Psalm 85

Job  «  Psalm 84  ‹  Psalm 85  ›  Psalm 86  »  Proverbs

ԱՂՕԹՔ՝ ԱԶԳԻՆ ԲԱՐՕՐՈՒԹԵԱՆ ՀԱՄԱՐ Գլխաւոր երաժիշտին. Կորխի որդիներուն սաղմոսը։

Ո՛վ Տէր, դուն հաճեցար քու երկրիդ. Դո՛ւն վերադարձուցիր Յակոբի ¹գերիները,

Ներեցիր քու ժողովուրդիդ անօրէնութիւնը, Ծածկեցիր անոնց բոլոր մեղքերը. (Սելա.)

²Հեռացուցիր քու ամբողջ ցասումդ, Կասեցուցիր քու ³բորբոքած բարկութիւնդ՝՝։

⁴Վերադարձո՛ւր մեզ՝՝, ո՛վ մեր փրկութեան Աստուածը. Դադրեցո՛ւր քու գրգռութիւնդ՝ որ մեզի դէմ է։

Միթէ յաւիտեան պիտի բարկանա՞ս մեզի. Քու բարկութիւնդ սերունդէ սերունդ պիտի երկարաձգե՞ս։

Միթէ մեզ պիտի չվերապրեցնե՞ս, Որպէսզի քու ժողովուրդդ քեզմով ուրախանայ։

Ցո՛յց տուր մեզի, ո՛վ Տէր, քու կարեկցութիւնդ. ⁵Շնորհէ՛ մեզի քու փրկութիւնդ։

Պիտի լսեմ ինչ որ ⁶Տէր Աստուած պիտի խօսի, Որովհետեւ խաղաղութեան մասին պիտի խօսի իր ժողովուրդին եւ իր բարեպաշտներուն, Եթէ անոնք անմտութեան չվերադառնան։

Անտարակոյս իր փրկութիւնը մօտ է իրմէ վախցողներուն, Որպէսզի փառքը բնակի մեր երկրին մէջ։

Կարեկցութիւնն ու ճշմարտութիւնը իրարու հանդիպեցան, Արդարութիւնն ու խաղաղութիւնը զիրար համբուրեցին։

Ճշմարտութիւնը երկրէ պիտի բուսնի, Եւ արդարութիւնը երկինքէն վար պիտի նայի։

Նաեւ Տէրը բարօրութիւն պիտի տայ, Ու մեր գետինը՝ իր արգասիքը։

Արդարութիւնը անոր առջեւէն պիտի երթայ, Եւ ⁷իր քայլերը՝՝ ճամբային մէջ պիտի դնէ։