Psalm 73

Job  «  Psalm 72  ‹  Psalm 73  ›  Psalm 74  »  Proverbs

ԱՍՏՈՒԾՈՅ ԱՐԴԱՐՈՒԹԻՒՆԸ Ասափի սաղմոսը։

Անտարակոյս Աստուած բարի է Իսրայէլի, Այսինքն՝ վճիտ սիրտ ունեցողներուն։

Բայց քիչ մնաց՝ որ ոտքերս ծռէին, Մազ մնաց՝ որ քայլերս ¹տատանէին։

Արդարեւ նախանձեցայ պարծենկոտներուն՝ Ամբարիշտներուն ²յաջողութիւնը տեսնելով.

Քանի որ ³մինչեւ իրենց մահը՝՝ կապանքներ չունին, Իրենց մարմինն ալ պարարտ է։

Անոնք ուրիշ մարդոց նման տաժանքի մէջ չեն, Ուրիշ մարդոց հետ չեն ⁴ձաղկուիր։

Հետեւաբար յոխորտանքը վզնոցի պէս զանոնք կը շրջապատէ, Բռնութիւնը հանդերձի պէս զանոնք կը ծածկէ։

Անոնց աչքերը ⁵ճարպակալած են՝՝, Իրենց սիրտին պատկերացումները ⁶կը դրսեւորեն՝՝։

Անոնք ⁷կը ծաղրեն՝՝, ու չարութեամբ կը խօսին հարստահարելու մասին. Գոռոզութեամբ կը խօսին։

Իրենց բերանը երկինքի դէմ կը ⁸բանան, Ու իրենց լեզուն երկրի մէջէն կ’ընթանայ։

(Ուստի իր ժողովուրդը հոս կը վերադառնայ, Եւ առատութեամբ ջուր կը ⁹քաշուի անոնց։)

Անոնք կ’ըսեն. «Աստուած ի՞նչպէս կրնայ գիտնալ. Ամենաբարձրին քով գիտութիւն կա՞յ»։

Ահա՛ ասոնք են ամբարիշտները, Որ միշտ անդորրութիւն ունին եւ իրենց հարստութիւնը կը շատցնեն։

Ի՛րապէս պարապ տեղը իմ սիրտս մաքրեցի Ու ձեռքերս անմեղութեամբ լուացի,

Որովհետեւ ամէն օր կը ձաղկուիմ, Ամէն առտու կը յանդիմանուիմ։

Եթէ ըսէի. «Ես այսպէս պիտի խօսիմ», Ահա՛ քու որդիներուդ սերունդին անհաւատարիմ պիտի ըլլայի։

Երբ մտածեցի որ ասիկա հասկնամ՝ Տաժանք թուեցաւ իմ աչքերուս,

Մինչեւ որ Աստուծոյ սրբարանը մտայ, Եւ հասկցայ անոնց վախճանը։

Ի՛րապէս դուն սահուն տեղեր դրեր ես զանոնք, Աւերակներու մէջ պիտի տապալես զանոնք։

Ի՜նչպէս վայրկենապէս ամայութեան մէջ ինկան. Արհաւիրքէն սպառելով կորսուեցան։

Ինչպէս երազ մը՝ մարդուն արթննալէն ետք, Ո՛վ Տէր, ¹⁰արթննալով դուն անոնց պատկերը պիտի արհամարհես։

Մինչ սիրտս ¹¹դառնացած էր Ու ¹²երիկամունքէս խոցուած էի,

Ես՝ անխելք ըլլալով՝ չէի հասկնար, Քու առջեւդ անասուններու պէս էի։

Սակայն ես շարունակ քեզի հետ եմ, Դուն իմ աջ ձեռքէս կը բռնես.

Զիս քու խրատովդ պիտի առաջնորդես, Ու վերջաւորութեան՝ զիս փառքի մէջ պիտի ընդունիս։

Երկինքի մէջ ո՞վ ունիմ. Երկրի վրայ ալ քեզմէ զատ ո՛չ մէկուն կը բաղձամ։

Իմ մարմինս ու սիրտս կը սպառին, Բայց Աստուած իմ սիրտիս վէմը եւ իմ բաժինս է՝ յաւիտենապէս։

Արդարեւ ահա՛ կը կորսուին քեզմէ հեռացողները. Դուն կը բնաջնջես բոլոր անոնք՝ որ կը պոռնկին քեզմէ մոլորելով։

Իսկ ինծի համար Աստուծոյ մօտենալս բարիք է. ¹³Վստահութիւնս դրած եմ Տէրոջ՝ Եհովայի վրայ, Որպէսզի քու բոլոր գործերդ պատմեմ։