Psalm 71

Job  «  Psalm 70  ‹  Psalm 71  ›  Psalm 72  »  Proverbs

ԾԵՐՈՒՆԻԻ ՄԸ ԱՂՕԹՔԸ

Ո՛վ Տէր, քեզի՛ ապաւինեցայ. Երբե՛ք թող չամչնամ։

Ազատէ՛ զիս քու արդարութեամբդ, ու ¹փրկէ՛ զիս. Դարձո՛ւր ականջդ ինծի եւ ազատէ՛ զիս։

²Բնակութեան վէ՛մ եղիր ինծի, Որպէսզի շարունակ հոն երթամ. Դո՛ւն պատուիրեցիր զիս փրկել, Որովհետեւ դո՛ւն ես իմ ժայռս ու բերդս։

Ո՛վ իմ Աստուածս, ազատէ՛ զիս ամբարիշտին ձեռքէն, Անիրաւին եւ բռնաւորին ձեռքէն.

Որովհետեւ դո՛ւն ես իմ յոյսս, ո՛վ Տէր Եհովա. Դո՛ւն ես իմ վստահութիւնս՝ մանկութենէս ի վեր։

Ես քո՛ւ վրադ յենեցայ ³արգանդէն, ⁴Դո՛ւն ես իմ պաշտպանս՝ մօրս որովայնէն՝՝. Դո՛ւն ես շարունակ իմ գովաբանութեանս առարկան։

Հրաշալիքի պէս եմ շատերուն, Բայց դո՛ւն ես իմ ամուր ապաւէնս։

Բերանս քո՛ւ գովաբանութեամբդ լեցուն է, Քո՛ւ պարծանքովդ՝ ամէն օր։

Զիս մի՛ ձգեր ծերութեան ատեն. Զիս մի՛ լքեր՝ երբ ոյժս սպառի։

Արդարեւ թշնամիներս ինծի դէմ կը խօսին, Իմ անձիս վրայ հսկողները միասին կը խորհրդակցին՝

Ըսելով. «Աստուած լքեց զայն. Հետապնդեցէ՛ք ու բռնեցէ՛ք զայն, Քանի ո՛չ մէկը զինք պիտի ազատէ»։

Ո՛վ Աստուած, մի՛ հեռանար ինձմէ. Ո՛վ իմ Աստուածս, արտորա՛ ինծի օգնելու։

Թող ամչնան եւ ⁵բնաջնջուին իմ անձիս ընդդիմացողները, Նախատինքով ու խայտառակութեամբ թող ծածկուին ինծի չարիք ⁶ուզողները։

Բայց ես շարունակ պիտի յուսամ, Եւ քու բոլոր գովաբանութիւններուդ վրայ ուրիշներ պիտի աւելցնեմ։

Բերանս պիտի պատմէ քու արդարութիւնդ, Ամէն օր՝ քու փրկութիւնդ, Քանի անոնց հաշիւը չեմ գիտեր։

Պիտի ⁷քալեմ Տէր Եհովայի զօրութեամբ. Քու արդարութիւնդ պիտի յիշատակեմ, միա՛յն քուկդ։

Ո՛վ Աստուած, մանկութենէս ի վեր սորվեցուցիր ինծի, Ու մինչեւ հիմա քու սքանչելիքներդ հռչակեցի.

Ծերութեանս եւ ալեւորութեանս մէջ ալ Զիս մի՛ լքեր, ո՛վ Աստուած, Մինչեւ որ հռչակեմ քու ⁸կարողութիւնդ յաջորդ սերունդին, Եւ քու զօրութիւնդ բոլոր անոնց՝ որ պիտի գան։

Քու արդարութիւնդ ալ շատ բարձր է, ո՛վ Աստուած. Դուն մեծագործութիւններ կատարեցիր, Քեզի պէս ո՞վ կայ, ո՛վ Աստուած։

Դուն՝ որ բազմաթիւ ու ⁹չարչարալից տագնապներ ¹⁰կրել տուիր՝՝ ինծի, Զիս պիտի վերապրեցնես. Զիս դարձեալ պիտի բարձրացնես երկրի անդունդներէն։

Իմ մեծութիւնս պիտի ¹¹ճոխացնես, Եւ զիս ¹²ամէն կողմէ պիտի հանգստացնես՝՝։

Ես ալ քեզ պիտի ներբողեմ տաւիղով՝ Քու ճշմարտութեանդ համար, ո՛վ իմ Աստուածս. Սաղմոս պիտի երգեմ քեզի քնարով, Ո՛վ Իսրայէլի Սուրբը։

Երբ քեզի սաղմոս երգեմ՝ շրթունքս պիտի ցնծայ, Նաեւ իմ անձս՝ որ դուն փրկեցիր։

Իմ լեզուս ալ ամէն օր քու արդարութիւնդ պիտի ¹³հռչակէ, Որովհետեւ ինծի չարիք ¹⁴ուզողները ամչցան ու շիկնեցան։