Psalm 37

Job  «  Psalm 36  ‹  Psalm 37  ›  Psalm 38  »  Proverbs

ՉԱՐԻՆ ՈՒ ԲԱՐԻԻՆ ՎԻՃԱԿԸ Դաւիթի սաղմոսը։

Մի՛ բորբոքիր չարագործներուն դէմ, Մի՛ նախանձիր անիրաւութիւն գործողներուն.

Որովհետեւ անոնք շուտով պիտի կտրուին՝ խոտի պէս, Ու պիտի թառամին՝ կանաչ դալարի պէս։

Տէրո՛ջ վստահէ եւ բարի՛ք ըրէ, Որ երկրին մէջ բնակիս ու ճշմարտութեան մէջ արածիս։

Տէրը քու վայելքդ թող ըլլայ, Որ ան քեզի տայ սիրտիդ խնդրանքները։

Տէրո՛ջ ¹յանձնէ քու ճամբադ, Անո՛ր վստահէ, եւ ան պիտի գործէ.—

Դուրս պիտի հանէ քու արդարութիւնդ՝ լոյսի պէս, Ու քու իրաւունքդ՝ կէսօրուան պէս։

²Հանդա՛րտ կեցիր՝՝ Տէրոջ քով, սպասէ՛ անոր, Ու մի՛ բորբոքիր իր ճամբան յաջողութեամբ գացողին դէմ, ³Նենգութեամբ վարուող մարդուն դէմ։

Թո՛ղ բարկութիւնը եւ լքէ՛ ցասումը. Մի՛ բորբոքիր՝ որ չարիք չընես։

Արդարեւ չարագործները պիտի բնաջնջուին, Սակայն Տէրոջ յուսացողները երկրին պիտի տիրանան.

Արդարեւ քիչ մը ատենէն ետք ամբարիշտը պիտի ⁴չքանայ, Անոր տեղին ⁵ուշադրութիւն պիտի դարձնես՝՝, բայց պիտի ⁶չգտնես։

Սակայն հեզերը երկրին պիտի տիրանան, Ու ⁷շատ խաղաղութիւն՝՝ պիտի վայելեն։

Ամբարիշտը արդարին դէմ չարիք կը խորհի, Եւ անոր դէմ ակռաները կը կրճտէ։

Սակայն Տէրը անոր վրայ պիտի ծիծաղի, Որովհետեւ կը տեսնէ թէ անոր օրը կը հասնի։

Ամբարիշտները սուր քաշեցին Եւ իրենց աղեղը լարեցին՝ Դժբախտն ու աղքատը տապալելու համար, ⁸Ուղիղ ճամբայէն ընթացողները՝՝ մորթելու համար։

Անոնց սուրը իրենց սիրտը պիտի մտնէ, Եւ անոնց աղեղները պիտի կոտրուին։

Արդարին ունեցած քիչ բանը՝ Շատ ամբարիշտներու ճոխութենէն լաւ է.

Որովհետեւ ամբարիշտներուն բազուկները պիտի կոտրուին, Բայց արդարներուն նեցուկը Տէ՛րն է։

Տէրը պարկեշտներուն օրերը գիտէ, Եւ անոնց ժառանգութիւնը յաւիտենական պիտի ըլլայ.

Ձախորդութեան ժամանակ պիտի չամչնան, Ու սովի օրերը պիտի կշտանան։

Բայց ամբարիշտները պիտի կորսուին, Եւ Տէրոջ թշնամիները ⁹պարարտ գառներու ճարպին՝՝ պէս պիտի սպառին, Մուխի պէս պիտի ¹⁰ցնդին։

Ամբարիշտը փոխ կ’առնէ, ու չի վերադարձներ. Սակայն արդարը կ’ողորմի եւ կու տայ։

Արդարեւ ¹¹անոր օրհնածները երկրին պիտի տիրանան, Բայց անկէ անիծուածները պիտի բնաջնջուին։

Բարի ¹²մարդուն քայլերը Տէրոջմէն կը հաստատուին, Եւ ինք կը հաճի անոր ճամբային.

Թէեւ իյնայ՝ պիտի չզգետնուի, Որովհետեւ Տէրը անոր ¹³ձեռքը կը բռնէ՝՝։

Երիտասարդ էի ու ծերացայ, Բայց արդարը լքուած չտեսայ, Կամ անոր զարմը՝ հաց մուրացող։

Ամէն օր կ’ողորմի ու փոխ կու տայ. Անոր զարմը օրհնուած է։

Չարութենէ հեռացի՛ր եւ բարի՛ք գործէ, Ու յաւիտեան պիտի մնաս.

Արդարեւ Տէրը իրաւունքը կը սիրէ, Եւ իր բարեպաշտները չի լքեր. Անոնք յաւիտեան կը պահպանուին, Իսկ ամբարիշտներուն զարմը պիտի բնաջնջուի։

Արդարները երկրին պիտի տիրանան, Ու յաւերժ պիտի բնակին անոր մէջ։

Արդարին բերանը իմաստութիւնը կը ¹⁴հռչակէ, Եւ անոր լեզուն իրաւունքը կը հաղորդէ.

Իր Աստուծոյն Օրէնքը իր սիրտին մէջ է, Անոր քայլերը պիտի չտատանին։

Ամբարիշտը ¹⁵արդարին վրայ կը հսկէ՝՝ Եւ կը ¹⁶ջանայ զինք մեռցնել.

Տէրը անոր ձեռքը պիտի չլքէ զինք, Ու երբ դատուի՝ պիտի չդատապարտէ զինք։

Սպասէ՛ Տէրոջ ու պահէ՛ անոր ճամբան, Եւ ան քեզ պիտի բարձրացնէ, որպէսզի երկրին տիրանաս. Ամբարիշտներուն բնաջնջումը պիտի տեսնես։

Ամբարիշտը ¹⁷զօրաւոր տեսայ, Իր տեղը կեցող կանաչազարդ ծառի մը պէս տարածուած.

Բայց ան անցաւ, եւ ահա՛ չկայ. Զայն փնտռեցի, բայց չգտայ։

Պարկե՛շտը դիտէ եւ ուղիղի՛ն նայէ. Որովհետեւ խաղաղարար մարդը բարի վախճան պիտի ունենայ,

Իսկ յանցաւորները միասին պիտի բնաջնջուին։ Ամբարիշտներուն վախճանը բնաջնջում պիտի ըլլայ,

Բայց արդարներուն փրկութիւնը Տէրոջմէն է. Տագնապի ժամանակ ինք անոնց ¹⁸զօրութիւնն է։

Տէրը պիտի օգնէ անոնց, եւ ազատէ զանոնք. Ամբարիշտներէն պիտի ազատէ Ու պիտի փրկէ զանոնք, որովհետեւ իրեն կ’ապաւինին։