Psalm 42

Job  «  Psalm 41  ‹  Psalm 42  ›  Psalm 43  »  Proverbs

ՏԱՐԱԳԻՐԻ ՄԸ ԱՂՕԹՔԸ Գլխաւոր երաժիշտին. Կորխի որդիներուն երգը։

Ինչպէս եղջերուն ջուրի վտակներուն կը տենչայ, Այնպէս ալ իմ անձս քեզի կը տենչայ, ո՛վ Աստուած։

Անձս կը ծարաւնայ Աստուծոյ, ապրո՛ղ Աստուծոյն. Ե՞րբ պիտի գամ եւ Աստուծոյ առջեւ երեւնամ։

Ցերեկ ու գիշեր արցունքներս ինծի հաց եղան, Որովհետեւ ¹ամէն ատեն՝՝ ինծի կ’ըսեն. «Ո՞ւր է քու Աստուածդ»։

Այս բաները յիշելով՝ Անձս իմ ներսս կը ²հալի, Քանի որ բազմութեան հետ ³կ’երթայի, Անոնց հետ հանդիսաւորապէս դէպի Աստուծոյ տունը կը յառաջանայի՝ Ցնծութեան եւ շնորհակալութեան ձայնով, Տօնախմբող բազմութեան հետ։

Ինչո՞ւ նկուն ես, ո՛վ իմ անձս, Եւ ինչո՞ւ իմ ներսս կ’ալեկոծիս. Աստուծո՛յ յուսա, քանի տակաւին պիտի ներբողեմ զայն՝ Իր ⁴փրկարար ներկայութեան՝՝ համար։

Ո՛վ իմ Աստուածս, անձս իմ ներսս նկուն է. Հետեւաբար քեզ կը յիշեմ Յորդանանի երկրէն, Հերմոններէն ու ⁵Փոքր լեռնէն։

Անդունդը կը գոչէ անդունդին՝ քու յորձանքներուդ աղմուկով. Քու բոլոր կոհակներդ եւ ալիքներդ իմ վրայէս անցան։

Ցերեկը՝ Տէրը պիտի պատուիրէ իր կարեկցութեան, Ու գիշերը՝ իր երգը ինծի հետ պիտի ըլլայ, Իմ աղօթքս՝ կեանքիս Աստուծոյն։

Աստուծոյ՝ իմ Ժայռիս պիտի ըսեմ. «Ինչո՞ւ զիս մոռցեր ես, Ինչո՞ւ մռայլ շրջիմ՝ Թշնամիէն տանջուած»։

Հակառակորդներս զիս կը նախատեն՝ ոսկորներս ջախջախելու պէս, Ամէն օր ինծի ըսելով. «Ո՞ւր է քու Աստուածդ»։

Ինչո՞ւ նկուն ես, ո՛վ իմ անձս, Եւ ինչո՞ւ իմ ներսս կ’ալեկոծիս. Աստուծո՛յ յուսա, քանի տակաւին պիտի ներբողեմ զայն. Ա՛ն է իմ երեսիս փրկութիւնը եւ իմ Աստուածս։