Psalm 76

Job  «  Psalm 75  ‹  Psalm 76  ›  Psalm 77  »  Proverbs

ԱՍՏՈՒԱԾ՝ ՅԱՂԹԱԿԱՆԸ Գլխաւոր երաժիշտին. նկինօթի վրայ. Ասափի սաղմոսը. երգ։

Աստուած Յուդայի մէջ ճանչցուած է. Անոր անունը Իսրայէլի մէջ մեծ է։

Անոր ¹խորանը Սաղէմի մէջ է, Եւ անոր բնակավայրը՝ Սիոնի մէջ։

Ինք հոն կոտրտեց աղեղին ²նետերը, Վահանը, սուրը եւ պատերազմի զէնքերը։ (Սելա։)

Դուն աւելի լուսափայլ ու հոյակապ ես՝ Քան որսի լեռները։

³Քաջասիրտները ⁴կողոպտուեցան, Քունի մէջ ⁵թաղուեցան, Կտրիճ մարդոցմէն ո՛չ մէկը իր ձեռքերը ⁶կրցաւ գործածել՝՝։

Ո՛վ Յակոբի Աստուածը, քու սաստիդ պատճառով Կառքն ու ձին թմրեցան։

Դո՛ւն, ո՛վ Տէր, դուն ահեղ ես. Ո՞վ կրնայ կայնիլ քու առջեւդ՝ երբ բարկանաս։

Դուն երկինքէն լսել տուիր դատավճիռը. Երկիրը վախցաւ եւ հանդարտ կեցաւ,

Երբ Աստուած կանգնեցաւ դատավճիռ արձակելու, Որպէսզի երկրի բոլոր հեզերը փրկէ։ (Սելա։)

Ի՛րապէս մարդուն ցասումը քեզ պիտի ներբողէ, Ու մնացած ցասումը դո՛ւն պիտի ⁷զսպես։

Ո՛ւխտ ըրէք Տէրոջ՝ ձեր Աստուծոյն, ու կատարեցէ՛ք. Բոլոր անոր շուրջը եղողները Ընծաներ թող բերեն Ահեղին։

Ինք առաջնորդներուն հոգին պիտի կտրէ, Ինք ահեղ է երկրի թագաւորներուն հանդէպ։