Psalm 69

Job  «  Psalm 68  ‹  Psalm 69  ›  Psalm 70  »  Proverbs

ՕԳՆՈՒԹԵԱՆ ԱՂԵՐՍ Գլխաւոր երաժիշտին. Շոշանիմի վրայ. Դաւիթի սաղմոսը։

Փրկէ՛ զիս, ո՛վ Աստուած, Որովհետեւ ջուրերը իմ անձիս հասան։

Խորունկ ցեխի մէջ կը մխրճուիմ՝ Ուր կայնելու տեղ չկայ։ Ջուրերուն խորերը մտայ, Ու հոսանքները զիս ընկղմեցին։

¹Գոչելէն յոգնեցայ, կոկորդս հրաբորբոք է. Աչքերս նուաղեցան իմ Աստուծոյս սպասելէն։

Առանց ²պատճառի զիս ատողները գլուխիս մազերէն շատ են. Ընդունայն ինծի թշնամանալով զիս բնաջնջել ուզողները զօրացան. ³Ի՞նչպէս վերադարձնեմ ինչ որ յափշտակած չեմ։

Ո՛վ Աստուած, դուն գիտես իմ յիմարութիւնս, Ու յանցանքներս քեզմէ ծածկուած չեն։

Քեզի յուսացողները իմ պատճառովս թող չամչնան, Ո՛վ Տէր, զօրքերո՛ւ Տէր. Քեզ փնտռողները իմ պատճառովս թող չխայտառակուին, Ո՛վ Իսրայէլի Աստուածը։

Արդարեւ ⁴քեզի համար՝՝ նախատինք կրեցի, ⁵Ամօթը ծածկեց երեսս։

Եղբայրներուս օտար եղայ, Եւ մօրս որդիներուն՝ ⁶անծանօթ.

Որովհետեւ քու տանդ նախանձախնդրութիւնը զիս կլանեց, Ու քեզ ⁷անարգողներուն նախատինքները իմ վրաս ինկան։

Երբ լացի եւ անձս ծոմապահութեամբ խոնարհեցուցի, Ասիկա ինծի նախատինք եղաւ.

Նաեւ քուրձը ինծի հանդերձ ընելով՝ Անոնց ⁸նշաւակ դարձայ։

Դուռը նստողները իմ մասիս կը խօսին, Ու գինեմոլներու տաղերգութեան նիւթը եղայ։

Բայց ես քեզի՛ կ’ուղղեմ իմ աղօթքս, Ո՛վ Տէր, ⁹պատեհ ժամանակին։ Ո՛վ Աստուած, քու մեծ կարեկցութեամբդ Պատասխանէ՛ ինծի՝ քու փրկութեանդ ճշմարտութեամբ։

Հանէ՛ զիս ¹⁰սիկէն՝ որ չմխրճուիմ, Եւ ազատիմ զիս ատողներէն ու խորունկ ջուրերէն։

Ջուրերուն հոսանքը զիս թող չընկղմէ, Խորխորատը զիս թող չկլլէ, Եւ ¹¹ջրհորը իր բերանը վրաս թող չգոցէ։

Պատասխանէ՛ ինծի, ո՛վ Տէր, Որովհետեւ քու կարեկցութիւնդ ¹²քաղցր է։ Դարձի՛ր ինծի՝ քու առատ գթութեանդ համաձայն,

Ու երեսդ մի՛ ծածկեր քու ծառայէդ, Որովհետեւ տագնապի մէջ եմ։ Շտապելո՛վ պատասխանէ ինծի.

Մօտեցի՛ր իմ անձիս եւ ազատէ՛ զայն, Փրկէ՛ զիս՝ իմ թշնամիներուս պատճառով։

Դուն գիտես իմ նախատինքս, ամօթս ու խայտառակութիւնս. Բոլոր հակառակորդներս քու առջեւդ են։

Նախատինքը սիրտս կոտրեց, եւ հիւանդացայ. Ցաւակից մը ակնկալեցի, բայց ո՛չ մէկը կար. Մխիթարիչ փնտռեցի՝ բայց չգտայ։

Հապա կերակուրի տեղ թոյն տուին ինծի, Ու ծարաւցած ատենս՝ քացախ խմցուցին ինծի։

Անոնց սեղանը իրենց առջեւ վարմ թող ըլլայ, Եւ ¹³յաջողութիւնը՝ որոգայթ։

Անոնց աչքերը թող խաւարին՝ որպէսզի չտեսնեն. Անոնց մէջքերը շա՛րունակ դողացուր։

Քու սրտմտութիւնդ թափէ՛ անոնց վրայ, Ու բորբոքած բարկութիւնդ թող հասնի անոնց վրայ։

Անոնց ¹⁴բնակարանը ամայի թող ըլլայ, Եւ անոնց վրաններուն մէջ ո՛չ մէկը բնակի.

Որովհետեւ անոնք կը հալածեն ա՛ն՝ որ դուն զարկիր, Եւ կը խօսին քու վիրաւորածներուդ կոտտանքին մասին։

Անոնց անօրէնութեան վրայ անօրէնութի՛ւն ¹⁵աւելցուր, Որպէսզի քու արդարութեանդ չհասնին։

Կեանքի գիրքէն թող ջնջուին, Եւ արդարներուն հետ չարձանագրուին։

Բայց ես դժբախտ ու վշտաբեկ եմ. Ո՛վ Աստուած, քու փրկութիւնդ թող պաշտպանէ զիս։

Աստուծոյ անունը պիտի գովաբանեմ երգով, Ու զայն պիտի մեծարեմ ներբողով։

Ասիկա եղջերաւոր ու կճղակաւոր եզէն կամ զուարակէն Աւելի՛ ¹⁶հաճելի պիտի ըլլայ Տէրոջ։

Հեզերը պիտի տեսնեն եւ ուրախանան. Ո՛վ Աստուած փնտռողներ, ձեր սիրտն ալ պիտի ապրի,

Որովհետեւ Տէրը աղքատները կը լսէ, Եւ իր ¹⁷բանտարկեալները չ’արհամարհեր։

Երկինքն ու երկիրը թող գովաբանեն զայն, Նաեւ ծովը եւ բոլոր անոր մէջ շարժողները.

Արդարեւ Աստուած Սիոնը պիտի փրկէ, Յուդայի քաղաքները պիտի կառուցանէ, Եւ հոն պիտի բնակին ու տիրանան անոր։

Իր ծառաներուն զարմը պիտի ժառանգէ զայն, Եւ իր անունը սիրողները անոր մէջ պիտի բնակին։