Psalm 50

Job  «  Psalm 49  ‹  Psalm 50  ›  Psalm 51  »  Proverbs

ՃՇՄԱՐԻՏ ՊԱՇՏԱՄՈՒՆՔԸ Ասափի սաղմոսը

Հզօր Աստուածը՝ Տէրը խօսեցաւ, Ու երկիրը կանչեց արեւելքէն մինչեւ արեւմուտք։

Սիոնէն՝ գեղեցկութեան կատարելութենէն Աստուած փայլեցաւ։

Մեր Աստուածը պիտի գայ եւ պիտի չլռէ. Անոր առջեւ սպառող կրակ պիտի ըլլայ, Ու շուրջը՝ սաստիկ մրրիկ։

Երկինքը վերէն պիտի կանչէ, Նաեւ երկիրը՝ իր ժողովուրդը դատելու համար, ըսելով.

«Հաւաքեցէ՛ք ինծի իմ բարեպաշտներս, Ինծի հետ զոհով ուխտ կնքողները»։

Երկինքը անոր արդարութիւնը պիտի հռչակէ, Որովհետեւ Աստուած՝ ինքն է դատաւորը։ (Սելա։)

«Լսէ՛, ո՛վ իմ ժողովուրդս, պիտի խօսիմ. Ո՛վ Իսրայէլ, քեզի դէմ պիտի վկայեմ. Ես Աստուած եմ, քո՛ւ Աստուածդ։

Քու զոհերուդ համար չէ որ քեզ կը յանդիմանեմ, Կամ ողջակէզներուդ համար՝ որոնք շարունակ իմ առջեւս են։

Քու տունէդ զուարակ չեմ առներ, Ո՛չ ալ քու փարախներէդ՝ նոխազներ.

Որովհետեւ իմս են անտառին բոլոր գազանները, Հազարաւոր լեռներուն անասունները։

Ես կը ճանչնամ լեռներուն բոլոր թռչունները, Ու դաշտի ¹գազանները իմ քովս են՝՝։

Եթէ անօթենամ՝ քեզի պիտի չըսեմ. Քանի իմս է երկրագունդը, նաեւ ²անոր լիութիւնը՝՝։

Միթէ ես ցուլերու միս կ’ուտե՞մ, Կամ նոխազներու արիւն կը խմե՞մ։

³Շնորհակալութեա՛ն զոհ մատուցանէ՝՝ Աստուծոյ, Կատարէ՛ ուխտերդ Ամենաբարձրին,

Եւ ինծի՛ գոչէ տագնապի օրը. Ես քեզ պիտի ազատեմ, ու դուն զիս պիտի փառաւորես»։

Սակայն Աստուած ամբարիշտին կ’ըսէ. «Քեզի ի՞նչ՝ որ դուն իմ կանոններս կը թուես, Իմ ուխտս բերանդ կ’առնես։

Արդարեւ դուն խրատը ատեցիր, Եւ իմ խօսքերս ետեւդ ձգեցիր.

Գողը տեսնելով՝ անոր հաւանեցար, Ու շնացողներուն բաժնեկից եղար.

Բերանդ չարախօսութեան ⁴կը յանձնես՝՝, Եւ լեզուդ ⁵խաբէութիւն կը հնարէ՝՝.

Կը նստիս ու եղբօրդ դէմ կը խօսիս, Մօրդ որդին կը վարկաբեկես։

Այս բաները ըրիր, ու ես լռեցի. Կարծեցիր թէ ես բոլորովին քեզի պէս եմ։ Բայց քեզ պիտի յանդիմանեմ, Եւ աչքերուդ առջեւ պիտի զետեղեմ քու ըրածներդ։

Ուրեմն հասկցէ՛ք ասիկա, դուք որ Աստուած կը մոռնաք, Որ ձեզ չբզքտեմ եւ ո՛չ մէկ ազատող ըլլայ։

⁶Շնորհակալութեան զոհ մատուցանողը՝՝ զիս կը փառաւորէ. Եւ իր ճամբային ⁷ուշադիր եղողին՝՝ Ցոյց պիտի տամ Աստուծոյ փրկութիւնը»։