Psalm 92
Job « Psalm 91 ‹ Psalm 92 › Psalm 93 » Proverbs
ՓԱՌԱԲԱՆՈՒԹԵԱՆ ԵՐԳ Սաղմոս. Շաբաթ օրուան համար երգ։
1Բարի է շնորհակալ ըլլալ Տէրոջմէն, Ու սաղմոս ըսել քու անունիդ, ո՛վ Ամենաբարձր.
2Առտուները քու կարեկցութիւնդ հռչակել, Եւ գիշերները՝ քու հաւատարմութիւնդ,
3Տասը լար ունեցող նուագարանով ու տաւիղով, Եւ քնարի 1ձայնով։
4Արդարեւ դուն, ո՛վ Տէր, քու արարքներովդ զիս ուրախացուցիր. Քու ձեռքերուդ գործերով պիտի ցնծամ։
5Ո՛վ Տէր, ի՜նչ մեծ են քու գործերդ. Յոյժ խորունկ են քու մտածումներդ։
6Անխելք մարդը ասիկա չի գիտեր, Եւ անմիտը չի հասկնար։
7Թէեւ ամբարիշտները 2խոտի պէս 3բուսնին, Ու բոլոր անօրէնութիւն գործողները 4ծաղկին, Յաւերժ պիտի բնաջնջուին.
8Բայց դուն, ո՛վ Տէր, յաւիտեան բարձր ես։
9Արդարեւ ահա՛ քու թշնամիներդ, ո՛վ Տէր, Ահա՛ քու թշնամիներդ պիտի կորսուին, Բոլոր անօրէնութիւն գործողները պիտի ցրուին,
10Բայց իմ եղջիւրս 5գոմէշի եղջիւրին պէս պիտի բարձրացնես. Ես 6թարմ իւղով պիտի օծուիմ։
11Աչքերս 7ոսոխներուս կորուստը պիտի տեսնեն, Եւ ականջներս ինծի դէմ կանգնող չարագործներուն կրած պատիժը պիտի լսեն։
12Արդարը արմաւենիի պէս պիտի ծաղկի, Լիբանանի մայրիի պէս պիտի մեծնայ։
13Տէրոջ տան մէջ տնկուածները՝ Մեր Աստուծոյն գաւիթներուն մէջ պիտի ծաղկին.
14Ալեւորութեան մէջ ալ պտուղ պիտի արտադրեն, Պարարտ ու կանաչ պիտի մնան,
15Որպէսզի հռչակեն թէ Տէրը ուղիղ է. Ան իմ Վէմս է, եւ անիրաւութիւն չկայ անոր քով։