Psalm 116
Job « Psalm 115 ‹ Psalm 116 › Psalm 117 » Proverbs
ՄԱՀԷՆ ԱԶԱՏՈՒԱԾԻ ՄԸ ԳՈՎԱԲԱՆՈՒԹԻՒՆԸ
1Ես Տէրը կը սիրեմ, Որովհետեւ իմ ձայնս եւ աղաչանքս լսեց.
2Քանի ան իր ականջը ինծի դարձուց, 1Ամբողջ կեանքիս՝՝ մէջ իրեն պիտի գոչեմ։
3Մահուան լարերը զիս պատեցին, Եւ 2դժոխքին տագնապները ինծի պատահեցան. Տագնապ ու տրտմութիւն գտայ։
4Բայց ես Տէրոջ անունը կանչեցի. Կ’աղերսե՛մ, ո՛վ Տէր, փրկէ՛ իմ անձս։
5Տէրը ողորմած եւ արդար է, Մեր Աստուածը գթած է։
6Տէրը միամիտները կը պահպանէ. Ես 3թշուառացած էի, բայց ա՛ն զիս ազատեց։
7Ո՛վ իմ անձս, վերադարձի՛ր քու հանգստութեանդ, Քանի որ Տէրը քեզի երախտիք ըրաւ.
8Արդարեւ դուն ազատեցիր իմ անձս մահէն, Իմ աչքերս՝ արցունքէն, ու ոտքերս՝ անկումէն։
9Տէրոջ առջեւ պիտի ընթանամ Ապրողներու երկրին մէջ։
10Վստահութիւն ունէի՝ նոյնիսկ երբ կ’ըսէի. «Ես մեծապէս տառապեցայ»։
11Իրարանցումիս մէջ ըսի. «Ամէն մարդ ստախօս է»։
12Ի՞նչ հատուցանեմ Տէրոջ՝ Անոր ինծի ըրած բոլոր երախտիքներուն փոխարէն։
13Փրկութեան բաժակը պիտի առնեմ Ու Տէրոջ անունը պիտի կանչեմ.
14Տէրոջ ըրած ուխտերս պիտի կատարեմ Իր ամբողջ ժողովուրդին առջեւ։
15Տէրոջ աչքերուն թանկարժէք է Իր բարեպաշտներուն մահը։
16Կ’աղերսե՛մ, ո՛վ Տէր, որովհետեւ ես քու ծառադ եմ. Քու ծառադ եմ, քու աղախինիդ՝ որդին. Դո՛ւն իմ կապերս քակեցիր։
17Շնորհակալութեան զոհ պիտի մատուցանեմ քեզի, Եւ Տէրոջ անունը պիտի կանչեմ։
18Տէրոջ ըրած ուխտերս պիտի կատարեմ Իր ամբողջ ժողովուրդին առջեւ,
19Տէրոջ տան գաւիթներուն մէջ, Քո՛ւ մէջդ, ո՛վ Երուսաղէմ։ Ալէլուիա՜։