Psalm 72

Job  «  Psalm 71  ‹  Psalm 72  ›  Psalm 73  »  Proverbs

ԱՂՕԹՔ՝ ՍՈՂՈՄՈՆ ԹԱԳԱՒՈՐԻՆ ՀԱՄԱՐ Սողոմոնի համար՝՝

Ո՛վ Աստուած, ¹վստահէ՛ քու դատաստաններդ թագաւորին, Եւ արդարութիւնդ՝ թագաւորին որդիին։

Ան արդարութեամբ պիտի դատէ քու ժողովուրդդ, Ու կանոնին համաձայն՝ դժբախտներդ։

Լեռները խաղաղութիւն պիտի բերեն ժողովուրդին, Բլուրներն ալ՝ ²արդարութիւն։

Ժողովուրդին դժբախտներուն դատը պիտի պաշտպանէ, Աղքատին որդիները պիտի ազատէ, Եւ հարստահարիչը պիտի ճզմէ։

Քեզմէ պիտի վախնան՝ ³քանի արեւն ու լուսինը կը մնան՝՝, Սերունդէ սերունդ։

Հնձուած խոտի վրայ իջած անձրեւի պէս պիտի իջնէ, Տարափներու պէս՝ որոնք ⁴գետինը կը կակուղցնեն։

Անոր օրերուն մէջ արդարը պիտի ծաղկի, Եւ ⁵շատ խաղաղութիւն՝՝ պիտի ըլլայ, Մինչեւ որ ա՛լ լուսին չըլլայ։

Ան ծովէ ծով պիտի տիրապետէ, Ու Գետէն մինչեւ երկրի ծայրերը։

Անապատին բնակիչները անոր առջեւ պիտի ⁶ծնրադրեն, Եւ անոր թշնամիները փոշի պիտի լզեն։

Թարսիսի ու կղզիներուն թագաւորները ընծայ պիտի ⁷մատուցանեն, Շաբայի եւ Սաբայի թագաւորները պարգեւ պիտի բերեն։

Բոլոր թագաւորները անոր պիտի երկրպագեն, Բոլոր ազգերը ⁸անոր պիտի ծառայեն՝՝։

Արդարեւ աղքատը պիտի ազատէ՝ երբ աղաղակէ, Դժբախտն ալ, եւ ա՛ն՝ որ օգնական չունի։

Չքաւորին եւ աղքատին պիտի խղճայ, Աղքատներուն անձերը պիտի ազատէ.

Հարստահարութենէ ու բռնութենէ պիտի փրկէ անոնց անձը, Եւ անոնց արիւնը պատուական պիտի ըլլայ իր ⁹առջեւ։

Պիտի ապրի, ու Շաբայի ոսկիէն պիտի տան անոր. Շարունակ պիտի աղօթեն անոր համար, Ամէն օր պիտի օրհնեն զայն։

Ցորենի յորդառատութիւն պիտի ըլլայ երկրին մէջ՝ Լեռներուն գագաթը. Անոր ¹⁰հասկերը Լիբանանի ծառերուն պէս պիտի շարժին. ¹¹Քաղաքացիները գետինի ¹²խոտին պէս պիտի բուսնին։

Անոր անունը յաւիտենական պիտի ըլլայ. Քանի արեւը կը մնայ՝ անոր անունն ալ պիտի մնայ, Ու մարդիկ անով պիտի օրհնուին. Բոլոր ազգերը երանելի պիտի կոչեն զայն։

Օրհնեա՜լ ըլլայ ¹³Տէր Աստուած, Իսրայէլի՛ Աստուածը. Միայն ինքն է սքանչելիքներ ընողը։

Յաւիտեան օրհնեա՜լ ըլլայ իր փառաւոր անունը. Ամբողջ երկիրը թող լեցուի անոր փառքով։ Ամէն ու ամէն։

Յեսսէի որդիին՝ Դաւիթի աղօթքները վերջացան։