Psalm 63

Job  «  Psalm 62  ‹  Psalm 63  ›  Psalm 64  »  Proverbs

ՓԱՓԱՔ ԱՍՏՈՒԾՈՅ ՀԱՆԴԷՊ Դաւիթի սաղմոսը, երբ Յուդայի անապատին մէջ էր։

Ո՛վ Աստուած, դո՛ւն ես իմ Աստուածս. Արշալոյսին քե՛զ կը փնտռեմ։ Անձս կը ծարաւնայ քեզի, ու մարմինս կը կարօտնայ քեզ, Անջրդի եւ ծարաւուտ երկրի մը մէջ՝ ուր ջուր չկայ,

Քու զօրութիւնդ ու փառքդ տեսնելու համար՝ Ինչպէս քեզ դիտած եմ սրբարանին մէջ։

Քանի քու կարեկցութիւնդ կեանքէն լաւ է, Իմ շրթունքս քեզ պիտի դրուատէ։

Այսպէս՝ քեզ պիտի օրհնաբանեմ որքան ատեն որ ապրիմ, Քու անունովդ ձեռքերս պիտի բարձրացնեմ։

Իմ անձս պիտի կշտանայ՝ իբր թէ ճարպով ու պարարտութեամբ, Եւ իմ բերանս պիտի գովաբանէ քեզ ցնծութեան շրթունքով։

Երբ անկողինիս վրայ քեզ կը յիշեմ, Գիշերուան պահերուն մէջ քու մասիդ կը խորհրդածեմ.

Որովհետեւ ինծի օգնական եղար, Ու քու թեւերուդ հովանիին տակ պիտի ցնծամ։

Իմ անձս քեզի կը յարի, Քու աջ ձեռքդ ինծի նեցուկ կ’ըլլայ.

Բայց անոնք որ անձս կը փնտռեն՝ զայն ¹կորսնցնելու համար, Երկրի ստորին մասերը պիտի մտնեն,

²Սուրով պիտի իյնան՝՝, ³Աղուէսներու բաժին պիտի ըլլան։

Բայց թագաւորը Աստուծմով պիտի ուրախանայ. Ո՛վ որ անով երդում ընէ՝ պիտի պարծենայ, Իսկ ստախօսներուն բերանը պիտի փակուի։