Proverbs 18

Psalm  «  Proverbs 17  ‹  Proverbs 18  ›  Proverbs 19  »  Ecclesiastes

Ինքնահաճոյ մարդը իր փափաքը կը փնտռէ, Եւ ամէն գաղափարի ¹կ’ընդդիմանայ։

Անմիտը չ’ախորժիր հանճարէն, Հապա իր սիրտին մէջ եղածը յայտնելէն։

Երբ ամբարիշտը գայ՝ արհամարհանքն ալ կու գայ, Նաեւ նախատինքը՝ անարգանքին հետ։

Մարդուն բերանին խօսքերը խորունկ ջուրեր են. Իմաստութեան աղբիւրը ²առատաբուխ վտակ մըն է։

Լաւ չէ ամբարիշտին աչառութիւն ընել՝ Դատաստանի մէջ արդարին իրաւունքը ծռելու համար։

Անմիտին շրթունքը ³կռիւ կը ծագեցնէ՝՝, Ու անոր բերանը ծեծը կը կանչէ։

Անմիտին բերանը իրեն կործանում է, Եւ անոր շրթունքը իր անձին որոգայթ է։

Քսու մարդուն խօսքերը անուշեղէնի պէս են. Անոնք մինչեւ փորին ⁴շտեմարանները կ’իջնեն։

Ան որ իր գործին մէջ թոյլ է՝ Կործանողին եղբայրն է։

Տէրոջ անունը ամուր աշտարակ է. Արդարը անոր կը վազէ ու պաշտպանուած կ’ըլլայ։

Հարուստին ստացուածքը իր ամուր բերդաքաղաքն է. Անոր երեւակայութեան մէջ բարձր պարիսպի պէս է։

Փլուզումէն առաջ մարդուն սիրտը կը խրոխտանայ, Բայց փառքին առջեւէն խոնարհութիւնը կ’երթայ։

Ո՛վ որ խօսքի մը կը պատասխանէ՝ լսելէ առաջ, Ատիկա յիմարութիւն ու նախատինք է իրեն։

Մարդուն հոգին իր հիւանդութեան նեցուկ կ’ըլլայ, Բայց ⁵ընկճուած հոգին ո՞վ կրնայ ⁶մխիթարել։

Խելացիին սիրտը գիտութիւն կը ստանայ, Եւ իմաստուններուն ականջը գիտութիւն կը փնտռէ։

Մարդուն պարգեւը ⁷անոր ճամբայ կը բանայ՝՝ Ու զայն մեծերուն առջեւ կ’առաջնորդէ։

Ո՛վ որ առաջինը ըլլայ իր դատը ներկայացնելու՝ ⁸իրաւունք ունեցող՝՝ կը թուի. Բայց երբ իր ⁹ոսոխը գայ՝ զայն կը ¹⁰քննէ։

Վիճակը բանավէճերը կը դադրեցնէ Ու հզօրները կը զատէ։

¹¹Անիրաւուած եղբայր մը ամուր բերդաքաղաքէն անառիկ է, Եւ անոր բանավէճերը պալատի մը նիգերուն կը նմանին։

Մարդուն փորը իր բերանին պտուղէն կը կշտանայ. Իր շրթունքին ¹²արդիւնքէն կը ¹³յագենայ։

Մահն ու կեանքը լեզուին ձեռքն են. Զայն սիրողները անոր պտուղը կ’ուտեն։

Առաքինի կին գտնողը բարիք կը գտնէ Եւ Տէրոջմէն բարեհաճութիւն կը ստանայ։

Թշուառը աղաչանքով կը խօսի, Իսկ հարուստը խստութեամբ կը պատասխանէ։

Շատ ընկեր ունեցող մարդը ձախորդութեան կը հանդիպի, Բայց եղբօրմէն աւելի ¹⁴մտերիմ ¹⁵բարեկամ կայ։