Psalm 97
Job « Psalm 96 ‹ Psalm 97 › Psalm 98 » Proverbs
ԱՍՏՈՒԱԾ՝ ԳԵՐԱԳՈՅՆ ԻՇԽՈՂԸ
1Տէրը կը թագաւորէ, երկիրը թող խայտայ. Շատ կղզիներ թող ուրախանան։
2Անոր շուրջ ամպ եւ մառախուղ կան, Արդարութիւնն ու իրաւունքը անոր գահին խարիսխն են։
3Անոր առջեւէն կրակ կ’երթայ Եւ անոր շրջակայ հակառակորդները կը բոցավառէ։
4Անոր փայլակները երկրագունդը կը լուսաւորեն. Երկիրը կը տեսնէ ու կը սարսափի։
5Լեռները մեղրամոմի պէս կը հալին Եհովայի ներկայութենէն, Ամբողջ երկրի Տէրոջ ներկայութենէն։
6Երկինքը կը հռչակէ անոր արդարութիւնը, Եւ բոլոր ժողովուրդները կը տեսնեն անոր փառքը։
7Թող ամչնան բոլոր անոնք՝ որ 1կուռքեր կը պաշտեն, Որ չաստուածներով կը պարծենան. Ո՛վ բոլոր 2աստուածներ, երկրպագեցէ՛ք անոր։
8Սիոն լսեց եւ ուրախացաւ, Յուդայի 3աղջիկները խայտացին Քու դատավճիռներուդ պատճառով, ո՛վ Տէր։
9Արդարեւ դո՛ւն, ո՛վ Տէր, Ամենաբարձր ես ամբողջ երկրի վրայ. Շատ բարձրացար՝ բոլոր աստուածները գերազանցելով։
10Ո՛վ Տէրը սիրողներ, ատեցէ՛ք չարութիւնը։ Ան իր բարեպաշտներուն անձերը կը պահպանէ, Զանոնք կ’ազատէ ամբարիշտներուն ձեռքէն։
11Արդարին համար լոյս 4ծագեցաւ, Ու սիրտով ուղիղներուն համար՝ ուրախութիւն։
12Տէրոջմո՛վ ուրախացէք, ո՛վ արդարներ, Շնորհակա՛լ եղէք՝ անոր սրբութիւնը յիշելով։