Psalm 132
Job « Psalm 131 ‹ Psalm 132 › Psalm 133 » Proverbs
ԱՂՕԹՔ՝ ՏԱՃԱՐԻՆ ՀԱՄԱՐ Աստիճաններուն երգը։
1Ո՛վ Տէր, յիշէ՛ Դաւիթը Եւ անոր բոլոր տառապանքները։
2Յիշէ՛ թէ երդում ըրաւ Տէրոջ, Ուխտ դրաւ Յակոբի Հզօրին՝ ըսելով.
3«Իմ տանս 1բնակարանը պիտի չմտնեմ Ու փռած անկողինիս վրայ պիտի չբարձրանամ,
4Աչքերուս քուն պիտի չտամ, Ո՛չ ալ կոպերուս՝ մրափ,
5Մինչեւ որ տեղ մը գտնեմ Տէրոջ համար, Բնակարան մը՝ Յակոբի Հզօրին համար»։
6Ահա՛ 2անոր մասին լսեցինք Եփրաթայի մէջ, Եւ զայն գտանք անտառի դաշտերուն մէջ։
7«Մտնե՛նք անոր 3բնակարանները, Ու երկրպագե՛նք անոր պատուանդանին քով»։
8Կանգնէ՛, ո՛վ Տէր, մտի՛ր քու հանգստավայրդ, Դուն եւ քու զօրութեանդ տապանակը։
9Քահանաներդ թող արդարութիւն հագնին, Ու բարեպաշտներդ թող ցնծան։
10Քու ծառայիդ՝ Դաւիթի սիրոյն համար Քու օծեալիդ երեսը մի՛ 4մերժեր։
11Տէրը ճշմարտութեամբ երդում ըրաւ Դաւիթի, Եւ 5զայն պիտի չուրանայ՝՝. «Քու 6ընդերքիդ պտուղէն մէկը Քու գահիդ վրայ պիտի դնեմ։
12Եթէ քու որդիներդ պահեն իմ ուխտս ու վկայութիւններս՝ Որոնք անոնց պիտի սորվեցնեմ, Իրենց որդիներն ալ Քու գահիդ վրայ 7յաւերժ պիտի բազմին»։
13Արդարեւ Տէրը Սիոնը ընտրեց, Եւ փափաքեցաւ որ ան ըլլայ իր բնակութիւնը՝ ըսելով.
14«Ա՛յս է իմ յաւերժական հանգստավայրս. Հոս պիտի բնակիմ, որովհետեւ ասոր փափաքեցայ։
15Անոր պաշարը առատութեամբ պիտի օրհնեմ, Անոր աղքատները հացով պիտի կշտացնեմ.
16Անոր քահանաներուն փրկութիւն պիտի հագցնեմ, Եւ անոր բարեպաշտները ցնծութեամբ պիտի գոչեն։
17Հոն Դաւիթի եղջիւր պիտի բուսցնեմ, Ու ճրագ պիտի պատրաստեմ իմ օծեալիս համար։
18Անոր թշնամիներուն ամօթ պիտի հագցնեմ, Իսկ անոր վրայ իր 8թագը պիտի 9ծաղկի»։