Psalm 94

Job  «  Psalm 93  ‹  Psalm 94  ›  Psalm 95  »  Proverbs

ԱՍՏՈՒԱԾ՝ ԲՈԼՈՐԻՆ ԴԱՏԱՒՈՐԸ

Ո՛վ Տէր, ¹վրէժխնդի՛ր Աստուած, Ո՛վ վրէժխնդիր Աստուած, ²յայտնուէ՛։

Բարձրացի՛ր, ո՛վ երկրի Դատաւոր. Փոխարէ՛ն հատուցանէ ամբարտաւաններուն։

Մինչեւ ե՞րբ ամբարիշտները, ո՛վ Տէր, Մինչեւ ե՞րբ ամբարիշտները պիտի հրճուին.

Մինչեւ ե՞րբ պիտի բարբանջեն, անպատկառութեամբ պիտի խօսին, Ու պիտի ³պարծենան՝ բոլոր անօրէնութիւն գործողները։

Ո՛վ Տէր, անոնք քու ժողովուրդդ կը ճզմեն, Եւ քու ժառանգութիւնդ կը տառապեցնեն.

Այրին ու գաղթականը կը սպաննեն, Որբերը կը մեռցնեն

Եւ կ’ըսեն. «Տէրը չի տեսներ, Յակոբի Աստուածը ⁴ուշադրութիւն չի դարձներ՝՝»։

Հասկցէ՛ք, ո՛վ ժողովուրդին անխելքները. Ու դո՛ւք, ո՛վ անմիտներ, ե՞րբ ուշիմ պիտի ըլլաք։

Միթէ ականջը տնկողը չի՞ լսեր, Աչքը ձեւակերպողը չի՞ տեսներ։

Միթէ ազգերը խրատողը չի՞ յանդիմաներ. Միթէ մարդուն գիտութիւն սորվեցնողը չի՞ գիտեր։

Տէրը գիտէ մարդոց մտածումները, Որոնք ունայնութիւն են։

Երանի՜ այն ⁵մարդուն՝ որ դուն կը խրատես, ո՛վ Տէր, Եւ քու Օրէնքդ անոր կը սորվեցնես,

Որպէսզի ձախորդ օրերուն մէջ զինք հանդարտեցնես, Մինչեւ որ ամբարիշտին համար փոս փորուի։

Արդարեւ Տէրը իր ժողովուրդը երեսէ պիտի չձգէ, Եւ իր ժառանգութիւնը պիտի չլքէ.

Հապա դատաստանը ⁶արդարութեամբ պիտի կիրարկուի՝՝, Ու բոլոր սիրտով ուղիղները անոր պիտի հետեւին։

Ո՞վ ⁷դատս պիտի պաշտպանէ՝՝ չարագործներուն դէմ, Ո՞վ ⁸ինծի նեցուկ պիտի ըլլայ՝՝ անօրէնութիւն գործողներուն դէմ։

Եթէ Տէրը օգնականս չըլլար, Քիչ պիտի մնար որ անձս լռութեան տեղը բնակէր։

Երբ կ’ըսէի. «Իմ ոտքս կը սահի», Քու կարեկցութիւնդ, ո՛վ Տէր, զիս կը կազդուրէր.

Մինչ ⁹հոգերս կը շատնային իմ ներսս՝ Քու մխիթարութիւններդ իմ անձս կը հաճոյացնէին։

Միթէ քեզի հետ ընկերակցա՞ծ է եղեռնագործութեան գահը, Որ ¹⁰կանոնին դէմ՝՝ անիրաւութիւն կը ¹¹ծրագրէ։

Արդարին անձին դէմ կը խմբաւորուին, Եւ անմեղ արիւնը կը դատապարտեն։

Բայց Տէրը իմ միջնաբերդս է, Ու իմ Աստուածս՝ ապաւինութեանս վէմը։

Անոնց անօրէնութիւնը իրենց պիտի վերադարձնէ, Ու զանոնք իրենց չարութեամբ պիտի բնաջնջէ. Տէրը՝ մեր Աստուածը՝ զանոնք պիտի բնաջնջէ։