Psalm 49

Job  «  Psalm 48  ‹  Psalm 49  ›  Psalm 50  »  Proverbs

ՀԱՐՍՏՈՒԹԵԱՆ ՎՍՏԱՀԵԼՈՒ ՅԻՄԱՐՈՒԹԻՒՆԸ Գլխաւոր երաժիշտին. Կորխի որդիներուն սաղմոսը։

¹Լսեցէ՛ք ասիկա, ո՛վ բոլոր ազգեր, Ունկնդրեցէ՛ք, աշխարհի բոլոր բնակիչներ,

Ռամիկներ եւ ազնուականներ, Հարուստներ եւ աղքատներ, հաւասարապէս։

Բերանս իմաստութիւն պիտի արտայայտէ, Ու սիրտիս խորհրդածութիւնը՝ հանճար։

Իմ ականջս առակի պիտի դարձնեմ, Հանելուկս քնարով պիտի լուծեմ։

Ինչո՞ւ վախնամ վատ օրերու մէջ, Երբ ²հետապնդողներուն անօրէնութիւնը զիս կը շրջապատէ։

Իրենց գոյքերուն վստահողներէն, Եւ իրենց հարստութեան շատութեամբ պարծեցողներէն

Ո՛չ մէկը կրնայ փրկել իր եղբայրը, Ո՛չ ալ անոր փրկանքը Աստուծոյ հատուցանել,

(Արդարեւ սուղ է անոնց անձին փրկութեան գինը. Թող հրաժարի յաւիտենապէս.)

Որպէսզի ապրի ընդմիշտ, Եւ ապականութիւն չտեսնէ։

Արդարեւ կը տեսնէ թէ իմաստունները կը մեռնին, Անմիտն ու անխելքը նոյնպէս կը կորսուին, Եւ իրենց գոյքերը ուրիշներուն կը թողուն։

³Անոնք կը կարծեն՝՝ թէ իրենց տուները յաւիտեան պիտի գոյատեւեն, Ու իրենց բնակարանները՝ սերունդէ սերունդ. ⁴Հողերը իրենց անուններով կը կոչեն։

Բայց մարդը պատիւի մէջ չի ⁵մնար, Անասուններու նման է, որոնք կը կորսուին։

Անոնց այս ճամբան իրենց անմտութիւնն է, Սակայն անոնց յաջորդները անոնց խօսքերուն պիտի հաւանին։ (Սելա։)

Անոնք ոչխարներու պէս ⁶դժոխքը պիտի դրուին, Մա՛հը զանոնք պիտի արածէ. Առտուն ուղիղնե՛րը անոնց պիտի տիրապետեն, Անոնց կերպարանքը պիտի ⁷կորսուի, Իրենց բնակութիւնը դժոխքին մէջ պիտի ըլլայ։

Սակայն Աստուած դժոխքին ⁸տիրապետութենէն պիտի փրկէ իմ անձս, Որովհետեւ զիս պիտի ընդունի։ (Սելա։)

Մի՛ վախնար՝ երբ մարդ մը հարստանայ, Եւ անոր տան փառքը շատնայ.

Որովհետեւ երբ մեռնի՝ ոչինչ պիտի ⁹տանի իրեն հետ, Ու իր փառքը իր ետեւէն պիտի չիջնէ։

Թէպէտ իր անձը կ’օրհնէր՝ մինչ կ’ապրէր, (Քեզ կը ներբողեն՝ երբ դուն քեզի բարիք ընես,)

Սակայն իր նախահայրերուն սերունդին պիտի երթայ. Անոնք ամենեւին լոյս պիտի չտեսնեն։

Մարդը՝ որ ¹⁰կը պատուուի՝՝ բայց չի հասկնար՝ Անասուններու կը նմանի, որոնք կը կորսուին։