Psalm 103
Job « Psalm 102 ‹ Psalm 103 › Psalm 104 » Proverbs
ԱՍՏՈՒԾՈՅ ՍԷՐԸ
Դաւիթի սաղմոսը։
1Ո՛վ իմ անձս, օրհնաբանէ՛ Տէրը, Եւ ամէն ինչ որ իմ ներսս է՝ անոր սուրբ անունը.
2Ո՛վ իմ անձս, օրհնաբանէ՛ Տէրը, Ու մի՛ մոռնար անոր բոլոր երախտիքները։
3Ի՛նք կը ներէ բոլոր անօրէնութիւններդ, Եւ կը բուժէ բոլոր հիւանդութիւններդ։
4Ի՛նք կը փրկէ կեանքդ ապականութենէն, Ու կը 1պսակէ քեզ կարեկցութեամբ եւ գթութեամբ։
5Ի՛նք կը կշտացնէ 2բերանդ բարիքներով, Եւ 3կ’երիտասարդացնէ քեզ՝՝ արծիւի պէս։
6Տէրը արդարութիւն ու իրաւունք կը կիրարկէ Բոլոր հարստահարուածներուն.
7Ան իր ճամբաները Մովսէսի ճանչցուց, Եւ իր արարքները՝ Իսրայէլի որդիներուն։
8Գթած ու ողորմած է Տէրը, Համբերատար եւ մեծապէս կարեկից։
9Ան ընդմիշտ 4դատ չի վարեր՝՝, Յաւիտեան զայրոյթ չի պահեր։
10Ան մեր մեղքերուն համեմատ չվարուեցաւ մեզի հետ, Ու մեր անօրէնութիւններուն համեմատ չհատուցանեց մեզի։
11Հապա ո՛րչափ երկինքը 5երկրէն բարձր է, Ա՛յնչափ իր կարեկցութիւնը 6մեծ է իրմէ վախցողներուն վրայ.
12Ո՛րչափ արեւելքը արեւմուտքէն հեռու է, Ա՛յնչափ հեռացուց մեզմէ մեր յանցանքները։
13Ինչպէս հայր մը կը գթայ իր որդիներուն վրայ, Նոյնպէս ալ Տէրը կը գթայ իրմէ վախցողներուն վրայ.
14Որովհետեւ ան գիտէ մեր 7կազմուածքը, Կը յիշէ թէ մենք 8հող ենք։
15Մարդուն օրերը խոտի պէս են, Դաշտի ծաղիկի պէս կը 9ծաղկի.
16Արդարեւ հովը անոր վրայէն կ’անցնի ու ան կը չքանայ, Եւ անոր տեղը ա՛լ չի ճանչնար զայն։
17Բայց Տէրոջ կարեկցութիւնը 10դարէ դար՝՝ իրմէ վախցողներուն վրայ է, Եւ անոր արդարութիւնը՝ որդիներու որդիներուն վրայ.
18Անոնց վրայ է՝ որ կը պահեն անոր ուխտը, Ու կը յիշեն անոր հրամանները եւ կը կատարեն։
19Տէրը իր գահը երկինքի մէջ հաստատեց. Անոր թագաւորութիւնը բոլորին վրայ կը տիրէ։
20Օրհնաբանեցէ՛ք Տէրը, դո՛ւք՝ անոր հրեշտակները, որ ոյժով զօրաւոր էք, Որ իր հրահանգները կը գործադրէք՝ անոր խօսքին ձայնը մտիկ ընելով։
21Օրհնաբանեցէ՛ք Տէրը, դո՛ւք՝ անոր բոլոր զօրքերը, Անոր կամքը գործադրող 11պաշտօնեաները։
22Օրհնաբանեցէ՛ք Տէրը, դո՛ւք՝ անոր բոլոր գործերը, Անոր տէրութեան բոլոր տեղերուն մէջ. Օրհնաբանէ՛ Տէրը, ո՛վ իմ անձս։