, եւ ²Փղշտացիներու բոլոր շրջանները։ Միթէ դուք ինծի փոխարէ՞ն կը հատուցանէք. Եթէ ինծի հատուցանէք, Արագօրէն եւ շտապելով ձեր հատուցումը պիտի վերադարձնեմ ձեր գլուխը։

Արդարեւ իմ արծաթս ու ոսկիս յափշտակեցիք, Իմ վայելչագեղ, ցանկալի բաներս ձեր մեհեանները տարիք,

Յուդայի որդիներն ու Երուսաղէմի որդիները Յոյներու որդիներուն ծախեցիք, Որպէսզի զանոնք իրենց հողամասէն հեռացնէք։

Ահա՛ ես զանոնք պիտի ³վերադարձնեմ այն տեղէն՝ ուր դուք զանոնք ծախեցիք, Եւ ձեր հատուցումը ձեր գլուխը պիտի վերադարձնեմ.

Ձեր որդիներն ու աղջիկները Յուդայի ⁴որդիներուն պիտի ծախեմ, Եւ անոնք ալ հեռաբնակ ազգի մը՝ Սաբայեցիներուն պիտի ծախեն զիրենք», Որովհետեւ Տէրը խօսեցաւ։

«Սա՛ յայտարարեցէք ազգերուն մէջ. “Պատերա՛զմ ⁵պատրաստեցէք, Արթնցուցէ՛ք զօրաւոր մարդիկը. Թող մօտենան ու բարձրանան բոլոր պատերազմիկները։

Ձեր խոփերէն սուրե՛ր դարբնեցէք, Եւ ձեր յօտոցներէն՝ նիզակներ։ Տկար եղողը թող ըսէ. "Ես զօրաւոր եմ"։

Շուտո՛վ եկէք, ո՛վ բոլոր շրջակայ ազգեր, ու հաւաքուեցէ՛ք”»։ Հո՛ն իջեցուր քու զօրաւորներդ, ո՛վ Տէր։

«Ազգերը թող արթննան եւ Յովսափատի հովիտը բարձրանան, Քանի որ հոն պիտի բազմիմ՝ բոլոր շրջակայ ազգերը դատելու համար։

Երկարեցէ՛ք մանգաղը, քանի հունձքը հասած է. Եկէ՛ք, իջէ՛ք, քանի հնձանը լեցուեցաւ, Գինիի կարասները կը յորդին. Արդարեւ անոնց չարութիւնը մեծ է։

Բազմութիւններ, բազմութիւններ կը հաւաքուին Վճիռի հովիտին մէջ, Որովհետեւ Տէրոջ օրը մօտ է Վճիռի հովիտին մէջ։

Արեւն ու լուսինը պիտի մթագնին, Աստղերը իրենց պայծառութիւնը պիտի ⁶ծածկեն.

Տէրը Սիոնէն պիտի ⁷գոչէ, Ու Երուսաղէմէն իր ձայնը լսել պիտի տայ. Երկինքն ու երկիրը պիտի շարժին, Բայց Տէրը իր ժողովուրդին ապաւէն պիտի ըլլայ, Եւ Իսրայէլի որդիներուն՝ ամրոց։

Պիտի գիտնաք թէ ե՛ս եմ Տէրը՝ ձեր Աստուածը, Ու կը բնակիմ իմ սուրբ լերանս՝ Սիոնի մէջ։ Երուսաղէմ սուրբ պիտի ըլլայ, Անգա՛մ մըն ալ օտարներ անկէ պիտի չանցնին։

Այդ օրը լեռները քաղցու պիտի կաթեցնեն, Բլուրները կաթ պիտի ⁸հոսեցնեն՝՝, Եւ Յուդայի բոլոր ⁹վտակները ջուրեր պիտի հոսեցնեն. Տէրոջ տունէն աղբիւր մը պիտի ¹⁰բխի, Ու Սատիմի ձորը պիտի ջրէ։

Եգիպտոս պիտի ամայանայ, Եդովմ ամայի անապատ պիտի ըլլայ՝ Յուդայի որդիներուն եղած բռնութեան համար, Քանի որ անոնց երկրին մէջ անմեղ արիւն թափեցին։

Բայց Յուդա յաւիտեան պիտի բնակուի, Ու Երուսաղէմ՝ ¹¹դարէ դար՝՝։

Պիտի ¹²մաքրեմ անոնց արիւնը՝ որ մաքրած չէի, Եւ Տէրը Սիոնի մէջ պիտի բնակի»։