Zephaniah 1

Habakkuk  «  Habakkuk 3  ‹  Zephaniah 1  ›  Zephaniah 2  »  Haggai

Տէրոջ խօսքը, որ Եզեկիայի որդիին՝ Ամարիայի որդիին՝ Գոդողիայի որդիին՝ Քուսիի որդիին՝ Սոփոնիայի ¹ուղղուեցաւ, Յուդայի թագաւորին՝ Ամոնի որդիին՝ Յովսիայի օրերը.—

ՏԷՐՈՋ ԴԱՏԱՍՏԱՆԻՆ ՕՐԸ

«²Երկրի մակերեսէն ամէն ինչ բոլորովին պիտի սպառեմ,— կը պատգամէ Տէրը։—

Մարդն ու անասունը պիտի սպառեմ, Երկինքի թռչուններն ու ծովու ձուկերը պիտի սպառեմ, Նաեւ գայթակղութիւնները՝ ամբարիշտներուն հետ. Երկրի մակերեսէն մարդը պիտի բնաջնջեմ,— կը պատգամէ Տէրը։—

Իմ ձեռքս պիտի երկարեմ Յուդայի վրայ, Ու Երուսաղէմի բոլոր բնակիչներուն վրայ. Այս տեղէն պիտի բնաջնջեմ Բահաղի մնացորդը, Քուրմերուն անունը՝ քահանաներուն հետ,

Երկինքի զօրքերուն երկրպագողները՝ տանիքներու վրայ, Տէրոջ ³երկրպագողներն ու միաժամանակ ⁴Մեղքոմով երդում ընողները,

Տէրոջմէ ⁵հեռացողները, Տէրը չփնտռողները Եւ անոր խորհուրդ չհարցնողները»։

Լո՛ւռ կեցիր Տէրոջ՝ Եհովայի ներկայութեան, Քանի որ Տէրոջ օրը մօտ է. Արդարեւ Տէրը զոհ պատրաստեց, իր հրաւիրեալները ⁶ընտրեց։

Տէրոջ զոհին օրը՝ Իշխանաւորներն ու թագաւորին որդիները պիտի ⁷պատժեմ, Նաեւ բոլոր օտար հանդերձ հագնողները։

Այդ օրը պիտի պատժեմ բոլոր սեմին վրայէն ցատկողները, Իրենց ⁸տիրոջ տունը բռնութեամբ ու խաբէութեամբ լեցնողները։

Այդ օրը,— կը պատգամէ Տէրը,— Աղաղակի ձայն պիտի լսուի Ձուկերու դռնէն, Գոռում՝ Երկրորդ թաղէն, Ու մեծ ⁹ճայթիւն՝ բլուրներէն։

Գոռացէ՛ք, ո՛վ ¹⁰Ցած թաղին բնակիչները, Քանի որ ամբողջ ¹¹վաճառական ժողովուրդը բնաջնջուեցաւ, Բոլոր արծաթ բերողները կոտորուեցան։

Այդ ատեն Երուսաղէմը ճրագներով պիտի խուզարկեմ, Եւ գինիի պէս իրենց մրուրին վրայ ¹²հանգչող մարդիկը պիտի պատժեմ, Որոնք իրենց սիրտին մէջ կ’ըսեն. “Տէրը ո՛չ բարիք պիտի ընէ, ո՛չ ալ չարիք”։

Անոնց գոյքերը աւար պիտի ըլլան, Եւ անոնց տուները՝ ամայութիւն. Տուներ պիտի կառուցանեն, բայց անոնց մէջ պիտի չբնակին, Այգիներ պիտի տնկեն, սակայն անոնց գինին պիտի չխմեն»։

Տէրոջ մեծ օրը մօտ է. Մօտ է, ու շատ կը շտապէ։ Տէրոջ օրուան ձայնը կը լսուի. Նոյնիսկ զօրաւորը հոն դառնապէս ¹³պիտի աղաղակէ՝՝։

Այդ օրը ցասումի օր է. Տագնապի ու տուայտանքի օր, Կործանումի եւ աւերումի օր, Խաւարի ու մթութեան օր, Ամպի եւ մառախուղի օր է։

Շեփորի ու գոչիւնի օր է՝ Պարսպապատ քաղաքներու եւ բարձր աշտարակներու դէմ։

Մարդիկը պիտի տագնապեցնեմ. Կոյրերու պէս պիտի շրջին, Քանի որ Տէրոջ դէմ մեղանչեցին։ Անոնց արիւնը հողի պէս պիտի թափուի, Ու մարմինները՝ կղկղանքի պէս։

Տէրոջ ցասումին օրը՝ Անոնց արծաթն ու ոսկին անգամ Պիտի չկարենան զանոնք ազատել, Հապա ամբողջ երկիրը անոր նախանձախնդրութեան կրակով պիտի ¹⁴սպառի, Քանի որ ան արտորալով երկրի բոլոր բնակիչները պիտի ¹⁵բնաջնջէ։