Psalm 34

Job  «  Psalm 33  ‹  Psalm 34  ›  Psalm 35  »  Proverbs

ԱՍՏՈՒԾՈՅ ԲԱՐՈՒԹԵԱՆ ՓԱՌԱԲԱՆՈՒԹԻՒՆԸ Դաւիթի սաղմոսը, երբ իր դատողութիւնը այլափոխեց Աբիմելէքի առջեւ. ան ալ վռնտեց զինք, եւ ինք գնաց։

Ամէն ատեն Տէրը պիտի օրհնաբանեմ. Անոր գովաբանութիւնը շարունակ իմ բերանս պիտի ըլլայ։

Իմ անձս Տէրոջմով պիտի պարծենայ. Հեզերը պիտի լսեն եւ ուրախանան։

Տէ՛րը մեծարեցէք ինծի հետ, Ու միասի՛ն բարձրացնենք անոր անունը։

Տէրը փնտռեցի, եւ ինծի պատասխանեց. Զիս ազատեց բոլոր երկիւղներէս։

Անոր նայողները լուսափայլ եղան. Անոնց երեսները չշիկնեցան։

Այս դժբախտը գոչեց, Տէրը լսեց, Եւ զայն իր բոլոր տագնապներէն փրկեց։

Տէրոջ հրեշտակը անկէ վախցողներուն շուրջը կը բանակի, Ու զանոնք կ’ազատէ։

Համտեսեցէ՛ք եւ տեսէ՛ք թէ Տէրը բարի է. Երանի՜ այն ¹մարդուն՝ որ անոր կ’ապաւինի։

Տէրոջմէ՛ն վախցէք, ո՛վ անոր սուրբերը, Որովհետեւ անկէ վախցողներուն ոչինչ կը պակսի։

Առիւծի կորիւննե՛րը պիտի թշուառանան եւ անօթենան, Սակայն Տէրը փնտռողներուն ո՛չ մէկ բարիք պիտի պակսի։

Եկէ՛ք, որդինե՛ր, մտի՛կ ըրէք ինծի, Տէրոջ վախը պիտի սորվեցնեմ ձեզի։

Ո՞վ է այն մարդը՝ որ ապրիլ կը բաղձայ, Ու շատ օրեր կը սիրէ՝ բարիք տեսնելու համար.—

Զե՛րծ պահէ քու լեզուդ չարախօսութենէ, Եւ շրթունքդ՝ խաբէութիւն խօսելէ.

Չարութենէ հեռացի՛ր ու բարի՛ք գործէ, Խաղաղութի՛ւն փնտռէ եւ անո՛ր հետամուտ եղիր։

Տէրոջ աչքերը արդարներուն վրայ են, Եւ անոր ականջները՝ անոնց աղաղակին։

Տէրոջ երեսը չարագործներուն դէմ է, Անոնց յիշատակը երկրէն ջնջելու համար։

Արդարները կ’աղաղակեն, Տէրը կը լսէ, Եւ իրենց բոլոր տագնապներէն կ’ազատէ զանոնք։

Տէրը մօտ է անոնց՝ որոնց սիրտը կոտրած է, Ու հոգիով ճմլուածները կը փրկէ։

Արդարին ձախորդութիւնները շատ են, Բայց Տէրը բոլորէն կ’ազատէ զայն։

Անոր բոլոր ոսկորները կը պահպանէ, Անոնցմէ ո՛չ մէկը կը կոտրի։

Չարութիւնը ամբարիշտը պիտի մեռցնէ, Եւ արդարը ատողները ²պիտի դատապարտուին՝՝։

Տէրը իր ծառաներուն անձը կը փրկէ. Իրեն ապաւինողներէն ո՛չ մէկը պիտի դատապարտուի։