Psalm 84

Job  «  Psalm 83  ‹  Psalm 84  ›  Psalm 85  »  Proverbs

ԲԱՂՁԱՆՔ՝ ԱՍՏՈՒԾՈՅ ՏԱՆ ՀԱՆԴԷՊ Գլխաւոր երաժիշտին. կիթթիթի վրայ. Կորխի որդիներուն սաղմոսը։

Ի՜նչպէս սիրելի են քու ¹բնակարաններդ, Ո՛վ զօրքերու Տէր.

Իմ անձս կը կարօտնայ Տէրոջ գաւիթները, Եւ նոյնիսկ կը ²նուաղի անոնց համար. Իմ սիրտս ու մարմինս ցնծութեամբ կը գոչեն Ապրո՛ղ Աստուծոյն։

Ճնճղուկն ալ տուն գտաւ, Ու ծիծեռնակը իրեն բոյն՝ իր ձագերը դնելու համար, Քու զոհասեղաններուդ քով, ո՛վ զօրքերու Տէր, Իմ Թագաւորս եւ Աստուածս։

Երանի՜ անոնց՝ որ քու տանդ մէջ կը բնակին. Անոնք անդադար քեզ պիտի գովաբանեն։ (Սելա։)

Երանի՜ այն մարդոց՝ որոնց զօրութիւնը քեզմէ է, Եւ իրենց սիրտին մէջ տանդ ճամբաները կան։

Արտասուքներու հովիտէն անցնելով՝ ³աղբիւրի կը վերածեն՝՝ զայն. Առաջին անձրեւն ալ ⁴օրհնութիւններով կը ծածկէ զայն՝՝։

Անոնք ⁵հետզհետէ կը զօրանան՝՝, Մինչեւ որ Աստուծոյ առջեւ երեւնան Սիոնի մէջ։

Ո՛վ Տէր, զօրքերո՛ւ Աստուած, լսէ՛ իմ աղօթքս. Ո՛վ Յակոբի Աստուածը, ունկնդրէ՛։ (Սելա։)

Ո՛վ Աստուած, մեր վահա՛նը, տե՛ս. Նայէ՛ քու օծեալիդ երեսին։

Քանի մէ՛կ օրը քու գաւիթներուդ մէջ՝ Հազարէն լաւ է ուրիշ տեղ, Նախընտրեցի իմ Աստուծոյս տան շեմին վրայ կենալ, Քան թէ ⁶ամբարիշտներու վրաններուն մէջ բնակիլ։

Արդարեւ ⁷Տէր Աստուած արեւ ու վահան է. Տէրը շնորհք եւ փառք պիտի տայ. Ո՛չ մէկ բարութիւն պիտի մերժէ Պարկեշտութեամբ ընթացողներուն։

Ո՛վ զօրքերու Տէր, Երանելի՜ է քեզի վստահող մարդը։