Psalm 106

Job  «  Psalm 105  ‹  Psalm 106  ›  Psalm 107  »  Proverbs

ՏԷՐՈՋ ԲԱՐՈՒԹԻՒՆԸ ԻՐ ԺՈՂՈՎՈՒՐԴԻՆ ՀԱՆԴԷՊ

Ալէլուիա՜։ Շնորհակա՛լ եղէք Տէրոջմէն, որովհետեւ բարի է, Որովհետեւ անոր կարեկցութիւնը յաւիտենական է։

Ո՞վ պիտի պատմէ Տէրոջ քաջագործութիւնները. Ո՞վ պիտի իմացնէ անոր ամբողջ գովաբանութիւնը։

Երանի՜ անոնց՝ որ իրաւունքը կը պահեն, Եւ ամէն ժամանակ արդարութիւնը կը կիրարկեն։

Յիշէ՛ զիս, ո՛վ Տէր, քու ժողովուրդիդ վրայ ունեցած բարեհաճութեանդ համեմատ, Այցելէ՛ ինծի քու փրկութեամբդ,

Որպէսզի քու ընտրեալներուդ բարօրութիւնը տեսնեմ, Քու ազգիդ ուրախութեամբ ուրախանամ, Քու ժառանգութեամբդ պարծենամ։

Մենք մեր հայրերուն հետ մեղանչեցինք. Անօրէնութիւն գործեցինք, ամբարշտութեամբ վարուեցանք։

Մեր հայրերը Եգիպտոսի մէջ չհասկցան քու սքանչելիքներդ, Չյիշեցին քու կարեկցութեանդ շատութիւնը, Հապա ընդվզեցան ծովուն քով, Կարմիր ծովուն քով։

Բայց զանոնք փրկեց իր անունին համար, Որպէսզի իր մեծ զօրութիւնը գիտցնէ։

Կարմիր ծովը սաստեց՝ ու ցամքեցաւ, Եւ անդունդներուն մէջէն քալել տուաւ անոնց, իբր թէ անապատի մէջէն.

Ազատեց զանոնք ¹ոսոխին ձեռքէն, Փրկեց զանոնք թշնամիին ձեռքէն։

Ջուրերը ծածկեցին անոնց թշնամիները. Անոնցմէ ո՛չ մէկը մնաց։

Այն ատեն հաւատացին անոր խօսքին Եւ գովաբանութիւն երգեցին անոր։

Շուտով մոռցան անոր գործերը, Ու չսպասեցին անոր ծրագիրին իրագործումին։

²Յոյժ ցանկացին՝՝ անապատին մէջ, Աստուած փորձեցին ամայութեան մէջ.

Ինք ալ անոնց տուաւ իրենց խնդրածը, Բայց ուժաթափութիւն ղրկեց անոնց անձերուն։

Երբ Մովսէսի նախանձեցան բանակավայրին մէջ, Եւ Տէրոջ սուրբին՝ Ահարոնի.

Երկիրը բացուեցաւ ու կլլեց Դաթանը, Եւ ծածկեց Աբիրոնի խումբը։

Կրակը վառեցաւ անոնց խումբին մէջ, Բոցը բռնկեցուց ամբարիշտները։

Հորթ շինեցին Քորեբի մէջ, Ու երկրպագեցին ձուլածոյ պատկերին։

Փոխանակեցին իրենց Փառքը ³Խոտակեր եզի կերպարին հետ։

Մոռցան իրենց Փրկիչը՝ Աստուած, Որ մեծագործութիւններ կատարեց Եգիպտոսի մէջ,

Սքանչելիքներ՝ Քամի երկրին մէջ, Եւ ահաւոր արարքներ՝ Կարմիր ծովուն մէջ։

Ուստի ըսաւ թէ զանոնք պիտի բնաջնջէ, Բայց անոր ընտրեալը՝ Մովսէս, Խրամատին մէջ կայնեցաւ անոր առջեւ, Անոր ցասումը կասեցնելու համար, որպէսզի չկոտորէ։

Նաեւ այն ցանկալի երկիրը անարգեցին, Եւ անոր խօսքին չհաւատացին.

Իրենց վրաններուն մէջ տրտնջեցին, Տէրոջ ձայնին չհնազանդեցան։

Ուստի անոնց համար ⁴երդում ըրաւ՝՝ Որ զանոնք անապատին մէջ տապալէ,

Ու անոնց զարմը ազգերուն մէջ տապալէ՝ Զանոնք բոլոր երկիրներուն մէջ ցրուելով։

Յետոյ Բահաղ-Փէովրի յարեցան, Մեռելներուն զոհերը կերան,

Եւ իրենց գործերով Տէրը գրգռեցին. Ուստի անոնց վրայ պատուհաս ⁵հասաւ։

Այն ատեն Փենեհէս կայնեցաւ եւ իրաւարար եղաւ, Ու պատուհասը դադրեցաւ.

Ասիկա անոր արդարութիւն սեպուեցաւ՝ Սերունդէ սերունդ, յաւիտենապէս։

Նաեւ զայրացուցին Տէրը Մերիպայի ջուրերուն քով, Եւ իրենց պատճառով Մովսէս դժբախտացաւ.

Արդարեւ դառնացուցին անոր հոգին, Ան ալ իր շրթունքով անխոհեմաբար խօսեցաւ։

Չբնաջնջեցին ժողովուրդները՝ Ինչպէս Տէրը հրամայեր էր անոնց,

Հապա հեթանոսներուն հետ խառնուեցան. Անոնց արարքները սորվեցան

Անոնց կուռքերը պաշտեցին, Եւ անոնք իրենց որոգայթ եղան։

Իրենց որդիներն ու աղջիկները Դեւերուն զոհեցին.

Անմեղ արիւն թափեցին, Իրենց որդիներուն եւ աղջիկներուն արիւնը, Որոնք զոհեցին Քանանի կուռքերուն. Երկիրը պղծուեցաւ արիւնով։

Իրենց արարքներով ⁶ապականեցան, Եւ իրենց ըրածներով պոռնկեցան։

Ուստի Տէրոջ բարկութիւնը բորբոքեցաւ իր ժողովուրդին դէմ, Ու գարշեցաւ իր ժառանգութենէն.

Զանոնք հեթանոսներուն ձեռքը մատնեց, Եւ ⁷անոնց ոսոխները՝՝ իրենց վրայ տիրեցին։

Իրենց թշնամիները տանջեցին զիրենք, Եւ անոնց ձեռքին տակ ընկճուեցան։

Շատ անգամ ազատեց զիրենք, Բայց ընդվզեցան իրենց խորհուրդներով, Ու նուաստացան իրենց անօրէնութիւններուն համար։

Սակայն ինք նայեցաւ անոնց տագնապին՝ Երբ անոնց ⁸պաղատանքը լսեց,

Եւ անոնց համար իր ուխտը յիշեց. Իր մեծ կարեկցութեան համեմատ արգահատեցաւ,

Ու անոնց բոլոր գերեվարներուն առջեւ Գթութիւն գտնել տուաւ անոնց։

Փրկէ՛ մեզ, ո՛վ Տէր, մեր Աստուածը. Հաւաքէ՛ մեզ հեթանոսներուն մէջէն, Որպէսզի քու սուրբ անունդ ներբողենք, Ու քու գովաբանութեամբդ պարծենանք։

Օրհնեա՜լ ըլլայ Տէրը՝ Իսրայէլի Աստուածը, ⁹Դարէ դար՝՝։ Ամբողջ ժողովուրդը թող ըսէ. «Ամէն»։ Ալէլուիա՜։