Psalm 44

Job  «  Psalm 43  ‹  Psalm 44  ›  Psalm 45  »  Proverbs

ԱՂՕԹՔ՝ ՊԱՇՏՊԱՆՈՒԹԵԱՆ ՀԱՄԱՐ Գլխաւոր երաժիշտին. Կորխի որդիներուն երգը։

Ո՛վ Աստուած, մեր ականջներով լսեցինք, Մեր հայրերը մեզի պատմեցին Այն գործը՝ որ իրենց ժամանակին մէջ կատարեցիր, Վաղեմի օրերը։

Քու ձեռքո՛վդ հեթանոսները վտարեցիր, Ու ¹զանոնք տնկեցիր. ²Ժողովուրդները չարչարեցիր, Եւ զանոնք տարածեցիր։

Արդարեւ ո՛չ թէ իրենց սուրով տիրացան երկրին, Ո՛չ ալ իրենց բազուկը զիրենք ազատեց, Հապա քո՛ւ աջ ձեռքդ, քո՛ւ բազուկդ եւ քո՛ւ երեսիդ լոյսը, Որովհետեւ անոնց բարեհաճեցար։

Դո՛ւն ես իմ Թագաւորս, ո՛վ Աստուած. Դո՛ւն ³ապահովէ Յակոբի փրկութիւնը։

Քեզմո՛վ մեր թշնամիները պիտի զարնենք. Քո՛ւ անունովդ մեզի դէմ կանգնողները պիտի կոխկռտենք։

Արդարեւ աղեղիս չեմ վստահիր, Ու սուրս զիս չի կրնար ազատել.

Հապա դո՛ւն մեզ կ’ազատես մեր թշնամիներէն, Ու մեզ ատողները կ’ամչցնես։

Ամէն օր Աստուծմով կը պարծենանք, Եւ քու անունդ յաւիտեան պիտի ներբողենք։ (Սելա։)

Սակայն մեզ մերժեցիր ու խայտառակեցիր, Եւ մեր զօրքերուն հետ ⁴չեկար։

Թշնամիին առջեւ մեզի նահանջել տուիր, Ու մեզ ատողները մեզ կողոպտեցին իրենց համար։

Մեզ մատնեցիր՝ ոչխարի պէս ուտելիք ըլլալու, Եւ մեզ ցրուեցիր հեթանոսներուն մէջ։

Քու ժողովուրդդ ոչինչ գինով ծախեցիր, Ու քու հարստութիւնդ չաւելցուցիր անոնց գինով։

Մեր դրացիներուն առջեւ՝ մեզ նախատինք ըրիր, Մեր շուրջը եղողներուն՝ ծաղր ու ծանակ։

Մեզ հեթանոսներուն մէջ ⁵նշաւակ ըրիր, Եւ ⁶ժողովուրդներուն մէջ՝ գլուխ շարժելու պատճառ։

⁷Ամէն ատեն՝՝ իմ նախատինքս առջեւս է, Ու երեսիս ամօթը զիս կը ծածկէ՝

Նախատողին եւ հայհոյողին ձայնին ⁸պատճառով, Թշնամիին ու վրէժխնդիրին պատճառով։

Այս բոլորը մեր վրայ հասաւ, Սակայն մենք քեզ չմոռցանք եւ քու ուխտդ չժխտեցինք։

Մեր սիրտերը չընկրկեցան, Ո՛չ ալ մեր քայլերը քու ուղիէդ շեղեցան,

Թէպէտ շնագայլերուն եղած տեղը ճզմեցիր մեզ, Ու մահուան շուքով ծածկեցիր մեզ։

Եթէ մեր Աստուծոյն անունը մոռցեր ենք, Կամ օտար աստուծոյ ⁹երկարեր ենք մեր ձեռքերը,

Միթէ Աստուած այս բանը պիտի չհետազօտէ՞, Քանի ի՛նք գիտէ սիրտին ¹⁰գաղտնիքները։

Բայց քեզի՛ համար ամէն օր կը սպաննուինք, Սպանդանոցի ոչխարի պէս կը սեպուինք։

Սթափէ՛, ո՛վ Տէր, ինչո՞ւ կը քնանաս. Արթնցի՛ր, ընդմիշտ մի՛ մերժեր մեզ։

Ինչո՞ւ երեսդ կը ծածկես, Մեր տառապանքն ու տանջանքը կը մոռնաս։

Արդարեւ մեր անձը մինչեւ հողը ¹¹ցածցաւ, Մեր փորը գետինը փակաւ։

Կանգնէ՛, օգնէ՛ մեզի, Ու փրկէ՛ մեզ՝ քու կարեկցութեանդ պատճառով։