Psalm 83
Job « Psalm 82 ‹ Psalm 83 › Psalm 84 » Proverbs
ԱՂՕԹՔ՝ ԹՇՆԱՄԻՆԵՐՈՒ ՊԱՐՏՈՒԹԵԱՆ ՀԱՄԱՐ Երգ. Ասափի սաղմոսը։
1Ո՛վ Աստուած, մի՛ լռեր. Անձայն մի՛ ըլլար ու հանդարտ մի՛ կենար, ո՛վ Աստուած.
2Որովհետեւ ահա՛ քու թշնամիներդ կը գոռան, Քեզ ատողները գլուխ կը բարձրացնեն։
3Խորամանկութեամբ կը դաւադրեն քու ժողովուրդիդ դէմ, Կը խորհրդակցին քու 1պաշտպանեալներուդ դէմ.
4Կ’ըսեն. «Եկէ՛ք, անհետացնե՛նք զանոնք՝ որպէսզի ազգ չըլլան, Եւ ա՛լ չյիշատակուի Իսրայէլի անունը»։
5Արդարեւ 2միաբանութեամբ խորհրդակցեցան Ու քեզի դէմ դաշինք կնքեցին՝
6Եդովմի վրանները եւ Իսմայելացիները, Մովաբ ու Հագարացիները,
7Գեբաղ, Ամմոն եւ Ամաղէկ, 3Փղշտացիները՝ Տիւրոսի բնակիչներուն հետ։
8Նաեւ Ասուր անոնց միացաւ. Ղովտի որդիներուն ձեռնտու եղան։ (Սելա։)
9Ըրէ՛ անոնց՝ ինչպէս Մադիամի, Ինչպէս Սիսարայի ու Յաբինի ըրիր Կիսոն վտակին քով։
10Անոնք Ենդովրի մէջ բնաջնջուեցան, Աղբ եղան հողին համար։
11Անոնց ազնուականները Օրէբի՛ ու Զէբի՛ պէս ըրէ, Եւ անոնց բոլոր 4նախարարները՝ Զեբէէի ու Սաղմանայի պէս,
12Որոնք ըսին. «Աստուծոյ բնակարաններուն Մե՛նք տիրանանք՝ մեզի համար»։
13Ո՛վ իմ Աստուածս, թաթառի՛ պէս ըրէ զանոնք, Հովին առջեւ եղող խոզանին պէս։
14Ինչպէս կրակը կ’այրէ անտառը, Ու բոցը կը բռնկեցնէ լեռները,
15Ա՛յնպէս հետապնդէ զանոնք քու մրրիկովդ, Շփոթեցո՛ւր զանոնք քու փոթորիկովդ։
16Անարգանքո՛վ 5ծածկէ անոնց երեսը, Որպէսզի քու անունդ փնտռեն, ո՛վ Տէր։
17Թող ամչնան ու յաւերժ շփոթին, Թող շիկնին եւ կորսուին.
18Որպէսզի գիտնան թէ միայն դո՛ւն,— որուն անունը Եհովա է,— Ամենաբարձր ես ամբողջ երկրի վրայ։