Psalm 40

Job  «  Psalm 39  ‹  Psalm 40  ›  Psalm 41  »  Proverbs

ՓԱՌԱԲԱՆՈՒԹԵԱՆ ԵՐԳ Գլխաւոր երաժիշտին. Դաւիթի սաղմոսը։

Յուսալով սպասեցի Տէրոջ. Ան ալ հակեցաւ իմ կողմս, լսեց աղաղակս,

Եւ բարձրացուց զիս ¹կորուստի գուբէն, ²տղմալից յատակէն՝՝. Ոտքերս ³ամրացուց ժայռի վրայ, քայլերս հաստատեց,

Ու բերանս դրաւ նոր երգ մը՝ Մեր Աստուծոյ գովաբանութիւնը։ Շատերը պիտի տեսնեն, պիտի վախնան Ու Տէրոջ պիտի վստահին։

Երանի՜ այն ⁴մարդուն՝ որ իր վստահութիւնը Տէրոջ վրայ կը դնէ, Եւ ⁵ուշադրութիւն չի դարձներ հպարտներուն ու ստութեան ⁶հետեւողներուն։

Շա՛տ են քու ըրած սքանչելիքներդ, Ո՛վ Տէր, իմ Աստուա՛ծս. Մեր մասին ունեցած մտածումներդ Ո՛չ մէկը կրնայ ⁷զետեղել քու առջեւդ. Պիտի հռչակէի ու խօսէի անոնց մասին, Բայց պատմուելու համար չափազանց շատ են։

Դուն զոհէ եւ ընծայէ չախորժեցար, Հապա իմ ականջներս բացիր. Ողջակէզ ու մեղքի պատարագ չպահանջեցիր։

Այն ատեն ըսի.«Ահա՛ կու գամ. (Ի՛մ մասիս գրուած է գիրքի պատատին մէջ.)

Ո՛վ իմ Աստուածս, քու կամքդ գործադրելէն կ՛ախորժիմ, Ու քու Օրէնքդ իմ ներսս է»։

⁸Արդարութիւնդ աւետեցի մեծ համախմբումին մէջ. Ահա՛ շրթունքս ⁹չգոցեցի, Ո՛վ Տէր, դուն գիտես։

Սիրտիս մէջ ¹⁰գաղտնի չպահեցի՝՝ քու արդարութիւնդ. Հաւատարմութիւնդ ու փրկութիւնդ պատմեցի։ Քու կարեկցութիւնդ եւ ճշմարտութիւնդ մեծ համախմբումէն չծածկեցի։

Դուն, ո՛վ Տէր, քու գթութիւնդ մի՛ ¹¹մերժեր ինծի. Քու կարեկցութիւնդ ու ճշմարտութիւնդ շարունակ թող պաշտպանեն զիս։

ԱՂՕԹՔ՝ ՕԳՆՈՒԹԵԱՆ ՀԱՄԱՐ (Սաղմ. 70)

Արդարեւ անթիւ չարիքներ զիս պատեցին. Անօրէնութիւններս ինծի հասան, ու չեմ կրնար զանոնք տեսնել։ Գլուխիս մազերէն շատ են, եւ սիրտս զիս կը լքէ։

Ո՛վ Տէր, բարեհաճէ՛ զիս ազատել. Ո՛վ Տէր, արտորա՛ ինծի օգնելու։

Թող միասին ամչնան ու շիկնին Իմ անձս փնտռողները՝ զայն կորսնցնելու համար. Թող ընկրկին եւ խայտառակուին Անոնք՝ որ ինծի չարիք կը բաղձան։

Թող ¹²ամչնալով ¹³ընկճուին Անո՛նք՝ որ ինծի կ’ըսեն. «Վա՜շ, վա՜շ»։

Բոլոր քեզ փնտռողները Քեզմով թող բերկրին եւ ուրախանան. Քու փրկութիւնդ սիրողները Շարունակ թող ըսեն. «Տէրը թող մեծնայ»։

Թէեւ ես դժբախտ եւ աղքատ եմ, Տէրը կը մտածէ իմ մասիս։ Դո՛ւն ես իմ օգնականս ու փրկիչս. Ո՛վ իմ Աստուածս, մի՛ ուշանար։